QQ日榜一釋出,女廁都會再釋出。

琋:「可唔可以借件衫畀我換呀?」
我:「係喎,點解妳啱啱飛返嚟無行李嘅?」
琋:「我見後日都又飛咪放喺機場locker,懶得攞嚟囉去,剩係攞咗少少BB嘢。」
係嘅,一個人又要抱B又要攞行李諗起都辛苦…借乜衫比佢好呢,其實我大部份衫都係出街衫同返工衫,喺Issac度我都唔多著衫嘅,著得最多係套中學PE衫…或者Issac啲衫…
我:「著Issac嘅衫好唔好呀?琋玟。」
琋:「好呀!好呀!」
跟住我摷咗條新底底出嚟畀佢。
我:「妳想戴我啲Bra定係戴返妳原本嗰個?」




望落我同佢差唔多Size,應該啱戴嘅…
琋:「唔使啦,我一陣喂奶,唔戴喇。」
正好,反正我喺屋企都唔會戴。
沖完涼佢著住Issac件大碼衫出嚟,矮我少少嘅佢一件衫就遮到落大髀,佢個樣好似好開心咁,連阿B女都喺度笑。
之後到我沖,到我出返嚟嘅時候見到琋玟佢已經坐咗喺我張床上面喂奶,佢個樣真係好可愛,一面天真爛漫,雖然同揍女呢件事唔係太match,但個畫面就好溫馨,難怪Issac對住佢投晒降。
我:「妳唔去佢阿媽張床?大啲唔係方便啲咩?」
琋:「妳知我點解鍾意呢張床㗎…」
無論點佢都係Issac心愛嘅女人,我又點捨得趕佢走,第一次失身張床真係幾令人懷念嘅。
我:「見係妳,兩晚㗎咋。」我摸住佢頭同佢講。
琋:「嘻,原來Cindy姐姐咁好人。」




我:「乜我好似壞人咩?」
琋:「咁嗰陣時以為妳係啲好不知所謂嘅女人嘛,對唔住呀…之前咁對妳。」
我:「都過咗去…我又唔介意人哋點睇我嘅。」
琋:「我嗰晚喺呢張床上面,重諗緊點解男仔張床可以咁香,原來係Cindy姐姐嘅香味嚟。」
佢一路講滴咗滴眼淚落BB個頭上面。
我:「唔好傷心啦,Issac佢無心呃妳㗎。」
琋:「我無唔開心呀,諗返起開心得滯咋嘛,但Cindy姐姐…我唔明呀…」
我:「妳唔明乜呀?」
琋:「點解妳到而家重可以幫佢講好說話嘅,佢明明咁樣對妳。」
我:「佢點樣對我呀?」




琋:「咪拋棄妳囉。」
我以前俾人拋棄過咁多次點會唔明被背叛出賣嘅嗰種感覺,所以我知道Issac唔係拋棄我。
我:「佢唔係拋棄我,只不過係有啲更加重要嘅嘢要捉住啫,當妳全心全意咁相信一個人,妳就唔會講佢嘅壞話。」
琋:「Cindy妳係咪重好愛佢?」
我:「嗯,可能少妳啲啲咁啦。」
琋:「咁…妳唔想等佢見下自己個女咩?」
我:「我想…但我都唔可以咁做。」
琋:「點解唔得?」
我:「我要保護佢…同埋佢女人。」
琋:「吓?我越嚟越唔明喇…」
我:「我哋幾個嘅事太錯綜複雜,妳唔明係正常,但我唔可以再睇到Issac身邊嘅人受到傷害,所以就算係如果琋玟妳有事,我都會奮不顧身咁保護妳嘅。」
琋:「Issac而家身邊嘅女人係邊個?」
我:「係我中學同學,最好嘅朋友。」
琋:「即係妳俾人撬牆腳?咁佢一定好正…點解Issac可以咁過份…」
我:「妳覺得佢過份咁點解重要搵佢呢?」




