［愛情純愛］既然忘記唔到佢，不如試下中意我⋯？: 07. 嗯，是「女朋友」

「係呢～你咪話今日孫慧伶搵過你嘅～」我向後坐，背脊貼住櫈背坐

「嗯。」岑諾新坐得頹廢，輕聲地嗯咗一聲就算

「佢係唔係想同你做番朋友？」我隨便地講咗個好合理嘅理由

「點知佢。」岑諾新聳肩，「唔知佢諗緊啲咩⋯」

「咁如果佢真係想同你做番朋友呢？」我側着身子坐，望住耷低頭唔知睇緊咩嘅岑諾新，「你會唔會同佢做番朋友？再見亦是朋友咁樣。」



「邊有可能⋯」岑諾新望向我輕輕一笑，「真心中意過一個人，可以同佢做番朋友㗎咩？你宜家可以同張景彥做番朋友咩？每次見到佢嘅時候仲要好似冇事一樣笑住同佢打招呼。」

「宜家？宜家一定唔得呀⋯」我不禁苦笑起嚟，「都未放得低～」

「咁咪係。」岑諾新企起身，順手地拎埋蛋糕盒，「番去未？」

我點一點頭後便起身孭書包，同岑諾新一齊踏出公園番屋企

我地行咗一陣，前面忽然間有一個著住附近小學校服嘅小妹妹跑過嚟，一下子就撞落我度，我企得穩，但個小妹妹好似唔係企得好穩，孭住重重嘅書包，又比我撞咗一下，成個人向後跌坐喺地上



「你有冇事呀？」我頓時鬆開岑諾新嘅手彎下腰，扶起個小妹妹

小妹妹企起身拍一拍條校裙，我見佢嘅雙眼通紅，好似就嚟要喊咁，係唔係我整喊咗個小妹妹⋯？

「岑諾嵐？」我忽然聽到喺我身旁嘅岑諾新驚訝地講道

我抬頭望佢，見到佢輕皺起眉頭，佢識呢個小妹妹？

「新？」



過咗幾秒後，有一個女人迎面行嚟，長髮飄飄，雖然著住普通嘅T-shirt牛仔褲，但都冇辦法蓋過佢嘅天然氣質，佢好靚⋯！

「媽？你喺度嘅？」岑諾新朝嗰個女人講道

原來係岑諾新嘅媽媽，我連忙微微一笑，點一點頭

「去接妹妹放學嘛。」岑媽媽講道

撞到我嗰個小妹妹頓時朝媽媽嘅方向跑去拖實媽媽，怯怯地望咗岑諾新一眼，又望一望我

「媽媽叫咗你幾多次唔可以亂跑？」岑媽媽望住個小妹妹皺起眉頭講道，「撞到人啦！」

「你又買咁多嘢呀？」岑諾新嘅眉頭輕輕一皺，岑媽媽嘅手上拎咗好多袋嘢

嗰個小妹妹甩開媽媽嘅手跑到岑諾新嘅面前攬住岑諾新嘅小腿，畢竟只係小朋友，同有180cm高嘅岑諾新比較，又真係差好遠嘅⋯



「得啦，媽媽拎到㗎啦～」岑媽媽微微一笑，然後對個小妹妹招手，「嵐嵐，番去啦～」

岑媽媽講完後便拖住個妹妹一齊行，走過咗岑諾新嘅身旁

岑諾新一臉欲言又止地望一望我

「我自己番去就得啦～今日唔洗送我番去。」我頓時講道，幸好啱啱冇拖手，如果唔係比佢媽媽見到就尷尬，「聽日見～」

我向前走咗兩步，又回頭望一望岑諾新，然後同佢揮一揮手

今日好少有地係我自己一個人番屋企，平時都係同岑諾新一齊走

原來岑諾新仲有個妹妹，不過感覺上，佢妹妹好似好驚佢但又好中意佢咁樣



X⋯X⋯X

「啱啱嗰個女仔係你同學呀？」我媽問道，我就知道佢一定會問起蔣倩盈

「嗯。」我都好難話佢唔係我同學嘅，我同佢著住同一間學校嘅校服

「同學定女朋友呀？」我媽又追問道，佢想食花生

今次我靜咗，蔣倩盈都算係我女朋友嘅⋯但我又唔想答我媽，話比佢知係⋯一於答佢唔係，其他事以後再算

「同—」「媽媽，啱啱哥哥同嗰個大姐姐拖住手手～」

岑諾嵐！你特登㗎係唔係⋯！你真係喺唔適當嘅時候講啲唔適當嘅嘢！

「算係女朋友。」我無奈地回答道，畢竟，同學又點會咁樣光明正大拖住手



「算係女朋友？唔中意人嘅話，唔好同人地一齊。」我媽聽到我嘅回答後，輕輕皺起眉頭，「同學就同學，女朋友就女朋友！定係你唔中意人呀？」

事實上我中意嘅人又真係唔係佢，佢中意嘅人都唔係我⋯冇咩分別⋯

但啱啱岑諾嵐咁樣講，我都兜唔番，咁佢又唔係唔可以公開比人知嘅人，我嗰班嘅人，仲有孫慧伶都已經知道佢係我女朋友啦，所以都唔係唔見得光嘅關係

再加上，就算我媽知我拍拖都好，佢都唔會講啲咩，佢都算係思想比較開放嘅家長嚟嘅，所以，唔會比佢鬧之類⋯

「唔係唔中意⋯」我淡淡地回答道，我媽望住我笑咗一笑

唉⋯你就當你個仔係怕醜啦⋯






IG Link: https://www.instagram.com/nd_cotttoncandy/?hl=zh-tw