哈哈,諗緊如果唔理讀者死活,以紙言呢度風氣,為咗點擊數我每次更拆開兩三次都重得,一日兩三更都好easy。

我跪咗喺曉彤前面。
我:「曉彤…妳快啲醒啦,唔分手喇,我哋以後都唔好分開,妳起身陪我好唔好?我唔會再嫌妳煩,唔會再有嘢瞞住妳,我會好好學下點同妳相處,我知道妳好愛我,所以求下妳唔好掉低我走咗去,其實我哋成日鬧架都係因為我無用,唔知妳諗乜,我以後一定會改;我應承妳,只要妳醒返,我一定會好好一直陪妳走落去…」
點知詩敏都喺我隔籬跪咗喺度。
我:「詩敏…妳…做乜…」
敏:「其實都係因為我先搞成咁。」
我:「點解咁講呀?」
敏:「如果唔係我玩收兵遊戲…如果唔係我明知妳鍾意呢個傻仔都唔同妳溝通…如果唔係我睇住妳借啲意避開我但我都由得妳…如果唔係我口硬話我鍾意玩兵,唔肯同妳講我一直深愛住個傻仔…如果唔係我自以為是諗住讓佢畀妳你哋就會好開心…如果唔係我唔抵得同佢講咗我同妳之間嘅秘密…曉彤妳快啲醒啦,我哋一齊爭仔,好唔好?」
我:「詩敏…」




原來…都係我無用…當一個又一個嘅誤解不停咁疊起嚟,就會乜嘢悲劇都有可能發生。
敏:「呢張…係咪曉彤嘅遺書?」
我:「唔可以咁講嘅…佢都重喺度…」
敏:「我可唔可以睇下?」
我:「唔係我話事㗎喎…我都唔知佢想唔想。」
敏:「作為佢嘅好朋友同情敵,我搶嚟睇下應該都係喺佢意料之內㗎啦。」
就係咁詩敏佢攞咗封信嚟睇,又睇到喊晒口。
敏:「曉彤…妳真係好自私…如果妳離開咗…我哋重有乜可能一齊呀…」
雖然無論點我都唔覺得同詩敏有機會喺返埋一齊,但如果曉彤真係離開咗人世嘅話,我都應該會離開香港,我唔想再留喺度。
我同詩敏起返身,望住曉彤都唔知講乜好,如果佢而家醒返見到我哋兩個係咪又會激到佢暈低,畢竟係我哋兩個搞到佢咁睇唔開,應該好唔想見到我至係…曉彤,其實妳都有優點嘅,雖然妳嘅性格野蠻又任性,但喺感情上妳真係好認真而且直率,妳對我嘅深情我已經理解,想同妳分手並唔係因為我唔愛妳,只係因為我害怕,想逃避…但睇到妳而家咁樣,我已經學會勇敢,妳死都唔驚,我點解重要去害怕妳,到妳醒返我一定會好好應負妳,希望妳唔好再憎恨我。




就係咁,我同詩敏喺入面陪咗曉彤半個鐘到,同曉彤講咗聲下次再見就出返去…
彤媽:「志華,我可唔可以同妳單獨謦一陣?」
於是乎我就跟住佢媽咪出返去急症等候區。
我:「伯母,對唔住,我知我無嘢可以補償到…曉彤而家咁樣完全係我嘅責任,實在萬分抱歉。」
彤媽:「件事都發生咗,唔使太怪責自己…可能係我哋唔識教女啫,無人會估到佢咁睇唔開…不過呢,佢咁嘅情況下個禮拜都返唔到學,都要同學校嗰邊交代返…」
我:「係,我都明白…」
彤媽:「咁我無理由瞞住學校佢自殺嘅事嘅,但係因為乜嘢原因我就唔打算講。」
我:「係…」
彤媽:「你哋都就會考,我唔想你哋心情太沉重,令你哋增加壓力都係無補於事,而且學校都幫唔到啲乜嘢手…志華,我見你都大個仔,識諗嘢,肯負責任,所以我都唔打算驚動你嘅父母,只要你係肯真心對曉彤就得喇。」
我:「放心,只要我能力做到,我都會去嘗試,我一定會每日祈禱,希望佢快啲好返…」