琋:「我都唔知…就好似明明覺得佢係衰人,但你瞭解咗之後…又發覺佢唔係咁衰,就好似我以前以為妳同佢咁…但其實都唔係…」
我:「妳當我撬完人牆腳而家還返畀人囉。」
琋:「Cindy妳唔想得到佢㗎咩…」
我:「經歷得太多,我只想佢過得好就得。」
琋:「咁我係咪最後都可以見到佢?」
我:「嗯,我應承妳同埋BB,一定會嘅。」
琋:「咁我唔再問妳啦,反正佢而家都唔喺香港;Cindy姐姐,妳聽日得唔得閒呀?」
我:「妳想我做乜先?」
琋:「可唔可以陪我行街?」
唔知做乜我諗都唔諗就應承咗佢,可能因為佢係Issac嘅女人啦,重有佢個女;一不做二不休我就message Simon放兩日假,當然即刻搞掂啦,重send咗個喊喊樣畀我。
到第二日我哋三個去咗百貨公司,原來佢唔係諗住㞗行街而係真係有嘢買,佢去咗睇褸,重要唔係睇時款褸而係功能褸,以佢咁嘅靚妹嚟講真係估唔到,雖然佢已經做咗人哋阿媽,但明明而家澳洲係夏天,香港都用唔著呢個level嘅禦寒衣物,琋玟佢到底搞乜鬼?
佢一件二件咁試上身,後生真係好,十九歲嘅佢著乜都咁青春可愛;而我就幫佢抱住Issac個女,BB女真係好cute,喺我心口不停咁望住我,而且成日嚟佢喊都無喊過,重好鬼多表情好得意;如果我亂嚟啲,可能我一早都已經幫佢生咗個…但,我又真係唔鍾意製造麻煩畀其他人,加上…我邊捨得咁樣對Stella…最衰都係Issac條仆街仔,一早同人哋一齊咪好囉!
琋:「Cindy姐姐,我著乜嘢色好呀?」
我:「黑色幾好呀。」
琋:「但黑色唔係好唔開心咩?」




我:「黑色係保護色,可以保護妳同埋BB,著住黑色衫會令妳做嘢冷靜啲,頭腦清晰。」
佢咁細個就做人媽咪,我真係好怕佢會再亂嚟,加上佢咁靚女又無人生經驗,俾人呃嘅機會真係好大,如果無咗屋企人睇住佢真係唔知會點…
琋:「好啦,咁就黑色啦,等我配埋條褲先。」
吓,咁認真,呢位妹妹仔唔係想孭住B女滑雪post上IG呀?而家啲靚妹真係乜都做得出,我真係有少少擔心佢。
我:「琋玟,妳唔係要返澳洲㗎咩?買咁多…」
琋:「吓?我幾時有話過要返澳洲?有邊個會咁樣返嚟香港兩晚然後又即刻飛返去?」
我:「我以為…妳係…」
琋:「我先唔會為咗個衰人咁樣呀…雖然而家知道咗佢唔係太衰,不過我今次係嚟香港轉機㗎咋,所以咪順便,佢唔喺香港我都無辦法啦。」
我:「咁妳聽日飛去邊呀?」
琋:「US囉,所以嚟買定褸。」
美國?做乜個個都去,真係有金執?
我:「妳係去做乜㗎?」
琋:「讀書囉。」
我:「吓?咁妳屋企人呢?」
琋:「咪繼續喺澳洲。」




我:「佢哋放心㗎?唔理妳㗎咩?」
琋:「自從佢哋發現我有咗之後就已經無我符。」
我:「點解咁講?」
琋:「鬼叫我阿媽想迫我落咗佢,妳話係咪黐線㗎,咪同佢哋死過!」佢講嗰時E起棚牙,張牙舞爪,好似想掟杯咁。
我:「咁佢哋都係為妳著想啫,妳又未讀完書…咁妳之後點?」我諗佢阿媽覺得阿女黐咗線多啲。
琋:「我攞起把刀指住自己條頸,同佢講:『邊個攪我個女我一定同佢死過,阿媽都係咁話!』」
諗起我都覺得不寒而慄,確實唔可以太隨隨便便俾佢見Issac,我真係唔想出事,起碼都要等Stella生完穩定落嚟先…不過母愛真係太犀利,做咗阿媽之後竟然可以咁樣對抗自己老母。
我:「即係妳自己一個去US?」
琋:「係呀,我表姐喺嗰邊,或者可以幫下手嘅,不過我都係想自己湊返BB。」
我:「妳要返學重點湊BB?」
琋:「到時先算啦,乜美國唔係好自由,喺大學抱住個B上堂都無人理嘅咩?我個B又唔會喊。」
我:「我無概念…妳去到自己研究下啦。」
睇嚟呢個小妹妹為咗個女真係乜都做得出,話唔擔心就假,點算好…如果佢出咗事,Issac實會怪我乜都唔同佢講,今次真係左右做人難…
買完褸之後我哋三個去咗餐廳食飯,琋玟佢專登搵咗個喺角落頭嘅卡位,佢自己一路食又放阿女喺心口一齊食,佢係一個好現代嘅媽咪,重做得好出色,一定好過我阿媽好多。
返到屋企之後,我哋同BB玩咗陣直到佢瞓著咗,不過琋玟無一齊瞓,佢捉住咗我。




