我:「唓,你哋唔係最想咁嘅咩?」
豪:「頂你,嗰陣就話要玩你啫,而家我哋食閃光彈食厭咗喇!我重要坐你前面添,挑!」
於是我再望望張座位表,肥豪喺我前面,Tamama喺詩敏前面,一鳴喺最左走廊嗰邊同男仔坐,而阿Wing就去到最右窗口位,係最極端嘅天各一方,同Wing一齊坐嘅就係曉彤。
唔知點解,我睇住張表覺得Miss Lam喺度捉棋咁玩,呢啲唔係叫調位,係叫變調,十足十幫我哋轉key。
敏:「無乜特別吖,其實都預咗類似係咁。」
我:「乜妳咁清楚Miss嘅咩?」
敏:「唔重要吖,你而家唔開心咩?」
我:「咁我實OK嘅…又唔使適應過,妳呢?」
敏:「有兵喺我隔籬畀我用,還可啦。」
就係咁,我哋全班夾手夾腳抹枱清垃圾,再玩倉庫番執好晒啲位,呢種感覺好似照鏡咁。




敏:「右邊嘅志華,多多指教。」
我:「左邊嘅詩敏…多多指教,要繼續麻煩妳。」
豪:「夠喇!你兩個一坐低又喺度放閃!」
敏:「唔抵得就唔好望過嚟啦!」
豪:「唔望過嚟都聽到聲啦!同你哋講呀,如果當日唔係靠我幫你哋撮合,你哋而家邊有得…」
敏:「嗱,你唔好亂講呀,我同佢乜都無㗎!」
豪:「真係乜都無㗎?」
敏:「唔係你認為有啲乜?」
豪:「掂都無得掂?」
敏:「佢敢?」




豪:「真係咁慘掂都無得掂㗎?」
佢望住我又問多次,雖然同佢拉筋可以捉住佢手腕,我又俾佢惜過一啖,但平時嘅我哋…於是乎我就唯有慘豬樣咁擰擰頭。
豪:「哈!抵你死呀!二等兵都不如!」
T:「乜二等兵好差咩…」
豪:「梗係唔係啦,二等兵識扮聖誕老人都不知幾型仔…喂喂喂…你想點呀!」
T:「明明你咁大份扮就最似,戴帽啦你!」
嘈喧巴閉嘅唔止我哋,後面明明已經換咗位但嗰對怨侶重好似幽靈咁飄返過嚟,當然無其他人敢打攪佢哋兩個…
詠:「開心啦,以後唔使對住我面阻阻喇。」
鳴:「點會開心喎…」佢重纜條頸巾纜到實一實。
詠:「無我看住你,以後乖乖哋喇。」




鳴:「Wing!我會掛住妳㗎!」
詠:「掛住我做乜?快啲搵個新女朋友好過啦。」
鳴:「我…而家唔想拍拖住喇…」
詠:「咁就畀心機讀書啦,做個乖學生。」
鳴:「我得閒嚟搵下妳得唔得?」
詠:「問埋啲咁嘅嘢嚟做乜?我哋係朋友嚟吖嘛。」
鳴:「嗯,咁bye bye喇。」
豪:「夠喇!而家未放學㗎,bye乜鬼嘢喎。」
佢兩個終於依依不捨咁分返開返去原本嘅新坐位度;調完位之後有人歡喜有人愁,開心嘅可能係同到friend坐,又或者識到個靚女,甚至係唔使再對住仇家,而唔開心都可以好簡單,例如好多女仔都唔鍾意同男仔坐;總之大部份人都喺度同隔籬打下招呼,互相認識下,係得我同詩敏一啲調位感覺都無。
臨放學前Miss Lam終於上返嚟。
豪:「Miss妳重唔返嚟我哋以為妳已經放緊聖誕假呀。」
林:「點得,如果你哋打我小報告工都無得返呀;同埋,我要上嚟睇下我啲可愛嘅學生調完位有無打架吖嘛,睇嚟大家都幾開心呀下…最後,就係嚟講下有乜聖誕功課嘞!嘻嘻!」
豪:「唔好呀Miss…信我…妳放咗工㗎喇。」
林:「中英文你哋有功課㗎嘞,咁除咗數學呢…你哋重要做physics同chem…」
終於到咗放學,又係我呢隻兵嘅on duty送人返屋企時間,今日曉彤佢唔知去咗邊,所以得我同女神兩個人,佢一出操場就纜返條頸巾,唔知係真係凍吖,定係純粹做下樣安慰我呢?但無論如何我都係開心嘅…