彤媽:「嗯,如果曉彤醒返,你諗住點?」
我:「我而家都未係好清楚,希望佢會原諒我,肯同我見面,我會盡我所能陪住佢,去明白佢,聽佢講嘢,開解佢,令佢嘅人生有返希望。」
彤媽:「嗯,醫生話呢兩日送曉彤去ICU觀察住先,未必咁適合你哋嚟探佢,情況穩定嘅話過兩日就返普通病房,到時我再話畀你聽吖。」
我:「唔該晒伯母,到時我一定第一時間嚟睇佢。」
彤媽:「唔一定嘅,可能佢聽朝就醒返呢。」
我:「希望係啦,咁我都會嚟接佢出院。」
彤媽:「而家都好夜喇,不如你哋都返屋企先啦,我搞掂埋啲手續都走喇,曉彤唔鍾意我哋煩住佢。」
我同詩敏離開咗醫院之後就搭的士返去,當然係停喺佢樓下。
敏:「喂,你做乜又送我返屋企,唔啱規矩喎。」
我:「詩敏,我送妳返嚟,唔係因為我係兵,而係因為半夜三更妳自己一個返去危險,我有責任睇住妳;以後,我一定會學識同女仔溝通,會好好咁照顧妳哋。」
放心,我諗我呢世都唔會再迷戀女神,貪圖女性肉體刺激,而係腳踏實地咁同女人相處,好好瞭解妳哋,如果唔係我真係愧對妳哋嘅心。
敏:「咪玩啦,嗰幾步路…不過呢,曉彤醒返之後一定會鍾意返你㗎,我走喇,bye bye。」
曉彤…妳係咪真係會鍾意返我?妳嘅愛對我嚟講真係好沉重,但我無得唔受…其實受傷嘅又點止妳一個,詩敏睇落雖然乜事都無,但佢一直深愛住我,我都唔知點算…睇嚟我先係一個錯誤,曉彤,點解我唔聽妳講一早推詩敏落床就算,好明顯妳係為我好,咁我就唔使搞到今日咁嘅局面。
到咗星期一,學總是要返的,我嘅壓力仍然係山大,相比之下mock嘅成績簡直係小菜一碟。
今日曉彤會轉返去普通病房,我哋對卷中午就走得,所以我食完飯之後就會去探佢。




而我禮拜五掟拍嘅事情當然傳到成校都知,加埋今日曉彤無返學,相信大家都有好多唔同嘅揣測,而我同詩敏兩個當然扮到若無其事咁繼續對卷,當大家透明就算。
詠:「志華,你老實答我,你哋係咪出咗事?」
呢個我相信佢唔係為八卦,而係出自真心關心我。
我:「Wing,妳估中咗…但唔好再問喇,妳都幫唔到乜嘢手。」
詠:「好大件事?」
我:「妳可以咁講啦…」
詠:「咁你無事吖嘛?」
我:「放心,我重頂得住,無咁易死。」
詠:「唔得就唔好死撐喇。」
對完卷之後,有一件事都係我意料之內嘅。
林:「喂,一陣落嚟教員室搵我吖。」
落到去,Miss Lam已經喺教員室門口等緊我。
我:「對唔住Miss Lam…係咪件事攪到妳…」
我都知唔方有好嘢,都係認錯打定底先。
林:「重好講,你個死仔包,行啦!」




我:「行?去邊呀?」
林:「跟住我啦,係咪唔聽Miss話呀?」
咁我當然會聽佢話嘅,點知佢帶我由校員室轉咗去停車場,嚟到佢架車前面。
我:「Miss妳想點呀?」
林:「白癡,梗係上車啦,重企喺度做乜?」
我:「我知呀…但妳想車我去邊呀?」
林:「好驚俾人棄屍荒野呀?當我係林過雲?」
我:「咁你哋都係姓林吖嘛…」
林:「重識搞gag即係唔驚死啦?上車呀!」
於是乎我喺無得揀嘅情況之下就上咗佢架車…佢架嘢唔講得少,係新版Nissan Fairlady Z34,今年先啱啱出佢就咁快攞到手,係一架得兩個位嘅街跑;咁由於我以前砌開模型跑車都知呢架嘢乜來頭,Nissan有兩條跑車Line,如果Skyline GTR可以被喻為野蠻之狂漢,呢部Fairlady就叫做惡魔之淑女甚至乎死亡之淑女…
我:「Miss…妳架車都幾靚呀下…」
林:「又唔係我嘅…我負責得閒揸下佢等佢唔好生銹㗎咋,重要係棍波麻鬼煩,雖然都係得頭兩個波用得咁滯。」
無錯,好耐之前都講過佢老公係有米嘅。
我:「咁我哋而家去邊呀?」
林:「睇你想先姦後殺定先殺後姦囉。」




我:「係咪即係類似先甜後苦嘅道理咁?咁我寧願甜咗先…」
講起姦就即刻心都寒埋,當時曉彤佢就係…
結果Miss Lam車咗我去一個比較高級嘅商場,上咗去商場其中一間餐廳。
我:「我哋嚟食飯?」
林:「唔通嚟洗碗呀?」
我:「使唔使咁大陣仗呀…」
林:「同你呢啲有錢仔食飯係要隆重啲嘅。」
我:「我食開大家樂㗎咋喎…」
點完菜,Miss佢終於都入正題。
林:「雖然曉彤媽咪唔肯同我講,但你唔好話唔關你事呀下。」
我:「係…關我事嘅…係咪搞到妳好論盡?」
林:「由於佢媽咪拒絕透露原因,所以上報完之後report都無乜嘢要寫,校長都係話當會考壓力大就算;但…無理由係咁簡單嘅。」
我:「係呀…真係好複雜…」
林:「咁你肯唔肯同我講係乜事呀?」
我:「Miss,唔係我想保護自己或者逃避責任,但…我都要保護啲女仔嘅私隱㗎。」




林:「詩敏嗰啲你唔使講,剩係曉彤得㗎喇。」
我:「但係無得單獨講㗎喎…」
林:「咁我剩係得個知字,乜都唔會做好未?當係我同你嘅秘密,唔會同佢兩個講啲乜。」
我:「但我驚妳以後歧視我喎。」
林:「不朽都歧視你㗎啦,做人兵嘅死廢J。」
結果,我將成件事由頭到尾和盤托出,總共用咗我個幾鐘先講完。
已有 0 人追稿