琋:「Cindy姐姐,可唔可以講Issac啲嘢比我聽?」
咁大鑊?我可以點講?佢九成嘢都唔講得出嚟㗎喎,就連佢去補習社件事都…
我:「妳想知啲乜?」
琋:「想知佢係點嘅人…其實我唔係太瞭解佢。」
爛人…優柔寡斷…猶豫不決…三心兩意…拖泥帶水…藕斷絲連…讕好人…幫倒忙…攪著自己攪著人,但…佢就係可以令到我哋咁多位女仔狠唔起心怪佢。
於是乎我就講咗啲佢中四五嘅嘢畀佢聽,再修改一下我同佢,Stella嘅嘢比佢聽,佢聽得好開心。
我:「琋玟,我聽日送埋妳機啦,妳去邊間U讀書呀?」知道佢喺邊,到真係要安排都易啲。
琋:「MIT。」
我諗我聽到之後嗰刻係定咗格。
琋:「嗯?未聽過?麻省理工學院呀。」
我:「我知道…世界第一學府…」
琋:「哈哈,我都係撞彩試下,唔想日日對住老竇老母,好影響我同BB嘅心情,點知我試下報佢就收咗我,真係喜出望外!」
我:「乜咁大整蠱…」
Boston話大唔大,話細唔細,Stella住喺MIT附近,佢哋去埋嘅地方應該都係類似,咁樣撞到係遲早嘅事…
琋:「點解…咁講…」佢眼神都feel到類似係乜。
我:「Issac個女人,喺MIT讀緊PhD。」
琋:「好…勁呀…」
我:「點解我身邊咁多怪物…」
琋:「Cindy!妳話我知吖,我想見佢!求下妳!」
我:「我負唔起呢個責任。」
琋:「Cindy!求下妳!我只係想見一見咋,我應承妳,一定唔會去打攪佢兩個!」
我:「妳唔好跪喺度啦…有時唔係話妳打攪,妳知Issac佢無鬼用,我唔想佢出事。」
琋:「我一定唔會俾佢出事㗎!妳信我啦,Cindy姐姐!我唔係去搶男人…」
我:「佢女人呢兩三個月要生喇,受唔起刺激。」
琋:「我個女佢要有細佬妹嗱?」
我:「會係細佬嚟…妳真係咁樣諗?」
琋:「咁…都係Issac嘅仔女嚟,求妳話我知。」
我:「呢個…我都唔知…太複雜。」
點算好…Icarius有無史書俾我參考下,點解好似同佢所講嘅過去唔同咗咁嘅…我所知道嘅係Issac一定好想見到佢兩母女,但如果瞞住Stella…問心我做唔出,但我又唔敢問Stella應該點做,反正佢一定會叫Issac搵琋玟唔使理佢。
琋:「妳同佢都可以相安無事,點解咁唔信我…」
我:「我擔心佢門口張枱上面放咗玻璃杯啫。」
琋:「Cindy!我大個女㗎喇,已經唔係之前嘅我,我保証嗰啲事一定唔會再次發生!」
我望住佢,搞成咁其實最大責任嗰個都係佢…但係如果我唔幫佢,好似真係太慘,我都唔係好過到自己嗰關,我容忍唔到自己咁狠心。
我:「妳可唔可以百份百應承我唔會傷害到佢哋?同一時間妳又唔會受到傷害?」
琋:「可以!一定得!」
我:「我其實無佢哋地址…Issac而家好多時住喺佢女人度,我最多可以話妳知佢叫乜名。」
琋:「多謝妳!Cindy姐姐!」
琋玟佢開心到抱住咗我,重喊咗出嚟。事實上我都唔知點樣先可以令佢哋三個都唔會受到傷害,但呢個問題始終都係要解決,責任係喺佢哋度。我最多都係為佢哋祈禱,三個DSE加埋廿五粒星,如果連呢小小問題都解決唔到就證明香港嘅教育係有幾咁廢。
琋:「咁妳會唔會同Issac講?」
我:「唔會,佢成事不足,敗事有餘,早啲同佢講盞佢諗埋啲奇怪嘢越搞越衰,你哋三個最唔信得過就係佢。」
琋:「哈哈,妳真係好清楚佢!」
我:「好喇,琋玟妹妹快啲瞓,聽日要準時去機場。」
到咗第二日我送佢機。
我:「攞返件褸呀,落機要包實BB,嗰邊而家好凍㗎喇,要好好保重知唔知?」
琋:「知道喇,唔好扮我阿媽啦。」
我:「咁bye bye BB,bye bye琋玟媽咪。」
琋:「Bye bye Cindy姐姐,如果下次我返香港再同BB嚟探妳啦!」
琋玟,Stella,Issac,希望命運會眷顧你哋。

