念念不忘 都冇迴響: 整蠱

我地之所以可以成日見，除咗出街之外，就因為補習啦。暑假補習班個時段係朝早，我地順勢就可以出街，非常方便。

如果要形容遊爍嵐，我會諗起Netflix套Alice in Borderland。遊同學一直都好鍾意同人性有關嘅嘢，所以佢會鍾意挽桌遊觀察其他人，分析D人際關係嘅嘢，同埋整蠱我。

至於點解係整蠱我，係因為我講過無論點我都無可能嬲佢，所以佢每次補習都會整蠱下我。無啦啦系我份notes畫下笑哈哈係一個常態，有一次佢超級認真同我講：「其實我來自未來。」咁係人都知係架啦，但係佢又真係好認真咁說服我，當一個人咁認真咁講無聊耶其實聽聽下，你都會比佢說服到同佢一齊癲。「如果你來自未來咁咪幾好，證明你個未來有我。」果陣我係咁答佢嘅。

有一次佢又講埋D無聊耶之後突然問：「喂，其實你係咪鍾意我？」我真係一個大驚失色，就當然否認啦。點知佢覺得我個反應超級好笑，講左全堂。最後我話：

「遊爍嵐，我係男仔都無會鍾意你。」



「咁作為一個女仔呢？」

「我點會鍾意你？」

「你千其唔好鍾意我啊。」

「都話我唔係鍾意你！」

一直到佢搭車走，我都努力笑著否認。



順帶一提，其實間補習社喺我屋企樓下嘅，我每次都會特別個圈送佢返去車站先走，不過我懷疑佢覺得我係順路。

不過果個真係我人生講過最大嘅大話，如果嚟個係一個整蠱，我完全覺得佢非常成功，我完全感受到為何方寸大亂。