「換咗佢啦⋯」岑諾新將件T-shirt遞比我

「吓⋯?」我有啲愕然地望一望佢又望一望件T-shirt

「你打算喺我屋企一直企喺度等到你屋企有人番?」岑諾新問道

「唔該⋯」我有啲尷尬地接過佢嘅T-shirt,然後再一次將廁所門閂上

我將校服都除落嚟,底衫用打底褲我都係有著住嘅,打底褲冇咩點濕,所以可以照著,而且,佢淨係比咗件上身衫我



我換好衫後開門出去,見到佢房嘅門打開著

「校服⋯」我拎住我嘅校服企喺佢房門前

「比我,幫你掛起。」岑諾新行出嚟,然後接過我嘅校服行到廚房,拎起衣架將佢地掛起

佢拉住我行入房,然後佢自己拎住衫褲去沖涼,我坐喺佢嘅書枱前發呆

間房,充滿住佢嘅味道⋯我偷偷地拎起衫領放到鼻邊,頓時傳嚟佢身上嘅氣味



「我喺度做緊啲咩⋯?」我不禁問自然,然後迅速地鬆開衣領

我有啲唔係幾習慣,因為感覺好似冇著褲一樣⋯我行到去放喺衣櫃旁邊嘅鏡子前

「佢件衫好大件⋯」我望住鏡中嘅自己講道,佢嘅衫蓋到我大腿嘅三分之一,好寬鬆,「我著住之後,身上會唔會有佢陣味⋯」

我又喺度胡思亂想啲咩呀⋯!

我雙手捧住自己嘅臉頰,我嘅臉頰熱熱的,莫名其妙地有啲害羞



「男朋友嘅T-shirt⋯」我喺心中自言自語地道

我聽到有少許聲音便回頭望,見到沖完涼嘅岑諾新行入嚟,望咗我一眼之後又好快移開視線

我微微耷低頭望一望自己,我自己都有啲唔知點咁

岑諾新嘅頸上搭住咗一條毛巾,佢坐低喺電腦椅上背住我用毛巾抹頭

我回頭望一望鏡,慢慢地放空企喺鏡前,單純地發呆

「唔知道雨幾時停⋯」我喺心中諗道,「唔知道晏啲我走嘅時候停雨未⋯希望陣間已經停咗⋯!」

我嘅心臟不禁緊縮咗一下,當我回過神來嘅時候,已經係比佢輕輕地攬住咗⋯我嘅心跳得好快⋯

「雨⋯」我唔知點解會講出最後一個比佢打斷咗嘅字,「你⋯」



「雨未停⋯」岑諾新喺我耳邊低聲講道

佢將聲線稍微壓低,呢種低音呢種磁性⋯我嘅心跳得仲快咗

「嗯⋯」我幾乎已經係用喉嚨發音嚟回答佢

一呼一吸之間,都只聞到岑諾新嘅味道⋯呢陣味令我心跳加速同時,令我有啲中意喺佢嘅懷中⋯

我踮起腳尖,雙手環抱住佢嘅頸,鼻尖輕輕地掂咗佢嘅頸一下,佢嘅味道撲鼻而嚟,仲有淡淡嘅沐浴露香味

「你唔好亂郁⋯」岑諾新提示我,佢怕我又會蹭佢,喺我未郁前就先提我

我頓時壞心眼地喺佢嘅頸窩上蹭兩下,岑諾新頓是縮起膊頭



「嘻嘻⋯」我笑一笑,然後腳跟踩番喺地面

岑諾新嘅左手輕輕地攬住我,我微微抬起頭望佢,雙手攬住佢嘅腰

「好暖⋯」我喺心中講道

今日因為落大雨加上有風,所以好涼,但係喺佢嘅懷中好溫暖,可能因為佢成個人都好暖

「宜家可以攬。」岑諾新細聲地講道

「攬緊啦已經⋯」我抬頭望向佢微微一笑講道,然後下意識地又蹭咗兩蹭

「你好似貓貓。」岑諾新臉上忽然掛上淡淡嘅微笑,「蹭自己嘅味。」

「我邊有⋯!」聽到佢咁講嘅我頓時有啲慌張



我望到佢臉上掛着淡淡嘅笑容,我嘅心跳,不禁又加快咗啲

「貓貓乖。」岑諾新摸摸我頭講道

「我唔係貓貓啦⋯!」我將頭埋喺佢嘅頸窩中,佢陣味好好聞

我感覺到佢將雙臂嘅空間收窄咗,將我攬得更緊,我有啲希望⋯可以攬耐啲⋯

「叮咚~」

門鈴忽然間響起,我嚇得頓時鬆開手,向後行咗兩步

「應該係我個妹番嚟。」岑諾新見到我嘅反應後笑咗一笑,然後摸摸我頭便行出去



佢妹妹應該同佢媽媽一齊番嚟?上次見到嘅時候係佢媽媽去接嵐嵐⋯但我呢個look點行出去打招呼⋯?

我下身著住嘅係打底褲,雖然係短褲,但係⋯我咁樣嘅衣著喺人地屋企都太奇怪啦⋯!

「都係出去打聲招呼啦⋯唔打招呼好似唔太禮貌⋯」我拉開房門探頭望出去,喺踏出房門前拉一拉條打底褲,等條褲唔好顯得太短

「姐姐。」企喺走廊前嘅嵐嵐望到我便叫咗我一聲

「嗨⋯」我有啲尷尬咁同佢打咗聲招呼




IG Link: https://www.instagram.com/nd_cotttoncandy/?hl=zh-tw