敏:「你…講真?」
我:「係,我都唔會講笑。」
敏:「不如你冷靜啲先…」
我:「我好冷靜,既然係一個錯誤,我唔會俾佢再繼續落去,對大家都無好處。」
敏:「其實你同佢嘅關係都越嚟越唔好…不如等到某一刻都淡,自然分開咁算啦。」
我:「我唔係呢啲花花公子賤男,做唔到扮鍾意佢嚟維持段關係,明知本身係問題就要解決返,我要同佢講清楚,呢刻嘅我已經醒咗。」
敏:「但而家呢個時間,會唔會唔係幾好?」
我:「再拖落去重弊,快啲解決咗佢大家可以專心準備會考重好,放心,雖然我要同佢分手,但我都會當佢係朋友,話佢知呢啲威脅朋友欺騙對方得返嚟嘅關係並唔係真正嘅愛情。」
敏:「喂,你咁對佢一陣佢流段片出嚟點搞?」
我:「應該唔會嘅,就算係我都無所謂。」




敏:「無所謂?!」
我:「嗯,只要可以喺妳面前光明磊落抬起頭咁做人我就夠。」
敏:「喂!我都喺段片入面㗎…」
我:「最多走人囉,去外國讀書。」
敏:「咪玩啦,你估我係你咩!」
我:「詩敏…到時…如果真係,我同屋企人講係我累咗妳,我會諗辦法幫妳出晒錢。」
敏:「你係咪黐線㗎!我唔要咁呀…」
我:「有乜辦法,段片喺佢度,就算呢一刻無嘢佢都可以隨時發爛,唔通我要為咗驚佢呢一樣嘢而呃佢呃埋自己永遠喺佢身邊?呢件事妳都有責任,當初勒索我當玩具玩嘅係妳,妳又唔小心俾佢影到我哋。」
敏:「哈…哈…你大個仔咁話喇下…」
我:「點都好啦,我已經決定咗,唔會變。」




敏:「喂!你唔好諗住分咗手返嚟我身邊呀!」
我:「我唔會,我分手並唔係為咗妳,有啲嘢係放棄咗就係放棄咗,唔可以返轉頭,但如果我同佢繼續拖落去,我一定會後悔。」
敏:「既然你心意已決,我都唔影響你,但曉彤係女仔嚟㗎…你唔好太過傷害佢。」
我:「嗯,我知㗎喇,佢都差唔多放補習,我而家就去搵佢,妳都快啲返屋企啦。」
出咗校門我哋就分開行,呢個時候我當然唔會再送佢返屋企,我搭巴士去到曉彤屋企樓下嘅必經之路,重有啲時間我就喺度蕩下蕩下,諗下點樣同佢分手比較合適,而佢又真係無send message同打電話畀我。
等咗幾個字佢終於出現咗喺我面前。
彤:「你而家乜嘢態度呀?補習社都唔去?」
又係抱怨,責駡,然後我唔想理佢,大家一齊變本加厲,就會變成一個惡性循環,但我要停止喇。
我:「曉彤,對唔住,我有啲認真嘢同妳講。」
我無拖住佢,行咗去佢樓下嘅一張乒乓枱度,呢度夜晚通常都唔會有人,亦都曾經成為我哋兩個喺度偷偷摸摸揸揸插插嘅地方。




我:「曉彤,我哋分手啦。」
彤:「無嘢呀,你專登過嚟截住我就係講句咁嘅嘢?」聽完一句之後佢就已經雙眼通紅。
我:「我諗得好清楚,我同妳並唔適合,咁樣落去都唔係辦法,早啲完結對大家都好。」
彤:「做乜呀?同女神打完波唔捨得呀?」
我:「曉彤,我無同佢打波,呢件事唔關佢事。」
彤:「咁你話我知…點解要咁決絕同我分手?都係鬧下架啫…平時都有㗎啦,而且係你做錯在先…最多我以後發少啲脾氣囉。」
我:「係,我認我今日做錯,唔敢同妳講打住波等妳,諗住收到message就即刻搵妳乜事都無,但…我真係好驚,驚妳嬲,驚妳亂諗,又唔想掃我隊友興先會咁做,不過,我唔係因為呢件事要同妳分手。」
彤:「咁…係乜嘢事?」
呢個時候佢啲淚水已經流緊落嚟。
我:「詩敏…佢已經講咗畀我聽。」
彤:「講咗…乜…」
我:「妳唔係初音妹妹嘅事。」
彤:「你…你兩個…好嘢呀下…重敢同我講…唔關女神事…唔係一齊打波…」
佢眼神充滿慌張,震驚,憤怒,口齒不清連個嘴唇都一路講一路震;相反我好冷靜同鎮定,因為我知道呢段錯誤嘅感情終於要完。
我:「本身真係無約,亦都無一齊打,只不過我發完脾氣掟拍,之後佢走過嚟同我講返。」




