［愛情純愛］既然忘記唔到佢，不如試下中意我⋯？: 142. 下意識

星期四

我同岑諾新就好似平時一樣相處，雖然我帶着少許心事同佢一齊，但我地都係同平時一樣講笑傾計，基本都係小考驗啫，還是可以的

「你陣間係唔係同佢地一齊做project？」我行到岑諾新嘅座位，企喺佢身旁問道

「係呀，你喺課室等我？」岑諾新微微點頭

「嗯嗯！我喺課室等你啦～」我對岑諾新笑一笑，「不過宜家去買個嘢食先～」



我拎住銀包行出課室，後面傳嚟「躂、躂」嘅腳步聲，我一回頭就見到岑諾新追上嚟

「你唔係去做projec咩？」我輕輕挑眉望住岑諾新，「追上嚟做咩？」

「買嘢食呀～Project嗰邊4點先開始。」岑諾新伸手搭到我嘅膊頭上

「喂呀～唔準拎我膊頭嚟做扶手呀！」我沒好氣地笑着將佢搭喺我膊頭上嘅手推開

「邊個叫你矮過我？」岑諾新隻手轉眼又搭番上嚟



「哼⋯」因為佢講嘅係事實，我一定講唔過佢，我只好輕哼一聲，「你明恰我啫⋯」

「唔恰你恰邊個？」岑諾新理直氣壯地講道，佢伸手輕輕地捏咗我嘅臉頰一下

我望向佢，微微鼓起兩泡腮嚟表達我嘅不滿

此時張景彥正面行過嚟，佢貼住課室門窗嗰邊行，岑諾新輕輕地拉咗我一下，比佢突然一拉，搞到我企唔穩，成個人都撞落岑諾新度

岑諾新不以為然地望一望我，佢伸手捉住我嘅手腕，一直用力將我朝佢嗰邊拉，我當咩都唔知一樣行喺佢身旁



「醋王真不愧係醋王⋯」我喺心裏默默地吐糟道

我同岑諾新行到落去小食部，點知卻見到啱啱買完嘢食嘅孫慧伶朝我地迎面行過嚟

「新！」孫慧伶叫咗岑諾新一聲，然後朝岑諾新急步行過嚟，「陣間我地改咗喺上面lab，阿sir話佢今日同聽日，仲有下星期都有book到lab，所以我地改咗去lab做。」

「嗯，知啦。」岑諾新點一點頭

「小心小心！」

忽然喺身後傳嚟一把伴隨住鐵車聲嘅粗獷嘅男人聲，我回頭望去，見到一個送貨工人推住一架運貨車行緊過嚟，應該係小食部嘅貨嚟

「阿妹小心呀！」送貨工人朝企正喺運貨車前嘅孫慧伶講道

孫慧伶向岑諾新嘅方向行咗一步，但我嘅心就喺同一刻「咯噔」一聲



我眼尾瞄到喺孫慧伶朝岑諾新方向行一步，運貨車喺佢地身旁走過嘅時候，岑諾新嘅手微微抬起護住孫慧伶似的

「怕孫慧伶撞到嗎⋯？」我喺心裏問道

原來有啲事，即使已經過去咗，但潛意識仍然會令你主動做出反射動作

「我去買嘢食。」我抬頭望向岑諾新，露出同平時無異嘅笑容，然後直接行離佢嘅身旁

喺行走嘅一瞬間，我將笑容收起，難受嘅感覺喺心底蔓延

佢心裏其實仲有孫慧伶嘅位置吧⋯如果真係冇佢嘅位置，佢又點會下意識有呢個動作⋯？

我淨係買咗支嘢飲就走，岑諾新拎住嘢飲直接去lab做project，我拎住嘢飲番課室



我喺課室Hea咗一陣之後行出走廊，企喺矮牆前面睇手機，反正都已經係放學時間，我喺度睇手機都唔緊要

「躂、躂、躂、躂」忽然從左邊傳嚟腳步聲，我望過去就見到張景彥行緊過嚟

「你喺度嘅？」「你喺度嘅⋯？」

我同佢幾乎係同時開口問對方

「等孫慧伶？」我問道

「嗯，你應該都係等緊岑諾新啦～」張景彥笑一笑道

我同張景彥一同企喺矮牆前，我同佢之間相隔咗10cm

「嗯。」我點點頭，然後耷低頭睇手機



我同佢企喺走廊，無聊地吹下水講下大家上堂啲嘢，講下學業上嘅事，講下上邊個Miss或者阿sir嘅堂好悶好搞笑，就好似普通朋友一樣傾計

「你咁樣同我傾計，唔怕咩？」我喺講咗一陣嘢之後忽然間腦海中閃出呢個問題，然後就問出口

「嗯？」張景彥望一望我，「怕？」

我冇出聲講啲咩，我同佢都靜咗落嚟，張景彥自己靈機一動，明白我想講啲咩

佢輕輕一笑，望向遠方：「唔怕，佢⋯唔會點樣。」

「你唔怕佢嬲你？」我不禁一笑問道

「佢唔會嬲，一嚟佢對自己好有自信，二嚟佢對我未在乎呢個地步⋯」張景彥微微耷低頭苦笑着，「佢對我，就係咁樣⋯」



聽起嚟，就好似⋯有弦外之音一樣⋯




IG Link: https://www.instagram.com/nd_cotttoncandy/?hl=zh-t