話咁快,琋玟就去到MIT,極端叻女嘅佢話咁快就搵到Stella姐姐住喺邊,故事繼續。

S:「請問妳係?我識妳嘅?」
琋:「Stella師姐妳好,我叫做琋玟,我哋係第一次見,多多指教。」
呢個時候我個腦好似俾人灌緊液態氮,乜都諗唔到,唯一識做嘅就係開咗部電話嘅定位…
S:「琋玟…妳好,妳嚟搵我嘅?」
琋:「無錯呀,Stella師姐。」
S:「妳嗌我師姐,妳喺MIT讀書?」
琋:「係,下個sem我會喺度讀finance UG。」
S:「咁請問妳嚟搵我係為咗…」
琋:「因為搵到妳,就可以搵到Issac。」
S:「咁妳搵佢係…」
琋:「你重企喺門口成碌木咁做乜?」
我行咗過去,部電話早就跳咗去時停嗰一版,不過Stella已經識穿咗我諗緊乜,佢捉住咗我隻手沒收咗我部電話,放喺梳化另一邊…
呢個時候琋玟佢除咗件外褸,終於見到佢心口條孭帶同入面嘅BB女…琋玟…
琋:「點呀,望下你個女啦。」
BB女個樣真係好得意,佢擘到隻眼大一大望住我,好似有啲疑惑,個樣又好好奇,我望住BB,個腦唔想再諗其他嘢。
S:「咁…琋玟妹妹妳係嚟宣戰嘅?」
琋:「唔係,有啲男人無論妳點努力都係捉唔住嘅,我唔做徒勞無功嘅事,只係想俾BB見下爸爸。」佢一邊擰頭一邊講。
S:「我捉住佢唔係為咗綁住佢,只係想保護佢。」
琋:「點解咁講?」
S:「保護一個男人講過嘅承諾,就係保護佢。」
琋:「Stella姐姐同Cindy姐姐講嘅嘢真係好似。」
S:「妳去搵過Cindy嚟?」
琋:「嗯,如果唔係我都唔會搵到妳。」
S:「個衰妹…唔知佢點諗。」
琋:「放心啦,我應承過Cindy姐姐唔會阻住你兩個,所以我一陣就會走㗎喇。」
呢個時候BB佢伸開兩隻手去我面前,好似想抱住我咁,個嘴發出嗯嗯咁嘅聲。
琋:「點呀?抱唔抱下你個女?」
我望住Stella唔知點好…
S:「望住我做乜,嗰個你個女嚟㗎。」
我接過BB,佢好快就喺我身上搲來搲去,然後望住我笑,佢而家應該半歲多啲,呢段時間辛苦晒妳喇…琋玟…
兩個女人望住我,我完全唔知點算好,BB…妳可唔可以教下我點做…
B女佢好活潑咁喺我個身上面爬來轉去,好難控制,好快佢就打側趴咗喺度望住Stella…重雙眼發光咁。
S:「BB…妳想點呀?」
點知BB佢伸咗兩隻手出嚟…
S:「唔得㗎,妳搵返媽咪啦…」
B:「嗯嗚…嗯嗯嗚!」
琋:「妳鍾意嘅話咪抱下佢囉。」
我將BB交咗畀梳化上嘅Stella,B女即刻好似如獲至寶咁瓹入Stella心口度,係嘅…佢心口軟綿綿咁真係會好舒服,B重用佢對波嚟洗面…點知…佢搲開埋Stella件衫啜咗落佢粒lin lin度…
S:「喂!BB…唔好啊…未有奶…琋玟…Sorry呀…」
琋:「衰女包,都唔知遺傳邊個咁花心…Stella姐姐,妳幾時生呀?」
S:「嗯,一月尾左右啦。」
琋:「放心啦,生仔好簡單㗎咋,妳而家好好休養,我唔會嚟煩住你哋…喂!呢個係我美國電話,如果你真係好得閒無嘢做想睇下BB,Stella又批準嘅就搵我啦,不過要等我搵到地方落腳先…」
我無言而對,跪咗喺度望住佢,雙眼又再次唔聽使咁…
琋:「做乜呀,咁大個人重咁…失禮死…我無事喎,我自己搞得掂,你唔使擔心,都過咗半年啦…唔鬼理你呀!」
佢一路講都滴咗滴眼淚出嚟…
琋:「BB乖啦…做乜黐實Stella姐姐唔放呀,我哋係時候走㗎喇,唔好曳啦…妳唔要媽咪嗱?」
B:「嗚哇…嗚哇…」
S:「琋玟…妳未搵到地方住?」
琋:「未呀…我呢幾日都係住喺New York嘅親戚度,一陣都係搭火車返去…不過我要喺度搵屋租喇,New York過嚟實在太遠,我都想住喺呢附近,可以行返學實在係太方便,Stella姐姐妳有好介紹?」
S:「如果妳唔介意嘅話…我呢度有間吉房。」
琋,我,B:「!」