［愛情純愛］既然忘記唔到佢，不如試下中意我⋯？: 68. 人細鬼大

「我去個廁所。」岑諾新講完之後連忙起身行出房

「叩叩—」有人敲咗門兩下，岑諾新咁快就去完廁所，「我入嚟啦～」

傳嚟嘅係嵐嵐嘅聲音，佢探頭望入嚟

「哥哥呢？」嵐嵐行入嚟，手上拎住包薯片

「岑諾新佢去咗廁所⋯」坐喺床邊嘅我講道



「哦⋯」嵐嵐點點頭，直接行到嚟岑諾新嘅書枱前，拉開櫃桶拎咗把鉸剪，將薯片嘅包裝袋上打橫剪開，「姐姐你食唔食？」

嵐嵐將薯片遞到我面前

「哦⋯好呀⋯！」我唔好意思拒絕便拎咗一塊

嵐嵐望一望向房門口，然後坐低喺岑諾新嘅電腦椅上面向住我坐

「姐姐你睇起嚟好好人。」嵐嵐忽然間講道，「同之前嗰個女仔唔同。」



「之前嗰個女仔⋯？」我心裏有啲疑惑，佢指嘅係孫慧伶？

「嗯，哥哥之前嘅女朋友，姐姐你唔知？嗰個女仔同你地著一樣嘅校服。」嵐嵐講嘅同時又回頭望一下房門

「我知呀～我識佢，但⋯你做咩突然間咁講嘅？」我唔明佢嘅意思，佢話我唔同孫慧伶嘅意思係咩

「我唔中意之前嗰個女仔⋯」嵐嵐細聲地講道，但都係比我聽到，然後嵐嵐又開口道：「姐姐你係真心中意哥哥㗎係唔係？如果唔係嘅話，唔好同哥哥一齊⋯！」

「你擔心你哥哥呀？」我微微一笑問道，感覺佢好緊張岑諾新，「放心啦，我係⋯真心同佢一齊⋯」



我都唔算講大話，因為我係真係想中意佢，所以⋯

「雖然感覺姐姐你好好人，但唔好令我哥哥唔開心。」嵐嵐一臉認真地對我講道，明明只係一個小學生，但佢卻好為岑諾新著想

可能係因為係兄妹嘅關係，而且佢好似特別中意岑諾新，所以都係正常嘅事嚟

房門緩緩被推開，睇嚟岑諾新去完廁所番嚟

「岑諾嵐你喺我房做咩？」岑諾新見到嵐嵐後問道

「同姐姐傾計唔得㗎咩？」嵐嵐望過去門口

「傾咩？」岑諾新行到過嚟，眉頭輕輕一皺，「仲要喺我房食薯片。」

「傾功課唔得嘅～」嵐嵐嘅雙腿前後晃着，岑諾新喺我隔離坐低



「你一個小學生同高中生傾咩功課？」岑諾新輕輕一笑，「專心上下堂先再講。」

「哼⋯哥哥你成日都係咁，小心孤獨終老。」嵐嵐講完之後飛快地拎埋包薯片跑出岑諾新間房

「人細鬼大⋯」岑諾新無奈地講道，然後坐番喺電腦椅上

「你啱啱係唔係比人詛咒你孤獨終老？」我不禁笑問道

「我先唔會⋯」岑諾新無奈地講道，「佢有冇同你講咩奇怪嘢？」

「冇呀⋯」我下意識搖搖頭，畢竟嵐嵐話佢唔中意孫慧伶，岑諾新知道嘅話可能會唔開心

「佢成日都講埋啲奇怪嘢⋯」岑諾新無奈地搖搖頭



「嘻⋯唔係呀～」我笑咗一笑

嵐嵐好關心你就係啦～岑諾新你一個高中生，要個作為小學生嘅妹妹嚟擔心你，你好唔好意思呀？

我眼尾瞄到放咗喺電腦後面嘅一個盒，好熟口面嘅盒

「個盒仲喺度嘅？朱古力仲未食晒呀？」我企起身拎起個盒，打開盒蓋，「食晒都唔掉？」

「哦，因為第一次收朱古力。」岑諾新抬頭望住我講道，「所以冇掉。」

「哦～」我將個盒放番低喺原位，「Keep好佢呀要～」

我望向窗外，外面嘅天空光咗，呀⋯停雨啦⋯

⋯



我番到屋企後第一時間係去沖涼，然後將校服掉晒落洗衣機，鞋放咗喺廚房吹乾

「呼～終於可以沖涼啦～」淋住暖但偏熱嘅水嘅我不禁感嘆道

我沖完涼洗完頭後行出廳坐喺梳化上，總覺得喺我身上仲有殘留嘅氣味，係岑諾新嗰陣味⋯

「係喎，差啲唔記得⋯！」我起身行入房拎起手機，send咗個「到屋企」嘅message比岑諾新

今日落雨，所以我叫佢唔洗送我番嚟，而且佢都已經沖咗涼，就無謂要佢又再出門

所以喺我走嘅時候，岑諾新叫我番到屋企之後同佢講一聲

岑諾新：咁遲先番到屋企？



「唔係呀～一番到嚟即刻沖咗個涼，所以先遲咗」

岑諾新：Okay

X⋯X⋯X

我放低電話，望住喺我左手前臂上嘅牙印，腦海中自然地浮現出蔣倩盈

「姐姐你係真心中意哥哥㗎係唔係？」

「放心啦，我係⋯真心同佢一齊⋯」

當時我，就企咗喺房門口⋯




IG Link: https://www.instagram.com/nd_cotttoncandy/?hl=zh-tw