嵐嵐拉咗岑諾新嘅手一下,岑諾新微微側身坐望向嵐嵐嘅功課簿,講咗兩句之後岑諾新抬眼望我

「仲有冇唔識?」岑諾新問道

「嗯,呢個。」嵐嵐指一指另一頁嘅一題

「上面嗰題串錯字。」岑諾新輕皺起眉頭,「岑諾嵐你上堂有冇聽書㗎?」

「有呀⋯」嵐嵐拎起擦膠將錯字擦去再重寫,「呢個係咩?」



我托住腮耷低頭睇手機,忽然有嘢喺枱底踢咗我一下,我抬頭望一望岑諾新,只見佢若無其事咁繼續教嵐嵐做功課

「突然間做咩踢我⋯」我喺心裏有啲無奈地講道

「做完。」嵐嵐將作業合上然後直接起身番房

我同岑諾新對望咗一眼,岑諾新企起身行到我身旁拉起我嘅隻,將我成個人拉起嚟

「你洗唔洗做功課?」岑諾新問我



「聽日有嘢交咩?」我又問番佢轉頭,「聽日好似⋯冇嘢要交。」

「哦。」岑諾新點一點頭,伸手推開房門

一踏入房門,我成個腦都係啱啱嘅事

「如果啱啱佢妹妹冇敲門嘅話,係唔係真係會錫到⋯」我喺心中默默地想

踏入岑諾新嘅睡房,我下意識望向全身鏡中嘅自己



著住男朋友嘅T-shirt、微濕嘅頭髮、比佢輕輕拉住嘅手,成件事突然間變得好曖昧

佢坐喺電腦枱前,我坐喺床邊,佢望住我,我又望住佢

「做咩⋯」我先忍唔住問道,「做咩望住我⋯」

「冇做咩,純粹想望下著住我嘅衫嘅你。」岑諾新平淡地講道,好似完全唔係一件令佢害羞嘅事一樣

「有、有咩好睇啫!」我下意識就將衫角拉一拉,「有咩特別啫⋯!」

「我第一個帶番嚟屋企嘅女仔就著住我嘅衫,特唔特別?」岑諾新好似想強調比我知我係佢第一個帶番嚟嘅女仔一樣

「做、做咩講到咁奇怪⋯!」我頓時開始臉紅耳熱起嚟,下意識迴避佢嘅目光

「你諗緊啲咩就真⋯」岑諾新輕輕地伸手拍咗我嘅額頭一下,「唔好諗奇怪嘢,我唔會對你做啲咩,先講明。」



我知道,我當然知道岑諾新唔會對我做啲咩過火嘅事,只係喺呢個狀況下我覺得有啲尷尬啫

我抬起頭望一望佢房,佢間房好整齊,書櫃上嘅嘢都放得好整齊,書枱整潔,男仔嚟講算係咁樣

「搵緊咩?」岑諾新見我四處張望便問道

「嗯?冇呀~好奇望下咋嘛~」我搖搖頭講道,然後有啲好奇咁望向佢,「係呢係呢~你仲有冇keep住同孫慧伶一齊嗰陣嘅嘢?」

「冇。」岑諾新聽到後有啲無奈,「之前掉晒啦。」

「全部?」我問道

「嗯。」岑諾新淡淡地回答,「之前咪同咗你講話我掉晒啲嘢。」



「哦,好啦~」我扁着嘴點點頭,其實唔係唔開心,扁嘴都只係下意識嘅舉動

「聽到我話掉晒啲嘢你好失望咁。」岑諾新連人帶櫈嚟到我面前面向我坐

「嗯?冇呀~」我搖搖頭,「只係好奇你仲有冇偷偷地keep起啲咩啫~」

「我係要偷偷地keep嘅話,你問咗我都唔會講⋯」岑諾新嘅手肘放喺櫈嘅扶手上,手托住頭,「更何況我冇偷偷地keep起,一早就掉晒。」

「你唔會想偶爾掛住佢嘅時候可以拎出嚟懷緬一下咩?」我開玩笑地問

「唔會,唔洗懷緬,同一間學校,番學都會見到。」岑諾新無奈地回答道

「所以係你有掛住佢嘅意思?」我微微側着頭望佢

「冇掛住呀⋯」岑諾新無奈地回答同時伸出手放喺我頭上,「我又唔係你。」



「我冇掛住張景彥⋯」我否認道,因為我最近真係冇,心中道:「我最近成日都同你一齊,邊有可能掛住佢⋯」

我拎起岑諾新隻手,岑諾新望住我,我一口用力地咬喺佢嘅手臂上

「呀嘶⋯!」岑諾新握緊拳頭,輕輕力推着我嘅膊頭,「痛、痛、痛⋯!」

我鬆開口,喺佢嘅左前臂上有一個牙印

「嘻嘻⋯」我抬頭望住岑諾新嘻嘻一笑

「咬我⋯」岑諾新無奈地講道,然後將沾喺牙印嘅口水抹走,伸出有我咬痕嘅手放到我手巴,輕輕捏住我兩邊嘅臉頰,「咁夠膽咬我?」

因為兩邊臉頰比佢輕輕捏住,所以微微嘟起咗嘴



「Mua~」我不禁想逗佢一下,送佢一個飛吻

岑諾新愣咗一下,然後默默地鬆開手,迴避我嘅目光

「耳仔紅晒啦⋯」我望住佢明明怕醜但係又扮冇事嘅模樣不禁一笑同時喺心中講道,「做咩咁可愛?」




IG Link: https://www.instagram.com/nd_cotttoncandy/?hl=zh-tw