［愛情純愛］既然忘記唔到佢，不如試下中意我⋯？: 66. 只差一點就⋯！

「去沖涼先啦。」岑諾新對佢個妹講道，「陣間感冒。」

「嗯嗯！」嵐嵐掉低咗書包跑入喺岑諾新隔離嘅房

「我媽今日要番工。」岑諾新行番嚟對我講道，一提手就摸摸我頭，「唔洗怕。」

岑諾新推住我行入房，將房門虛掩着

「坐啦。」岑諾新坐低喺電腦椅上，然後指一指床邊示意我可以坐



我行到床邊坐低，斯文地拍埋雙腳、雙手放喺大腿上咁坐，感覺就好似影緊班相一樣，莫名其妙地有啲繃緊⋯

岑諾新打開手提電腦，我望住佢開YouTube播歌，一嚟就播一首《經過一些秋與冬》

                    經過一些秋與冬 回憶中 無端為妳動容

「一嚟就播失戀歌，你好掛住佢咩？」我嘅雙手㩒住喺床邊

「唔一定要掛住佢，先可以播呢首歌。」坐喺櫈上嘅岑諾新轉過嚟面向住我，佢嘅膝頭剛好掂住咗床邊，總有種比佢困住咗嘅感覺



岑諾新伸手將我搭咗喺膊頭上面嘅頭髮撥番去後面

「唔一定要掛住佢，即係都係有掛住啦～」我望住佢，擺出一副要嬲嘅模樣，「哼⋯」

「你嬲？」岑諾新淡淡一笑後問我

「冇。」我搖搖頭，「不過以後可能會⋯」

「可能？」岑諾新嘅手輕輕地牽住我嘅手，「多餘嘅字唔洗講。」



「你咁有信心呢兩個字係多餘？」我輕輕挑眉，「可能唔係多餘呢～」

「我覺得，呢兩個字一定係多餘。」岑諾新自信地講道

「宜家有得掛住佢就掛住佢啦～」我鬆開佢嘅手，將自己嘅手抽番出嚟，「不過，我都會掛住張景彥㗎啦～」

「唔準⋯！」岑諾新一下子將我嘅手捉番住

「咩唔準⋯？」我因佢嘅舉動嚇咗一嚇，不禁愕然地望住佢，「我又唔會話你知我有冇掛住佢嘅⋯你會在意㗎咩？」

「我女朋友掛住第二個男仔，你話我在唔在意？」岑諾新輕輕一笑反問我，上身微微傾前湊近我少少

我敢肯定佢唔在意，但因為想捉弄我而咁講

「咁你掛住我多啲，我咪掛住你多啲囉⋯」我微微一笑講道，用微笑嚟掩蓋我嘅害羞



「你又知我冇掛住你？」岑諾新用毫無破綻嘅表情同語氣問我，我都唔知道佢係用緊咩心情咩語氣對我講呢句說話

佢咁樣講，言下之意係佢有掛住我⋯？

點解佢總係咁輕易就可以撩撥我嘅心弦⋯？總可以咁輕易就令我心跳加速⋯？

佢有冇因為我而心跳加速過⋯？我唔知道，因為我睇唔穿佢⋯我唔知佢係認真定講笑⋯

岑諾新又湊近咗我少許，再咁樣湊近落去，感覺⋯要錫到⋯

我冇迴避佢，佢愈湊愈近，我地之間嘅距離變得好近，我可以感覺到佢呼吸時嘅氣息；眼見佢愈湊愈近，我輕輕地合起雙眼，心臟就嚟要跳出嚟

之前我地錫過兩、三次，但心跳從來都冇試過咁樣，心臟每跳動一下，我全身嘅神經便同時跳動一下，心臟嘅強烈跳動，令我連自己都感覺到手腕同頸上嘅脈搏都瘋狂地突突跳動



岑諾新一隻手牽住我嘅手，另一隻手放喺我㩒喺床邊嘅手旁，佢湊得愈近，我嘅呼吸愈淺愈快

「要錫到啦⋯」我喺心裏不禁有啲緊張地講道

佢湊得好近，真係，好近⋯！我嘅呼吸比啱啱更淺，因為我嘅鼻尖已經掂到佢嘅鼻尖⋯

我㩒喺床邊嘅手不禁用力地捉住被，我嘅心跳快到好似就嚟要心臟病發一樣⋯！

「叩叩—」

岑諾新嘅房門忽然傳嚟敲門聲，我嚇咗一嚇，雙肩一顫同時睜開眼；岑諾新似乎都比突如其來嘅敲門聲嚇咗一跳，佢望一望我之後連人帶櫈微微轉向房門

「做咩？」岑諾新問道，我探頭望向房門

「功課⋯唔識做。」嵐嵐推開房門，手上拎住功課簿



「我陣間出嚟。」岑諾新講道，嵐嵐便轉身行咗出去

岑諾新回頭望向我，我亦望住佢，不過我望佢嘅目光有啲飄忽，因為我嘅心仲未平伏到落嚟

岑諾新將張櫈推後，企起身行到我面前拉起我

「出去啦，嵐嵐要做功課。」岑諾新牽起我嘅手拉住我行

岑諾新坐企喺嵐嵐嘅身旁，我坐低喺佢嘅對面，望住佢拎起嵐嵐嘅功課睇

「呢度寫錯咗，tense錯。」岑諾新將作業放番喺嵐嵐嘅面前

我望住岑諾新教嵐嵐做功課時嗰副「稱職嘅哥哥」嘅模樣時不禁一笑，佢口講覺得有個妹妹麻煩，但佢都係會耐心咁教妹妹做功課



「笑咩？」岑諾新喺嵐嵐提起筆做緊功課嘅時候問我，佢發現咗我偷笑

「冇笑咩～」我笑了笑搖搖頭




IG Link: https://www.instagram.com/nd_cotttoncandy/?hl=zh-tw