［愛情純愛］既然忘記唔到佢，不如試下中意我⋯？: 69. 她很好

我其實一早就喺廁所出咗嚟，但聽到佢兩個講嘢，又忍唔住想偷聽一下佢地講緊啲咩

點知就比我聽到蔣倩盈講嘅呢一句⋯

明明我知道，蔣倩盈仲未完全中意我，我感覺到佢對我嘅好感有上升，但我知道未到嗰種中意嘅程度

「但點解我會有啲開心⋯」我不禁問自己

喺聽到蔣倩盈咁講嘅一刻，企喺門外嘅我嘅心臟頓時緊縮咗一下⋯



我問蔣倩盈，嵐嵐有冇同佢講啲咩，佢話冇，但就喺佢答我嘅時候，佢猶疑咗一下

其實再前啲嘅對話，我都有聽到⋯

嵐嵐以前的確見過我同孫慧伶一齊，佢知道我同孫慧伶嘅關係，而我亦知道，嵐嵐唔太中意孫慧伶，由嵐嵐嘅一個舉動就知

嵐嵐知道拍拖係咩一回事，所以喺佢嘅認知中，知道孫慧伶之前係我女朋友，而佢之前一直只會叫孫慧伶做「嗰個女仔」

但嵐嵐佢喺見到蔣倩盈嘅時候，直接就叫佢「姐姐」，呢個明顯嘅差別待遇⋯



「不過嵐嵐中意蔣倩盈都係一件好事嚟。」我不禁諗道，「可能會係一個好嘅助攻⋯」

宜家嘅我對蔣倩盈，的確⋯感覺比之前強烈咗好多

特別係喺佢笑起嚟嘅時候⋯

「哥哥，你咁快就比姐姐走啦？」嵐嵐攬住佢最中意嘅兔仔公仔行入嚟我房，「你唔留姐姐喺度食飯？」

「你好似好中意佢咁喎～」我望住嵐嵐講道



「嗯嗯！」嵐嵐坐喺我嘅床上，「姐姐佢幾好呀～」

「睇得出。」我答咗個無棱兩可嘅答案，反正嵐嵐嘅年齡仲細，唔會深究太多

X⋯X⋯X

我坐喺梳化上發呆，我媽喺廚房煮緊飯

通常我地都食得好簡單，得兩個人，唔洗食咁多

「7點37⋯」我嘅指尖輕敲咗手機螢幕兩下，螢幕亮起

最近我好似特別期待番學⋯唔知道係唔係因為最近過得太開心嘅關係呢⋯

⋯



今日已經係星期四，咁樣又嚟到一個星期嘅尾

我同岑諾新食完飯番到嚟學校，最近我地都多咗一齊食飯，一星期有兩、三日都一齊食飯

「陣間係咩堂？」我踏上梯級嘅同時問道

「LS。」岑諾新回答

「呀⋯又上LS堂，我真係唔中意上LS堂⋯」我深深地嘆咗一口氣，「一啲都唔有趣⋯」

我踏上最後一級上到去平台位置，但呢個時候有人從上面匆匆忙忙咁落樓梯，佢仲要同我制喺同一邊

「嘩⋯！」「呀⋯！」



嗰個女仔直接就撞咗上嚟我度，佢手上拎住嘅簿成疊跌咗落地散開咗，我因為比佢撞咗一撞重心唔穩便向後行咗兩步，岑諾新提手捉住我嘅手腕扶住咗我

我呢一下先睇清楚，呢個撞落嚟嘅人，係孫慧伶⋯

「對、對唔住呀⋯！」佢同我道歉，然後蹲低執番啲簿

「唔緊要。」我蹲低幫佢手執番啲簿然後遞比佢，「嗱。」

「唔該～」孫慧伶對我笑咗一笑，然後攬住疊簿企起身，我讓開少少比佢過，佢匆忙地落樓梯去交簿

我望向岑諾新，岑諾新見到我望住佢，有啲無奈

「望我做咩⋯」岑諾新無奈地問道

「冇咩～」我笑咗一笑，然後踏上樓梯，行喺岑諾新嘅斜前方，我回頭望向岑諾新，佢無奈地笑咗一笑



番到課室後，我行到去詠妍嘅坐位，樂恩同埋希童都坐喺詠妍隔離

「你番嚟啦～」詠妍抬頭望住企喺佢正前方嘅我

「係呀⋯點呀⋯」我無奈地拉開詠妍前面嘅座位嘅櫈坐低

「你地最近關係好好啦～成日都一齊啦～唔洗要朋友啦～」詠妍毫不客氣地挪揄我

「咩呀～都要你地呀！」我笑了笑，「聽日係Happy Friday嘛～咪同你地食飯囉～」我忍住笑意講道

佢地三個好似好興奮咁睇緊手機，睇緊同一部手機，我探頭望咗一眼，佢地又喺度睇靚仔

「又睇靚仔唔預我⋯！」我微微鼓起兩泡腮



「比你睇囉～」詠妍將手機放到枱上，「其實你睇岑諾新咪夠，洗咩同我地一齊睇靚仔？」

「噓⋯」我將手指輕輕抵喺唇前，耷低頭望住詠妍嘅手機

「倩盈倩盈！呢個咪係你中意嗰類！？」希童拍拍我嘅手，指住詠妍嘅手機螢幕，「係有腹肌嘅嗰種霸道嘅嗰種！」




IG Link: https://www.instagram.com/nd_cotttoncandy/?hl=zh-tw