《平行軌跡》: Episode 23 - 早班火車

婚宴翌日，阿雪大清早便收到櫻雨妹妹（即Yuki）的訊息，十萬火急的找她外出。
 
「嗄…嗄…嗄…咩事啊櫻雨妹妹？」阿雪氣喘噓噓，從鋪滿一塊塊大石板的街道底部奔跑上街道頂部。好不湊巧，她今天穿的不是平日的T-shirt牛仔褲波鞋，而是牛仔裙配平底鞋，跑起來更加吃力，還差點扭到腳。眼前的Yuki則是一般在街上看到的熱褲修身短Tee，還有一把長而微曲的頭髮。
 
「雪姐姐快啲嚟幫吓眼啦！」Yuki很著緊地看著街道上迎面而來的一群男子。
 
「嗄…嗄…睇咩啊？」阿雪坐在街道旁邊的梯級，一邊喘氣，一邊檢視腳踝，一邊回應Yuki。
 
「果個男仔呀，拎住籃球好高大，肌肉爆晒棚果個呢。」Yuki不敢太著跡，只鬼鬼祟祟地指住目標人物。
 


「嗯…都算幾靚仔啦…又夠高又夠健碩，佢做model應該會幾適合。」為回應Yuki的問題，阿雪向那名男子評頭品足。
 
「我日日返學都會同佢同車架！呢排佢仲走埋嚟想識我添！唔知點算好呀！雪姐姐妳覺得點？」Yuki又興奮又羞澀。
 
「嗯…我都唔知啊…」阿雪對這個話題顯得有點悶悶不樂，像是回想起什麼似的。
 
「呢度仲有張字條添呀！妳睇！」
 
「天天清早最歎喜　在這火車中再重逢妳
迎著妳那似花氣味　難定下夢醒日期」


 
不知不覺間，那名男子及他的友人已經離開兩人的視線範圍。Yuki也只好坐到阿雪旁邊。
 
「唔好意思呀雪姐姐！哈哈…為咗啲咁無聊嘅嘢call妳出嚟添，妳隻腳無事丫嘛？」
 
「無事啊…係有少少痛姐，唔緊要啦，我打俾阿姨同佢講請假休息下啦。」這是阿雪的一大優點，縱然面對不如意事，也能若無其事輕鬆面對。然而…她卻會因某些事而悶悶不落？
 
「雪姐姐妳做咩咁嘅樣嘅？」冷不防Yuki就打開這個話題的缺口。
 
「嗯…我呢…以前都試過日日搭車，見到同一個人，果陣時都有種感覺係…願永不分散，祈求路軌當中，永沒有終站…」阿雪抬起頭若有所思。


 
「講多啲嚟聽吓啦！」Yuki二話不說雙手繞著阿雪的手不放。
 
「果陣我仲讀緊中學，應該仲細過妳而家添，咁日日返學都要搭鐵路啦，每一日，我都會坐喺同一班車嘅同一個座位上面，又喺我斜望嘅右前方嘅同一個位置，都會出現同一支結他，同一個背影，穿著同一套校服，同一個書包…同埋佢身邊嘅…同一個女仔。」阿雪帶半點思念又帶半點唏噓，一路訴說：「同一個車站上車，同一個車站落車，但總係唔會有交集，我就向住A出口，佢同埋佢，就走去B出口…又再等一個站看你意思，三個站盼你會知，千個站你卻似仍未曾知……呀！果陣係啱啱升中學嘅時候嚟，佢真係好有型架，不過，過咗唔知兩定三年之後，佢就無再搭呢班車，我亦都無再見過佢嚕。」
 
「感覺好似一段大好姻緣無疾而終咁…願永不分散，祈求路軌當中永沒有終站……」Yuki有點替阿雪感到不值。
 
「嗯…既然人哋都主動想識妳，如果妳都對佢有興趣嘅，咪試下同佢傾下偈囉，多個朋友都無妨架，係咪？」阿雪對戀愛事宜真的一點也不懂，所以也不知道怎樣解答，只有片面說說的份兒。
 
「好，聽日返學就俾幾分薄面佢啦。」雖然口裡說是給機會別人認識自己，但Yuki雙眼騙不了人，又再發亮得像兩個電燈泡。
 
「嗯…祝妳好運啦。」看到Yuki雙眼，阿雪有種心裡滴汗的感覺。
 
「係呢？妳呢排有無見過傲雲叔叔或者同佢傾過偈？」「漫畫長路」的群組入面有四個人，包括阿雪和Yuki，以及傲雲和一個神秘人。
 


「講起上嚟…都成個月無見過佢喇，就算係我哋平時傾偈佢都好似無講過嘢…只係互相分享嘅時候有得睇佢套漫畫咋，嗯…諗起套漫畫就覺得有啲哀愁…」之前阿杰不小心從電腦看到的幾套漫畫之一，其中中年男女的故事，正是傲雲的手筆。
 
「我覺得我哋呢個群組應該要有一次正式嘅gathering！加深大家嘅交流！」Yuki突然間整個人彈起，嚇倒不少途人。
 
「嗯…其實都好架，起碼我哋交換心得都係面對面比較容易同埋直接，不過我哋叫得郁火艷神先算啦。」第四個群組成員，網名叫火艷神，性格很神秘。
 
「咁又係，平時佢又講嘢都唔多句。不過唔緊要！我哋三個都得架姐！」
 
「咁我今晚試下搵搵傲雲哥哥啦！妳而家諗住去邊？」有藉口找傲雲，讓阿雪也興奮起來。
 
「橫掂出咗嚟，就去行街Shopping！雪姐姐不如一齊啦？」
 
「嗯…我想喺度畫下畫先，一係我晏啲再揾妳。」看見石板街如斯風景，阿雪畫癮又起。
 
「咁呀…好啦！晏啲見。」Yuki行不了兩步又轉身：「雪姐姐，妳今日有啲唔同咗，keep going！」


 
「吓？有咩唔同咗…」還沒來得及問，轉眼又發現Yuki已經走得遠遠。
 
（Next：Episode 24 - 耿耿於懷）