「perm加haircut,總共1350蚊丫」


「好呀」

阿梅搶先拎出荷包比錢


「咦你地都幾熟喎又會佢幫你比埋錢既!」vincent邊收住錢笑道







「佢尋日幫左我個大忙,我咪請佢剪頭髮囉!哈哈,我下次又搵你試下剪先!」

虧阿梅仲笑得出,嘔到我成頭都係!



「好,咁下次見啦」







離開salon之後,阿梅拎出手機對我影左幾幅相

「阿梅,你做咩呀?」


「咁靚仔,緊係影定幾張相留念啦!」
阿梅笑道:「最衰你唔夠高啦,如果唔係我依家就想溝你,哈哈!」






「咪玩啦....」

就算我係毒撚都知,阿梅呢啲係講笑




「咔!」


「我返黎啦!各位觀眾!」

阿梅拉住我入暗hall:「隆重介紹!暗hall男神,新地!!」






「嘩!!!!!!」

全個暗hall既人一見到我,即使大叫


「跟豪哥去剪真係唔同啲喎!」

「成個架仔咁型撚到!」

「好過之前果個柒碌油頭啦!灣仔會展咁撚樣!」

成班好似培生培心啲誇誇群咁響度讚我,搞到我有啲淆








連chantal都讚

「哈哈幾好睇丫!不過...都係諗返起尋晚...哈哈哈...」




「...屹屹屹屹!!!!成頭嘔吐物....哈哈哈哈!!!!!」

唉,睇黎就算我真係去整容,都無辦法擺脫到嘔吐物淋頭呢單柒事








星期二,我如常咁返去poly上堂

剪完頭髮之後既幾日,發覺周圍既目光都多左


男仔我唔理啦,但來自女性既目光就肯定多好多

不過上堂果度大部份都係豬西,不提也罷


呢個頭,會唔會令我出到pool呢?







「丫你個新地,剪完個頭真係順眼好多喎」

今日返黎果陣我見肥成同阿琨未返,所以就同椰奶一齊坐


「係咩....」

突然比椰奶讚,有啲受寵若驚


椰奶係咁望住我

「不過...個樣都真係無得救」


「屌你呀...」

仆街,原來又係串鳩我




「係喎,椰奶」


「咩呀?」


「你唔駛返part time咩?」


「今個禮拜返夜晚多呀,7至11」

椰奶將食緊既百力滋遞過黎:「要唔要?」


「哦...多謝」

我抽左幾條:「你返工果度做咩架?」


「攞幾條咁貪心架...donki執貨姐,響尖沙咀返」

椰奶係咁食住百力滋,勁大聲:「做咩呀?想起我底呀?」



「無.....都係少少好奇姐」

諗起椰奶同marie既對話,我對佢地兩個既家庭狀況幾好奇



「係喎,你家姐...響暗hall做左好耐架啦?」


「又唔係好耐既...一兩年左右姐...」

椰奶繼續輕鬆答「佢無defer既話依家都year3啦...」


「下?defer?」


「嗯...家姐話讀讀下無乜興趣,暗hall個老闆又請佢咪defer囉,家姐話呢..份工都有成20k架,份工又得閒又包住,有時想行開下又可以叫其他人黎坐lobby頂住先,幾好丫...」

「嘩聽落都真係筍工喎...」



「睇中我家姐呀?你無行架啦!」

椰奶得意洋洋道:「我家姐仲響u果陣都好多人追架啦!」


「哈哈...係咩..」

唔止果陣,依家都有阿豪同otto丫....




上左個半鐘之後,先見到肥成同阿琨 

佢地兩個一見到我同椰奶坐,即刻坐到另一邊,仲響度竊竊私語


屌,唔抵得咩...



落堂之後,椰奶已經拎起哂袋

「喂,我去食野先,一陣返工,拜!」


「哦...拜」

椰奶一支箭標出去之後,肥成同阿琨即刻過黎


「你邊位呀ching?你整左容呀?」


「咩呀...剪左個新髮型姐...」

你兩個男人讚我有咩用丫


阿琨問

「喂你同椰奶真係好熟喎,溝左?」


「溝你老尾咩...」

我馬上否認:「我同佢啱傾姐...」
已有 0 人追稿