【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 聖誕禮物

然後話咁快就到聖誕節，呢幾日我都喺屋企努力到三更半夜…本來我都有諗過係咪應該低調啲，但細心諗諗就知係毫無意義。
我：「早晨…聖誕節快樂。」
我將一包嘢送到詩敏手上，佢望一望入面然後嫣然一笑攞咗出嚟，二話不說就纜咗條淡忌廉色頸巾上條頸度。
無錯，聖誕佳節，我同佢兩個又派花生，全班同學都望住我兩個呆咗，詩敏佢慢慢變成苦笑。
豪：「你兩個有無諗過我哋呢啲毒撚嘅心情？聖誕流流放埋啲咁嘅閃光彈，整盲我哋無陰功呀！知唔知你哋咁樣耶穌會唔鍾意你哋㗎！」
敏：「重好講！搞成而家咁係邊個嘅責任！」
T：「點解會有男仔識織頸巾㗎…」
鳴：「真係出類拔萃呀…邊個夠你玩呀？天下第一兵…」
豪：「女神有乜回禮呀？」
敏：「回禮？我肯纜上身咪係最好嘅回禮囉！」


豪：「娘娘英明！」
做埋啲咁嘅嘢當然唔止啲男仔起哄，雖然女仔無出聲，但就會用各種各樣奇異嘅眼神投射落我哋度，可能係羨慕，或者係妒忌，希望唔會係憎恨啦。
包括我前面嗰個，粒聲唔出又望都唔望下我哋，其實自從上次music day之後佢嘅人氣都高咗好多，喺後補女神ranking絕對霸佔住一個席位，不過佢仍然係單身，亦都無收兵。
我攞咗第二包嘢出嚟，推下佢背脊…
我：「曉彤…如果妳唔介意，呢度重有份試作品。」
彤：「嗯？畀我？」
佢擰轉面望住我，眼神帶有少少訝意。
我：「係呀…咁樣就可以同妳姐妹一pair。」
我重記得佢上次話想要同詩敏一齊掛南瓜，所以…如果佢唔介意，我都想佢開心嘅，畢竟我同佢差唔多日日都一齊食飯；而我相信詩敏佢都唔會介意，基本上可以肯定，因為女神邊有咁易呷醋。
敏：「曉彤，快啲攞出嚟睇下吖。」


曉彤猶豫咁將個袋入面嘅嘢慢慢攞出嚟，當然係一條睇落一模一樣嘅頸巾，嗯…係睇落。
敏：「嘰…嘰嘰…」
曉彤佢拉開咗條頸巾嚟睇。
彤：「作死你呀！做乜一邊鬆一邊緊㗎？呢個唔係長方型嚟喎，喺梯型嚟嘅！」
我：「都話試作品，第一次係差啲…」
彤：「你睇下！呢一行上下針反轉咗，呢一針你擺明穿漏咗就咁打個結上去就算？」
我：「唉…如果唔啱心水咁我收返啦！」
趁佢唔為意我又喺佢手上面攞返條頸巾。
彤：「喂！男人老狗你keep住條頸巾嚟做乜！」
唔知點解我覺得佢講呢句嘢係非常有哲理，所以我都唔明點解啲女仔咁鍾意織頸巾送畀男仔，明明通常戴頸巾嘅都係女仔，佢哋送畀男仔除咗想綁住條仔之外真係唔明重有乜用。


我：「妳理得我吖！呢啲試作品先矜貴呀，一睇就知係純手工天然製作，等我高價賣畀啲男仔攞嚟溫女都好呀，你話係唔係呀？一鳴。」
其實佢呢兩個禮拜都無乜心機，原因全世界都心知肚明，但表面就好似乜事都無咁，同Wing飾演返朋友和平相處；係嘅，有啲傷痛總要經過時間嘅洗禮先會痊癒，睇住前面幾個嘅我哋喺度上演畫劇咁又點會好受。
鳴：「咪玩啦，你而家畀我都無人俾我送啦…」
我：「都唔係嘅，朋友都可以送㗎嘛。」
佢望住我，又望一望阿Wing，露出一個心靈完全被掏空嘅笑容，呢種表情係唔可以用文字嚟形容，當你見到就會有深切體會。
鳴：「你嘅好意，心領喇…」
我：「唔好咁頹啦，聖誕節就開心少少啦！」
鳴：「我無事喎，唔洗理我。」
分手嗰日就大大聲，而家就…都唔知點幫佢好。
我：「Wing，不如我轉讓畀妳送畀朋友吖！」
詠：「客氣，唔使喇，你啲次貨留返畀有需要嘅人啦，因為我已經準備好…」
當佢講完呢句之後全班嘅視線就轉為落喺佢身上，然後喺櫃桶度攞咗袋嘢出嚟。
詠：「嗱，畀你嘅。」
佢推咗袋嘢去一鳴枱面，一鳴呆咗咁傻笑。
鳴：「我咁樣…妳重送畀我…」