我:「咁…放完假再見喇。」
敏:「咪走住,畀啲嘢你。」
佢係裙袋入面揞咗一嚿嘢出嚟,直接放咗喺我手上面,係一個用舊羽毛球整嘅飾物,就係拆晒啲羽毛,然後用彩色球拍線圍住個底框嚟織,再喺個底度插個鎖匙圈入去。
敏:「唔好同人講係我畀你呀下。」
我:「多…多謝詩敏。」
敏:「嗯,如果唔係淨係得我收你嘢我都唔好意思。」
我:「聖誕假…唔知我有無機會可以同妳一齊溫書呢?」放完聖誕假就係上學期考試,我都唔明點解突然之間可以咁勇敢開口問佢。
敏:「呢個,如果有嘅話我再同你講吖。」
睇住佢纜住我條頸巾返屋企,我都覺得幾自豪,由衷發自內心嗰隻,總算呢個月嘅努力無白費到;唔知另一條嘅命運會係點呢,曉彤佢蠱蠱惑惑,真係分分鐘攞嚟借花獻佛送畀第二個男仔,不過我無乜所謂嘅,反正嗰條都係實驗品,無人要就會變成垃圾,如果可以幫到佢識返個男朋友我都會好開心,但睇住嗰條一岩一巉嘅頸巾出現喺個男仔身上我一定會笑死。
返到屋企,我又諗起第二個人。
我:『初音妹妹,聖誕快樂呀!』
音:『點呀,無端端搵我有事?』
我:『無呀,一場相識,問候下咋嘛。』
音:『係咁咋,有無掛住我先?』
我:『都有嘅,妳咁耐都無搵過我。』




音:『返學好忙㗎,而且又就嚟考試,考完我再搵你啦,無我睇住唔識打飛機呀?』
我:『唔係,掛住妳唔係因為呢啲囉。』
音:『係咩,唔通你鍾意咗我?』
我:『又未至於嘅,我連妳係邊個都唔知。』
音:『係囉,你個心係得詩敏一個咋嘛。』
我:『做乜喎,我都專登嚟祝妳聖誕快樂啦,妳呷醋呀?』就算唔知佢係邊個我都好想知佢諗乜。
音:『哼哼,我咪一早講過囉!重問?』
我:『妳呷醋,即係鍾意我?』
如果…我可以同女神講呢句嘢嘅話係幾咁好吖,其實我送條頸巾畀曉彤都係想睇下佢有無反應,當然結果大家都知。
音:『你就想呀!唔鍾意你!最憎啲跪拜女神嘅兵,你只配做我玩具㗎咋!』
其實聽佢講嘢語氣都覺得係妹妹嚟,或者至少係妹系,雖然呢啲嘢係可以扮,但我點都幻想唔到Wing姐講呢啲嘢會係點嘅樣。
我:『如果妳對我有意思,點解唔肯俾我知妳係邊個?妳都知道其實我無得反抗一定會聽妳話,就算知道咗都無乜分別啫。』
音:『如果你放棄女神我就考慮下啦。』
我:『其實我都係佢隻兵啫…』
音:『唔要呀!再講我爆你大鑊佢知。』




