「我應唔應該問出口⋯」我抬眼望向坐喺我對面嘅蔣倩盈

蔣倩盈就好似冇事發生過一樣,一人安靜地睇手機

見到佢愈平靜,我心裏卻愈係諗起孫慧伶講嘅嘢,心裏就愈係好似有嘢壓住一樣唔舒服

「蔣倩盈⋯」我終究都係忍唔住叫咗佢一聲,蔣倩盈抬頭望向我,「上星期五,你夜晚係唔係一個人去行海傍⋯?」

「吓⋯?」蔣倩盈愕一愕然,「你做咩突然間咁問嘅?」



「嗰日你係一個人去行海傍,定有人同你一齊⋯?」我不禁吞一啖口水,心跳開始變快起嚟

蔣倩盈定睛望住我,卻冇開口講任何嘢

「你嗰日係唔係同張景彥一齊?」我直接問道,唔想轉彎抹角,「係唔係見到佢⋯?」

「嗯⋯係見到佢。」蔣倩盈怔一怔後回答道

佢果然,係同張景彥一齊行海傍⋯所以張景彥send比孫慧伶嘅嗰張相,先會同蔣倩盈po喺story嗰張相咁似⋯



「我同佢只係講咗兩句⋯」蔣倩盈緩緩地開口講道

「嗯⋯」我輕聲地嗯一聲

聽到佢親口承認,我心裏頓時覺得唔舒服⋯係有啲嬲,但係佢地都只係講咗兩句,蔣倩盈亦冇刻意隱瞞嘅打算,我問佢,佢都講咗比我知

X⋯X⋯X

我感覺到,氣氛明顯地改變咗⋯喺我承認當晚見到張景彥,同佢講咗兩句之後,岑諾新嘅面色頓時一沉



「同佢保持距離。」岑諾新喺此時緩緩開口講道,冷漠嘅聲線直打進我嘅心房

「我同佢只係普通朋友,冇其他關係⋯」我細聲地講道,岑諾新抬眼望我一眼,眼神裏全是不滿,我唯有乖乖地回答:「知啦⋯」

我唔知點解岑諾新會突然間問起星期五嘅事,我有po story出嚟呀⋯佢點解會知道我撞到張景彥⋯?

「今晚月亮好靚,send比孫慧伶睇下~」

我諗起張景彥喺嗰晚send咗張相比孫慧伶睇,啱啱上過X2嘅堂⋯係孫慧伶講比岑諾新知嘅⋯?

難怪岑諾新喺上完堂番嚟之後就一直心不在焉,原來因為孫慧伶同佢講咗

啱啱問我嘅時候,完全就係懷疑緊我係唔係對佢講大話一樣嘅態度,都唔知孫慧伶講咗啲咩,岑諾新要懷疑我⋯

我同張景彥就真係咁啱撞到,我冇講大話



孫慧伶到底同岑諾新講咗啲咩?岑諾新都太信任孫慧伶啦掛⋯講咗一句就懷疑我啦⋯

我同岑諾新最終都係各自安靜地耷低頭食嘢,我地冇再提起呢件事,亦冇再講其他嘢

直至到我地食完飯行出餐廳,岑諾新先再開口同我講嘢

「蔣倩盈,你記住我啱啱講嘅嘢⋯」岑諾新捉住我隻手講道,「你有男朋友㗎啦。」

「知啦⋯」我無奈地點點頭,「醋王⋯你放心就係啦⋯」

我其實都想開口叫佢同孫慧伶保持距離,但宜家佢同孫慧伶一齊做project,若然我因為咁而提出呢估要求,好似顯得我唔信佢一樣

所以最終我都係咩都冇講出口,只係默默地將所有想講嘅嘢都吞番落去⋯





放學嘅時候,我同岑諾新一齊番屋企,我地就好似平時一樣

岑諾新將我送到番去屋企樓下,佢好似知道我準備鬆開佢隻手一樣,佢用力地握住我隻手

「做咩⋯?」我抬眼望咗佢一眼,然後朝佢行近咗一步,左手搭到佢嘅腰上

岑諾新一聲不吭地將我攬到佢嘅懷中,我冇愕然,亦冇推開佢,只係由得佢攬住我

我抬頭望向岑諾新,岑諾新耷低頭喺我嘅唇上輕輕一吻,佢伸手托喺我下巴,掐住我兩邊臉頰

「唔準同佢咁熟⋯」佢低聲對我講道,「知唔知?」

「嗯⋯」我都係乖乖點頭答應佢,「知啦~」



我踮起腳尖,喺佢嘅頸上偷吻一下,佢頓時紅了臉頰

「你特登嘅⋯」岑諾新紅了臉頰,連講嘢嘅聲線都變得有啲羞澀

「冇呀~」我笑咗一笑

「星期四放學之後留低,project嗰度。」岑諾新提道

「你有同我講呀~咁我放學等埋你啦~」我喺佢嘅頸上蹭了蹭

「嗯,好呀。」佢微微縮起膊頭

「我番去啦~」我先一步鬆開佢嘅手,向後踏咗一步,轉身朝大堂嘅門口行去



喺轉身背向岑諾新嘅一刻,我嘅笑容不自覺地塌咗落嚟⋯




IG Link: https://www.instagram.com/nd_cotttoncandy/?hl=zh-t