彤:「你…你哋…就唔驚…我爆你哋啲衰嘢出去?」
我:「曉彤,收手啦,我無怪過妳,詩敏佢亦都重當妳係朋友,妳傷害我就算啦,唔好攪詩敏好唔好?」
彤:「又女神,乜都女神!咁咪等全世界睇下女神同你呢隻不知所謂嘅兵喺女廁做埋啲乜囉!」
我:「求下妳,唔好咁做…唔好再威脅我哋,如果妳堅持錯落去,我哋唯有轉校,甚至去外國讀書。」
彤:「係!我做乜都係錯,女神做乜都係啱!」
我:「唔關事喱,曉彤,真正嘅感情唔係咁㗎,妳威脅好朋友,欺騙我嚟換取我同妳一齊,咁樣係唔會持久㗎,求下妳醒醒啦!」
彤:「哈…哈…女神喺女廁玩你就甘之如飴,我喺女廁同你玩就叫欺騙,哈…原來係咁…我乜都畀晒你㗎!仆街!女神佢有無俾你摸過呀!」
我:「唔關事…我唔係咁嘅意思。」
彤:「你唔使再講啦!總之…女神呢兩隻字就等於絕對正確,可以做乜都係啱…而我嘅存在,本身就係一個錯誤,就連睇唔過眼佢咁對你都唔得!」
我:「曉彤妳唔好咁諗啦,詩敏佢並唔係妳所諗咁樣㗎…」
彤:「夠喇,你唔好再同佢講好說話呀!我而家好撚憎你呀!我只係一個變態,大話精,出賣朋友嘅小人,你快啲走呀!返去你個女神度呀!」
我:「都話唔係因為佢,我同佢已經完結咗,亦唔會搵返佢,只係我哋咁樣係錯㗎,唔會有將來。」
彤:「梗係錯啦!因為我錯撚晒吖嘛,你走呀!」
佢轉身就走,向返佢棟樓嘅大閘方向行。
我:「妳唔好諗埋一邊啦,就算我哋分開咗,我都會繼續當妳係朋友㗎,就算妳唔開心都可以繼續搵我謦訴,求下妳冷靜啲。」




彤:「我好冷靜,唔該你即刻喺我面前消失,你以後都唔使指擬再見到我!」
我:「曉彤…」我眼白白睇住佢入咗大廈鐵閘。
嚟到呢度,我知道我同佢已經完結;兩個女人,兩段唔正常嘅感情關係都終於落幕,而我都終於變返條毒男,可以一條友自閉好好迎戰會考;我嘆咗一口氣,要完嘅始終都係要完,雖然我為咗自己唔使再受無謂嘅壓力而感到放鬆,但同時我亦都好手足無措,唔知以後同佢哋兩個嘅關係點算好,希望曉彤佢可以諗通明白我同佢要分手嘅原因啦,但我真係好擔心佢…考完會考…一個人唔知點好呢?如果一鳴同Wing分手嘅話應該可以日日去佢度打機,又或者去下旅行都好噃,不過我咁諗好似太衰,Wing佢應該會想鬧死我…咁不如約Tamama去機鋪打下機,呢條友應該都會好得閒。
我無搭到巴士,決定行返去自己屋企等啲心情沉澱下,路程都要行差唔多一粒鐘。
終於都分手,好唔好話畀一鳴知呢?但佢實話我無聊,叫我唔好阻住佢溫書,而且我哋三個嘅秘密又唔同得佢講…話畀詩敏知?其實佢已經知道咗,我同佢已經係兩個無關係嘅人,實在無必要再同佢交待啲乜;Wing話過我有疑難煩惱可以搵佢,但硬係覺得搵佢嘅話奇奇怪怪,搞到自己成個問題少年咁。
最後都係決定自閉,返屋企專心溫書好過。
去到臨瞓前曉彤佢都係無再搵過我,按道理我應該覺得一天光晒好舒服,但係我個心又喺度戚下戚下好擔心佢,我好想佢send句『我諗通咗。』或者『我知道做錯咗。』嚟畀我…雖然我知道自己咁諗係癡心妄想,佢而家應該嬲到我震,或者匿喺被竇入面喊緊。
唉,做男人都要有啲風度嘅。
我:『曉彤,我知妳好唔開心,其實我都一樣,雖然我哋已經分開咗,但如果妳好痛苦嘅話一樣可以搵我,同埋我哋都要專心準備會考,過咗去嘅嘢就過咗去,一齊好好努力啦,關心同支持妳嘅志華上。』
等咗十分鐘都無回覆,可能佢已經喊到攰瞓咗,又或者我呢世都唔會再得到佢嘅回應,就好似我同佢破完處第二朝返到學校俾佢當透明咁,其實做人有乜必要咁執著呢。
我…係咪真係好衰…其實我自己都諗唔通。
我望住窗外嘅烏雲,但個天已經唔俾我再諗。
「鈴鈴…鈴鈴鐺…」係一個我未見過嘅電話。
我:「喂?」咁夜邊個打嚟呢?
已有 0 人追稿