［愛情純愛］既然忘記唔到佢，不如試下中意我⋯？: 83. 接二連三

我不禁打咗個冷顫，心臟都好似要停頓一樣緊縮咗一下，低沉嘅磁性聲線⋯太犯規⋯！

我一下子將手抽回，向後行咗兩步，臉頰滾燙到我覺得成個人都散發着熱力

我偷偷地抬眼望向岑諾新，我嘅心跳得好快，強而有力嘅跳動，令我全身都微微顫抖着

「我拎埋書包就走得啦⋯！」我頓時轉身朝自己嘅座位行去，想暫時逃離現場

我企喺自己嘅座位前背向住岑諾新嘅方向，輕呼一口氣



「啱啱我隻手⋯好似唔受控制一樣⋯」我喺心中講道，不禁低頭望住搭咗喺書包上嘅手

X⋯X⋯X

我企喺原地，大腦好似仲未運作到發生咗咩事一樣

「嚇死我⋯」我提起手，指尖輕碰到自己嘅喉核

我緩緩地望向蔣倩盈嘅方向，佢背住我呆企喺自己嘅書包前



我想講⋯我嘅心臟好似就嚟要直接撞碎我嘅胸骨跳出嚟一樣，嗰種力度，嗰種震動⋯我真係比佢啱啱嘅舉動嚇咗一跳

我宜家唔敢行過去拍佢，因為我對腳好似痴咗喺地下一樣郁都唔郁，而且，我感覺到我宜家嘅臉頰好似裝咗個發熱線一樣

「呼⋯」我輕呼一口氣，飲咗喺水定一定驚，我覺得連我嘅喉嚨都發緊熱

我聽到蔣倩盈嗰邊有聲，我頓時望過去，見到蔣倩盈孭起書包，我伸手拎起勾咗喺枱邊嘅書包，將書包放到枱上

「蔣倩盈⋯」我小心翼翼地叫咗佢一聲，佢頓時整個人轉身面向我，「行未呀？」



「嗯⋯！行啦！」蔣倩盈露出一個尷尬而不失禮貌嘅微笑，「行啦行啦～」

蔣倩盈今次直接喺自己嘅位置行番出去，朝課室門口行去，平時佢都會先行過嚟我嘅位；蔣倩盈同我之間保持咗一隻手臂嘅距離，什至唔係同我並排行，行前咗少少

「今日連手都唔拖⋯」我輕輕握一下拳，視線不自覺地就落喺佢纖細嘅手上

我悄悄地伸手掂咗佢隻手一下打算拖佢，但佢竟然縮咗一下手，仲默默地加快咗腳步，行得再前咗

「呀⋯！」蔣倩盈叫咗一聲，因為我邁步行到佢背後，一下子拉住佢嘅書包掛帶，佢回頭望向我

「行咁快做咩？唔等埋我。」我仍然拉住佢嘅書包掛帶問道，「你好趕時間咩？」

「咩呀？我行喺你前少少咋嘛！邊有唔等你啫！」蔣倩盈望住我講道，我見到佢嘅臉頰泛起淡淡嘅紅霞，「而且陣間有車咁點算？我怕走咗班車嘛⋯」

我同佢企喺巴士站等車，蔣倩盈企得特別唔自在，望向邊都好，就係唔望我



見佢一臉害羞咁移開視線，我心裏突然間出咗個壞主意，想輕輕地捉弄佢一下

我喺呢個時候伸手，指尖輕輕地沿住佢嘅手腕內側向下滑，掃過佢嘅手心，用指腹撐開佢嘅指縫將佢嘅手輕扣住喺我嘅手中

我呢個位都可以睇到佢嘅臉頰比啱啱更紅，耳根都紅起嚟，我頓時不禁一笑

「你啱啱好勇敢㗎。」我微微低頭喺蔣倩盈嘅耳邊講道

「我、我邊有呀⋯！」蔣倩盈紅着臉望向我，「我先冇勇敢啦！」

蔣倩盈想甩開我隻手，佢連手心都出緊汗，我鬆開佢隻手，佢撇開臉後雙手捧住臉頰望住遠方等巴士嚟

上到車之後，蔣倩盈一直都望住車窗外面冇望過我，我故意湊近佢，同佢一齊望向窗外



「出面有咩咁吸引你睇？」我問道，「你個Ex喺出面咩？」

「咩呀？我都唔係望佢⋯！」蔣倩盈頓時回頭望向我

佢一回頭嘅瞬間，我同佢都因為愕然而怔了一怔，我啱啱都冇留意到原來我地之間嘅距離，係咁近⋯

X⋯X⋯X

「你哄咁埋做咩⋯」我回神過來後輕輕地將佢推開

「冇⋯」岑諾新坐番好個人，然後搖搖頭

「嚇死人⋯」我喺心中講道，望一望向外面後便收回視線，「突然間哄到咁埋，嚇邊個⋯」

岑諾新忽然提手，幫我將髮絲繞到耳背，我望咗佢一眼後瞬間又望向其他地方



「頭髮好長⋯」岑諾新細聲地講道，「如果夏天出街唔記得帶髮圈應該會好麻煩。」

「嗯⋯去到夏天嘅話，出街點都要紮一下，如果唔係會好熱⋯」我下意識地摸一下自己嘅馬尾，「雖然已經留到好長好難打理，但我唔捨得剪嘛～」

「髮圈，你有冇多？」岑諾新突然問道，手指勾住我戴喺手腕上嘅髮圈

「做咩咁問？你想要？」我不禁笑咗一笑同時㩒住佢勾住髮圈嘅手，「嵐嵐應該有好多呀～」

「唔要嵐嵐嘅髮圈，要你嘅髮圈。」岑諾新望一望我後講道

佢知唔知道要女仔嘅髮圈嘅意思係咩⋯？一個男仔無端端帶住女仔嘅髮圈喺身上，係宣示主權，表明自己唔係單身嘅意思呀⋯

「但⋯我得番手上呢個⋯」我提手勾咗套喺自己手上嘅髮圈一下，「如果冇咗呢個髮圈嘅話，我就冇後備髮圈啦⋯」






IG Link: https://www.instagram.com/nd_cotttoncandy/?hl=zh-tw