我不禁定睛望住佢,心裏大概估到佢呢句說話嘅意思,但我又唔敢肯定佢係唔係真係咁嘅意思

「你多心啫。」我比咗一個模棱兩可嘅答案佢

「我同孫慧伶,好難講⋯」張景彥緩緩搖頭,「雖然成日都話當局者迷,旁觀者清,但有時候,真係當局者先會清楚。」

張景彥一臉認真地講道,臉上嘅笑容逐漸消失,什至連微風吹過嘅時候,都冇將佢嘅憂愁一屏帶走

「一個人嘅決定,有時會影響好多人,唔係只影響一個人咁簡單。」張景彥又講道,「有時就係⋯睇到嘅嘢同你所想像嘅唔一樣,因為人會講大話,人會偽裝,但心唔會⋯邊個都好,都唔會做違抗心意嘅事⋯」



張景彥做咩突然間開始喺度講大道理⋯?今日佢做咩,好似特別多嘢愁咁⋯?

但張景彥咁樣嘅一句,我諗起啱啱張景彥提手嘅動作⋯

「可能真係你諗多咗,孫慧伶未必真係咁呢~」我下意識先安慰佢講道

「好難。」張景彥輕輕一笑,「同咗孫慧伶一齊之後,我慢慢發現,其實佢同我一齊,唔係因為中意我⋯佢要嘅係一份新鮮感。」

我怔了一怔,新鮮感呀⋯孫慧伶會唔會因為新鮮感冇咗而同張景彥分手⋯?我心裏不禁有啲擔心



「而我好似,對佢都冇嗰份中意,因為發現佢原來同我想像中好唔一樣⋯」張景彥忽然間又講道

張景彥望住我,我望住佢嘅時候覺得佢好似接住落嚟仲有嘢要講一樣

「或者佢發現佢中意嘅人唔係我⋯」張景彥眺望遠方嘅眼神,就好似明白咗一切一樣,「有時真係要失去咗,先會知道⋯」

我聽到張景彥突然嘅一句,我不禁一怔,張景彥嘅意思係⋯?

張景彥望向我,微微一笑,我喺心裏猜測緊佢微笑背後嘅意思



「我冇怪佢,佢冇做錯。」張景彥自顧自地講道,「有啲心事收咗喺心底,你唔打開佢,你唔會再諗起,但萬一你去打開,或者會再次沉迷落去⋯」

「你今日講嘅嘢,都好奇怪⋯」我嘅眉頭輕輕一皺,「你到底想講啲咩⋯?」

「我想講,中意一樣嘢係冇錯,畢竟最後嘅結果都唔係單方面擁有選擇權。」張景彥又講道,又再為我增加一個問號,「一隻手掌,拍唔響。」

我定睛地望住張景彥,我唔敢肯定我嘅想法係啱定錯,但我卻又好似可以確定張景彥講緊啲咩

如果孫慧伶番轉頭,主動搵番岑諾新,岑諾新會點揀⋯?佢會接受孫慧伶?定係佢會拒絕佢⋯?

的確係一隻手掌拍唔響,但如果佢地大家都有咁嘅想法,咁成件事就變成雙向⋯

中意一個人冇錯⋯選擇權唔係只喺一個人嘅手上,若然係單向,我可以隻眼開隻眼閉,但若然係雙向,咁我就冇存在嘅意思⋯

我明白張景彥嘅意思⋯真係明⋯



「倩盈,你好好,對我嚟講。」張景彥望住我真誠地講道,「真係。」

「嗯⋯」我遲疑地嗯一聲回答,「你覺得,孫慧伶係一個點嘅人⋯」

「自信係佢最大嘅優點,佢自信嘅一面,會令人心醉⋯」張景彥托住下巴,瞄咗我一眼,輕輕一笑道,「自信、主動、吸引,就係咁。」

我選擇咗沉默⋯岑諾新嘅心裏,會唔會其實,都中意孫慧伶⋯?我,係唔係會輸⋯?

「我地係朋友,我地一齊過,我亦了解你⋯」張景彥對我講道,講咗一半,佢又停咗冇講落去,過咗兩秒先再緩緩開口,「記住,一隻手掌拍唔響。」

我明白張景彥嘅意思,我知道佢想講啲咩,只要岑諾新唔主動,唔受孫慧伶嗰套,一切都唔會變得更差⋯

「蔣倩盈。」張景彥叫咗我一聲,我將視線移向佢嘅時候,見到佢輕皺着眉頭,「自信啲,你唔夠自信。」



我抬眼望向張景彥,我遲遲都冇回答

「叮噹叮噹,叮噹叮噹~」

5點嘅鐘聲響起,佢地應該都差唔多走啦~

「自信啲啦,真係。」張景彥又再一次對我講道,「你自信嘅時候,最好睇。」

「嗯⋯」我點點頭,張景彥伸手輕輕地拍一下我嘅額頭

「做咩打我⋯?」我伸手掩住額頭,抬眼望向張景彥

張景彥嘅臉上掛着一抹笑意,我嘅嘴角微微上揚,無奈地笑咗一笑

我留意到張景彥嘅眼神落喺我身後,我回頭望向後方,見到岑諾新從後梯嗰邊行過嚟,臉色難睇到極點⋯



我同張景彥下意識對望咗一眼,我轉身行入課室拎書包

我孭起書包靠坐喺枱邊等岑諾新,岑諾新冇第一時間行埋位拎書包,反而行到我面前,我知佢嬲,但我又冇做錯啲咩,我同張景彥都係講咗兩句,又冇點樣

「蔣倩盈。」岑諾新壓低聲線叫咗我一聲,佢直勾勾地盯着我,「你應承咗我咩?」

「我係應承咗同佢保持距離。」我理直氣壯地講道,「但我亦講咗我同佢只係普通朋友,啱啱我同佢講咗兩句咋嘛,又冇做啲咩。」




IG Link: https://www.instagram.com/nd_cotttoncandy/?hl=zh-t