詠：「做乜喎，朋友都可以送㗎嘛。」
一鳴對眼變得水汪汪，袋禮物放喺佢枱面都唔識拆，於是Wing就幫佢代勞攞咗入面條黑白間雙色頸巾出嚟，手工當然就…同我嗰啲比係另一個境界，然後纜咗上一鳴條頸上面。
鳴：「嗚…其實我都唔纜頸巾嘅…」
詠：「唔知你呀…係我唔識做人女朋友，我上個月已經織好㗎喇，將就下啦。」
然之後一鳴佢就抱住個頭趴喺張枱上面，至於Wing就成熟啲，無乜太大嘅反應。
彤：「喂！我㗎！畀返我！」
曉彤佢搶返走我手上面條頸巾，即刻就纜落條頸上面，唓，又要彈，又要搶，都唔知佢想點。
豪：「媽咪呀！我係嚟返學㗎！唔係嚟食閃光彈㗎！點解要咁對我？我都好想收EX嘅頸巾呀！」
「拖都未拍過想有EX？你發夢啦！返屋企慢慢諗住聖誕老人打飛機吧啦！」另一邊嘅細強串鳩佢。
彤：「詩敏，我哋一齊自拍吖！」
兩個靚女一齊纜住我織嘅頸巾自拍，真係幾溫馨，我當然好想要返佢哋影啲相，但我知道一定會不得要領，所以都無開口。
搞乜鬼呢，雖然聖誕聯歡係預咗返嚟玩啫，都未至於咁無王管㗎，呢個Miss Lam真係懶到吖…
林：「各位同學！係咪玩得好開心喇？」
豪：「OK咁啦，Miss妳終於肯返嚟喇？妳Miss咗太多嘢喇…」
林：「吓？有啲咁嘅事！等我觀察下先！」


呢個Miss真係夠晒古靈精怪，而佢當然即刻望過嚟我哋呢邊。
林：「嘩！聖誕節啫，有無咁凍呀？」
豪：「真係好凍㗎，睇到我哋打冷震添呀！」
林：「一鳴，你凍瓜咗嗱？陣亡？」
鳴：「Miss…我無嘢…」
林：「唉，唔知你哋呀，今日想點就點啦…真係吖，都唔明點解要有聖誕聯歡，如果多日假你哋話幾好吖…都大個仔啦，唔使Miss陪你哋玩大風吹同爭凳仔呀？」
「Miss…唔好玩啦…」
林：「係囉，呢啲嘢…留返入U先再玩㗎嘛，邊有咁快輪到你哋，係喇，班會主席，一陣啲伙食你哋搞掂咗㗎喇？」
豪：「放心啦！不成問題！」
林：「係嘅，睇到你肚滿腸肥都充滿信心，咁…想問下而家有乜節目呀？如果無嘅話不如計數咯？」
豪：「唔好咁啦，我哋啱啱就已經睇完史詩式愛情畫劇，不如交換禮物先吖，好唔好呀？」
林：「咁你哋想點交換呀？」
「咪抽囉，重可以點換啫？」
林：「咁不如我幫你哋抽吖，順便拆埋禮物，等我開心下，你哋又可以刺激幾十次，好唔好？」
「咁樣好大鑊㗎喎，Miss…」


林：「放心，我哋採用不記名制，等我用呢個大袋行過嚟收晒你哋啲禮物先…嗱，唔好俾我見到有condom呀，我實記得係邊個㗎！」
真係玩到無嘢好玩…
林：「有無人想估下我哋今日會開出幾多隻杯同幾多個相架呀？」
無眼睇，但真係好好笑，連趴喺度嘅一鳴都噗一聲笑咗出嚟。