［愛情純愛］既然忘記唔到佢，不如試下中意我⋯？: 144. 疲倦的日子

「講兩句仲唔夠？佢有女朋友，仲同你做朋友？」岑諾新好似壓抑着怒氣一樣

「我同佢又唔係做啲咩唔見得光嘅事！我同佢點解就唔可以做朋友？」我反駁道，「我地又冇點樣。」

「佢啱啱拍你額頭，你當我睇唔到？」岑諾新皺起眉頭，怒氣沖沖地講道，「朋友會咁樣㗎咩？」

我唔想喺呢度同佢嘈⋯我真係唔想⋯

「對唔住。」我緩緩開口講道，「冇下次。」



我選擇咗低頭認錯，我實在唔想同佢喺呢度嘈落去，亦冇心情同佢嘈落去⋯佢喺樓下嘅時候，係點樣護住孫慧伶⋯？嗰一刻佢有冇諗過我係佢女朋友，佢應該要同孫慧伶保持距離⋯？

岑諾新，到底係邊個冇好好咁保持距離⋯？

「你地下次幾時再做project⋯？」我緩緩地開口問道

「下星期一。」岑諾新冷淡地回答我一聲

岑諾新孭起書包就行，我追上佢嘅步伐行喺佢身旁，我輕輕地拉住佢隻手，但我感覺到佢仲未消氣



喺番到屋企樓下嘅時候，岑諾新先一步將我隻手鬆開

「唔⋯」我微微耷低頭，雙手拉住佢嘅手，抬眼偷望佢一眼，「冇下次啦⋯我同佢真係普通朋友⋯」

「嗯。」岑諾新淡然地嗯咗一聲

我知道佢嬲，我亦在意佢同孫慧伶一齊做project，但我唔想同佢冷戰⋯我唔希望我地會冷戰⋯

我微微踮起腳尖，喺佢嘅臉頰上錫咗一啖，然後微微側着頭望佢



「仲嬲唔嬲？」我扁起嘴問道，「唔嬲我嘛～」

岑諾新淡淡地瞄我一眼，然後直接伸手掐住我兩邊臉頰，一手將我拉到佢嘅懷中；佢直接耷低頭準確無誤地吻喺我嘅唇上

過咗好一會，岑諾新先將我鬆開

「冇下次，你自己講。」岑諾新對我講道，「同佢保持距離。」

「知啦知啦～」我帶着滾燙嘅臉頰抬眼望佢講道

再攬咗一下之後，佢先將我緩緩鬆開，我轉身朝大堂行去

「今日又係考驗我同佢嘅一日⋯」我喺心中感覺到疲倦

⋯



夜晚

我灘喺床上準備瞓覺，但睡意完全唔喺線上，我仲係好精神

可能係因為滿腦子都係今日張景彥同我講嘅嘢

「因為人會講大話，人會偽裝，但心唔會⋯邊個都好，都唔會做違抗心意嘅事⋯」

一諗起張景彥講嘅呢句，我就會諗起今日喺小食部嘅時候，岑諾新嘅下意識舉動⋯

佢嘅動作係幾咁自然，就好似唔需要經過思考就做出嚟嘅舉動一樣，好似⋯一個習慣一樣⋯

當下係唔係岑諾新都冇發現，佢自己喺運貨車經過時護住孫慧伶嘅動作係幾咁自然⋯？



嗰一刻，好似我先係嗰個外人⋯我心入面嘅難受，根本就冇得形容出嚟⋯

以前，就算張景彥真係好中意孫慧伶，佢知道我都知道都好，佢都冇試過咁樣做⋯至少當住我面嘅時候，佢冇咁樣做過⋯

但今日岑諾新卻喺我面前做出一個護住前任嘅舉動⋯嗰一刻佢有冇記得，其實我先係佢嘅女朋友⋯？

岑諾新護住孫慧伶嘅舉動，係唔係代表佢心入面仲有孫慧伶嘅位置⋯？

其實佢⋯冇忘記過孫慧伶係唔係⋯？

岑諾新會唔會因為今次同孫慧伶一齊做project，見面嘅時間多咗，話題多咗，而慢慢咁中意番孫慧伶⋯？

「唉⋯」我默默地嘆咗一口氣

如果佢真係中意番孫慧伶，咁係唔係代表我就冇存在喺佢身邊嘅必要⋯？



我都唔知道⋯我同岑諾新之間會變成點⋯

見到佢對孫慧伶嘅自然舉動，我心裏不是味兒⋯因為佢就算同孫慧伶分咗手，佢都保留住呢個習慣⋯

「Di⋯Di⋯！」放喺枱面嘅手機震動咗兩下，我懶洋洋地伸手摸着枱面，搵緊手機嘅位置

我拎起手機，見到係岑諾新send message比我，我拎住手機定格咗一秒，然後就將手機放番低

今次應該係我第一次，喺見到岑諾新嘅message後望咗一眼就算

對於宜家滿腦子都係岑諾新同孫慧伶嘅我嚟講，我根本完全冇心情覆岑諾新任何事⋯

⋯



「你琴晚做咩唔覆機？」岑諾新一臉疑惑地問我，「瞓咗？」

「嗯，太攰啦，所以就早咗瞓⋯」我靠喺佢嘅懷中，不動聲色地講咗一個大話，「今朝先睇到⋯」

「嗱。」岑諾新忽然間從褲袋中拎咗粒糖出嚟遞到我面前，「比你。」

「做咩突然間有糖嘅？」我伸手接過粒糖，抬頭望向佢笑問道

「變出嚟。」岑諾新一本正經地講道，佢靜咗一靜後，伸手摸摸我嘅後腦勺，「食咗糖，唔好唔開心啦⋯」

我喺心裏一怔，岑諾新察覺到我唔開心⋯？




IG Link: https://www.instagram.com/nd_cotttoncandy/?hl=zh-t