我:『Sorry,係我錯,唔問喇。』
音:『嗯。』
我:『使唔使送份聖誕禮物畀妳?』
音:『好呀,織多條頸巾畀我囉。』
佢咁快知,睇怕係我哋班,但亦都有可能係我送頸巾件事光速傳咗開去…
我:『如果妳纜住我咪知妳係邊個囉?』
音:『我返學唔戴咪得!唔俾我再送畀人嘅!』
我:『好好好…咁係咪真係要?』
音:『講笑咋,你有我心就得。』
我:『如果唔係有詩敏,我可能已經追緊妳。』
音:『咁你而家講乜都得㗎啦。』
我:『唔係㗎,我真係覺得妳幾好。』
音:『你呢啲人,做兵都肯,為咗想有女乜都講得出㗎啦,如果到時發現我唔靚女咪又反口。』
我:『都未必嘅…我唔肯定…』
音:『如果唔計外表,我同詩敏邊個好吖?』




我:『其實我同詩敏嘅嘢未必係妳哋外人睇咁,有好多嘢係得我同佢先知,而我同妳,只係喺女廁相處過幾次…』
音:『咁你咁鍾意人哋做乜重要講啲咁嘅嘢,係咪要專登傷害我你先安樂?』
我開始明白一鳴所講嘅唔識同女仔溝通係點嘅一回事,做兵我就可能幾有天份嘅,講溝女我真係識條毛,我都係小心啲講嘢唔好激嬲佢好啲。
我:『我知錯,乖乖做返玩具。』
音:『你知就好,唔好阻我做功課。』
哎呀,好煩呀,女人真係好複雜,睇到一鳴佢咁樣都有啲驚,可能詩敏要我做兵真係最正確嘅選擇,試問邊有人一開始追女神就會成功㗎,追到手都唔會有好結果;算!放假打下機先。
結果難逃繼續同女人糾纏嘅命運,我終於裝咗隻hgame入電腦,不過而家嘅我已經唔係為咗啲hcg,而係真心想知女人點諗嘢,點同佢哋溝通。
喺呢一晚,屋企人問咗我一樣幾刺激嘅嘢,就係聖誕假去唔去韓國滑雪,而我畀咗一個更加刺激嘅答案畀佢哋,就係我要溫考試所以唔去,叫佢哋自己去玩,麻煩晒佢哋獨留兒童在家,佢哋先係呆咗一呆,但跟住就即刻讚我大個仔識諗。
對唔住…其實我只係幻想緊女神有微乎其微嘅機會搵我一齊溫書,而唔係真係咁識諗…雖然溫書都真係要嘅。
放咗幾日假,唔好話做功課溫書悶,真係連玩hgame都會玩悶,尤其係當你每句對白都睇晒;曾經有幻想過詩敏會喺平安夜或者聖誕正日搵我,當然而家boxing day都過埋乜聲氣都無,的確過時過節為乜要搵隻兵喎,佢又唔係鍾意黐飲黐食嘅女仔,但正因為咁,我對佢更死心塌地。
我:「喂,做緊乜呀?」
鳴:「喺自修室溫緊書呀,乜嘢事呀?」
我:「重諗住落嚟搵你打機添…」
鳴:「細佬佢喺屋企由朝玩到晚,你鍾意咪搵佢,我都係避佢先出嚟。」
我:「咁去會所都得啦,去到自修室咁遠。」
鳴:「我同Wing…溫緊。」
我:「呀,你兩個好返嗱?」
鳴:「朋友都可以一齊溫嘅啫。」
我:「無嘢喇,溫得開心啲。」
聽到就火大,明明前幾日喺度悲春傷秋,而家就…拖又拍過,愛又做過,架又鬧過,手又分過,重可以做返朋友,乜都體驗下唔係幾好咩,我恨都恨唔到;一諗到如果我做足四年兵之後乜都無上到大學同人講我係A0都覺得夠晒悲哀。
如果我去咗韓國,應該好開心玩緊雪,有部隊鍋,A++韓牛,炸雞,而唔係喺屋企自己煮辛拉麪,可惜嘅係女神佢永遠都唔會知我為咗佢放棄幾多。
算,溫書最實際,如果唔去旅行都考到一鑊泡就會俾人煎香到更加甘。
敏:『打唔打波呀?』
我:『當然可以!』
敏:『去book場啦,我半個鐘後到。』
我認衰仔,我係抵死,做足成世兵我都願,詩敏女神我愛妳,啦啦啦,嘻嘻嘻。
已有 0 人追稿