《平行軌跡》: Episode 22 - 幾分鐘的約會
「Hi！」
…
「Hi！」
「…你見唔到我戴晒Headphone聽緊歌架咩？邊位呀你？」
「我係李櫻杰呀！妳唔認得我啦？」
「你條橋舊咗啲喎。」
「話晒都Ocamp組mate丫…俾吓面好喎…雖然之前一句偈都無傾過…」
「又好似有啲印象，點呀？有咩事？」
「無…咁啱搭地鐵…又撞到妳，諗住打聲招呼姐。」
…
「醒吓呀喂！」小郎正猛搖著阿杰，找回阿杰的三魂七魄。
「唔？咦？嗨妳喺度做乜鬼嘢？」阿杰重回現實。
在樓梯底分別後，跑回家中又匆匆外出的小郎是如何抓住阿杰呢？原來當她走回樓梯時，阿杰仍然在沉思。小郎遂鬼祟地拉阿杰一起上地鐵列車。
「我問你做乜鬼嘢就真呀，無啦啦喺度發呆。」
「無…突然間又諗起以前啲嘢…地下鐵碰著她…好比心中女神進入夢…」阿杰一邊說著，一邊露出落寞的神色。
「諗起啲咩呀？」小郎把臉靠近阿杰，逼迫他說下去。
「諗起我以前女朋友，我俾人飛咗嚕…同佢相識…就係喺架地鐵入面。哈哈…第一次同佢講嘢果陣，俾佢窒到我口啞啞，第二次再見到嘅時候，直頭唔敢同佢講嘢…地下鐵再遇她，沉默對望車廂中。」
「咁之後呢？」
「之後…」
阿杰認識對方的頭一個月…
「Hi！」
「乜又係你呀？」
「係囉又會咁啱嘅，返學呀？」
「係呀。」
「今日天氣好好呀。」
「係卦。」
…
「之後呢之後呢之後呢？」
「地下鐵邂逅她，車廂中的暢談最受用…」
三個月後…
「之後條友就俾教授鬧到成個豬頭咁，仲趕咗出去添呀！」
「哈哈哈哈…條友係咪傻架，有啲智商嘅都知唔應該咁樣玩啦。」
「其實都幾好玩架！我哋成班都讚佢夠guts！」
「痴線，一陣佢肥咗你，你畢唔到業就知死。」
「叉住妳把口！講埋晒啲咁嘅嘢。」
「嘿…喂，我呢排呢，迷上咗呢本漫畫！你有無睇過呀？」
「少女漫畫嘅嘢唔係好啱我喎…啲眼妳睇吓，羅茲威爾咁大隻……」
…
「每天幾分鐘，共你心聲已互通，旅程何美麗，如在愛情小說中。」阿杰一整個投入在美麗的回憶中。
「你講時講可唔可以唔好邊唱邊講呢？咁之後又點，究竟你點同佢開始架？」小郎問得焦急起來。
「由我主動埋去識佢，到佢終於肯同我傾偈…用咗三個月，之後果半年，先慢慢同佢建立到話題。跟住就放暑隻啦，到咗升Year 2之後，佢竟然好似消失咗咁，我再見唔返佢。我默默等候她，等她翩翩降臨帶著夢，又沒有雨或風，何事杳然失芳蹤？日日在等候她，無奈心中愛神要玩弄，地下鐵約會似是中斷，令我心暗痛…我仲以為我同佢…未到高峰已劇終…後來問返佢啲同學先知道…原來佢去咗exchange一年。到佢返嚟之後…就膽粗粗…就咁囉。」
「吓？完咗架喇？！」小郎被氣得七竅生煙。
「嘩…妳仲想知道得幾詳細？咦？呢度邊度嚟架？！」阿杰眼下才驚覺自己身處地下鐵之中。
「低能仔，下一站我返到屋企喇。」其實兩人已經經過這一個站一次，然後乘坐回頭車，又再到達這一個站，名副其實的遊鐵河。
「咁樣…我送妳返去啦…」
「唔駛喇，你聽日陪我去玩就可以喇。」
「起碼俾我送妳到閘口啦。」二人下車的同時，小郎瞥見對面月台好像正在上車的Shirley。
「咦？我家姐個Friend喎！」「咦？Shirley？」二人同一時間向著同一個方向說。
「你又識佢？」小郎對Shirley跟阿杰的友誼一無所知。
「咩呀……佢係妳師姐喎，同我同年架喎，校花喎……出名到隔離校都識架啦。」
「咩……咩喎……咁…咁…咁……」小郎一時語塞，說不出一句完整說話回應。
「不過又幾巧合，妳家姐好似唔係我哋學校架喎，又咁啱佢會識到Shirley，而妳，佢竟然只係妳家姐個朋友。」
「……係囉可，算啦！你都係唔好送我喇！」小郎因為剛才一事受了少許打擊。
阿杰正要回應的時候，又一個熟悉的背影在眼前出現。
「妳等我一陣先，等我扮吓嘢嚇吓個死仔。」死仔指的就是那個背影，Vincent。
連寒暄也說不上的數句對話過後，Vincent匆匆離去，留下阿杰跟小郎二人。
「好啦，我真係走架喇，聽日見！」既然小郎一再強調不用接送，阿杰也不再勉強。
「係咁啦！Bye Bye！」
「Bye！」
小郎下車後，轉身望著阿杰的背影，看著列車開走，背影越來越遠，越來越細小。
「我眼裡面，一直就只有你一個……又點知邊個係校花喎……你知唔知道…其實一直都有人等緊你？地下鐵碰著他…好比心中愛神進入夢…」小郎淚水滿眶，仍然忍著不讓它們流下來。
…
「咦？又撞到妳嘅？」
「係呀…我都係住喺附近之嘛…」
…
「每天幾分鐘，共你相識於約會中，旅程何美麗，如像愛情小說中…」
…
「你係咪真係會自彈自唱俾我聽架？」
「梗係啦！一言既出呀！」
「係架喇！唔准失信架！」
…
「日日地碰著他，無奈心中愛神要玩弄，地下鐵約會要是終斷令我心暗痛…」
…
「我…就嚟要去澳洲喇…」
「咁呀…妳要小心啲呀，去到果邊記得同我聯絡呀。」
「你…有無嘢想同我講？或者有歌想唱俾我聽？」
「無喎…做咩咁問？」
「無…無嘢喇…」
…
「唔知你仲記唔記得…你應承過我…」
（Episode 23 - 早班火車）