【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 打羽毛球的女生
37追釋出
到咗第二日，Tiffany真係走咗嚟我會所打波；都啱嘅，幾年無打波真係唔練返唔得，如果唔係佢拍住阿文都唔會練到我哋啲乜。
我：「嚟啦，開個高遠球過嚟啦。」
我喺接球區用力跳高，手腕一發力，啱啱好嚟個直線點殺打落佢左邊線，Tiffany根本走唔切過嚟接個波。
我：「唔夠高，唔夠遠，個波重係打橫飛緊就俾我截咗，你要確保個波托到我接觸範圍嘅時候向地，先可以避免到我嘅攻擊…」
好在佢而家醒目咗又勤力咗，唔使一粒鐘就可以開到每一球高遠球吊住咁跌落我呢邊底線前面，好在係雙打綫就夠，單打綫嘅話真係攰死佢都似。
臨交場前Tiffany就再喺度拉下筋咁，慢慢啦…小妹妹，幾年唔郁真係會生銹㗎。
旎：「呀…你真係望都唔望下我㗎喎。」
我：「做乜要望？定係要我幫妳推妳額頭落膝頭哥度？」
旎：「我都唔係好差啫…」
唔好咁啦，我心累喇，鬼唔知妳條PE褲鬆泡泡一拉會見到入面條白底咩…
我：「我無話過妳差喎…」
旎：「咁又係嘅…同詩敏比起上嚟我又算得係啲乜，嗚嗚嗚。」
我：「唔關事喇，我只係心累啫…其實我份人唔係咁睇重女仔嘅外表㗎咋，詩敏最吸引我嘅地方唔係佢嘅外在美。」
我都攰，坐埋喺地板上面喺佢隔籬。
旎：「咁佢係乜嘢最吸引你？」
我：「哈哈…唔知呢…唱歌好聽掛。」
旎：「鳴鳴，唔怪之得我無人要啦，詩敏攞第一，曉彤就攞第二。」
我：「邊係呢，妳都唔知幾好。」
旎：「我有邊忽好呀？」
我：「如果我中三果陣用杯雪糕呃到妳嘅話，人生一定會少好多煩惱。」
旎：「但係你就無得咁多姿多彩㗎喇喎。」
我：「所以…我要多謝妳嘅守身如玉。」
旎：「去死啦…你真係咁鍾意詩敏？」
我：「嗯。」
旎：「去追返人哋啦。」
我：「等有機會先啦。」
旎：「而家成日打波重唔係機會咩？」
我：「佢打波嘅樣都唔係平時嘅佢嚟嘅。」
旎：「就算無得一齊都咁鍾意佢？」
我：「嗯，一唔一齊唔重要，重要嘅係佢係一個點樣嘅人。」
旎：「哈，原來你唔係情聖，係情癡先啱。」
我：「唓，妳未經歷過又點會明。」
旎：「咁你重鍾唔鍾意曉彤？」
我：「我…唔識答妳呢條問題。」
旎：「你重好花心添。」
我：「係呀，所以唔好黐埋嚟我呢個衰人度。」
旎：「你覺得我有無可能打得贏詩敏？」
我：「坦白講，接近無…除非妳練得好犀利，而佢又病咗或者受傷咁囉。」
Tiffany跪咗喺我後面，兩隻前臂撐住我膊頭。
旎：「如果我贏咗佢，你做我男朋友吖。」
我：「我唔係妳哋嘅奬品…或者玩具。」
旎：「唓，都唔好玩嘅。」
我：「愛情唔係攞嚟玩㗎。」
旎：「我唔係想玩愛情，想玩你啫。」
我：「妳鍾意就玩飽佢，我唔介意做一隻玩具，但我個心入面只會有詩敏。」
旎：「你呃我，一定重有曉彤。」
我：「我自暴自棄，唔理妳。」
旎：「乜嘢唔理我呀！你重要陪我練波同埋教我數呀，唔做玩具就做工具人啦！」
點解而家啲細路女會咁蠻不講理，好似多咗個細妹喺身邊係咁煩住我，不過都有個好處嘅，佢喺度可以有一個中和效果，我就唔使諗要點同詩敏相處，專心打波就得。
然後過咗兩個禮拜嘅星期五，聖誕聯歡，李sir喺度嘅聖誕聯歡可以用悶死嚟形容，無謂提；完咗之後九成人趕住放假閃人，我哋四個當然霸住個禮堂嚟練波；同Tiffany練咗六七次之後真係好咗好多，我同詩敏都要認真返嚟同佢哋打，但礙於身型問題Tiffany始終好難做到有力嘅攻擊，所以就集中精力喺防守上面，詩敏一如三年前咁對佢狂轟濫炸，我真係睇到都攰，Tiffany開始掌握到擋殺嘅技巧，尤其係反手拉吊，斜線放網或者大對角，以慢打快，左右企位下迫到詩敏走來走去消耗體力。
話咁快又到咗五點幾。
我：「詩敏，想問下妳一陣得唔得閒？」
敏：「嗯？你唔使陪Tiffany溫書咩？」
我：「今日唔喇，放返幾日假先啦。」
敏：「約我做乜？你唔係話剩打波咩？」
短髮嘅佢，銳利而平靜嘅雙眼…
我：「係…我想同妳去買拍啫。」
敏：「吓？我換咗新拍無幾耐啫，你唔記得咩…」
我：「妳而家想打嘅係全港青年錦標，用而家塊拍…好似有啲…」
敏：「我唔覺得有幾大分別啫。」
我：「咁妳想做一件事，又可以再做得好啲，點解唔做埋佢啫，我唔想妳為咗一分而後悔。」
敏：「但一塊再高grade嘅拍…我未必負擔得起…」
我：「有我喺度吖嘛。」
敏：「我點可以無端端收你嘅禮物呢？」
我：「唔係禮物，個比賽而家我都有份，妳當我買完借畀妳用，直到打完為止囉，好唔好？」
敏：「你話事囉，我唔介意有靚拍用嘅…」
我：「咁行啦！」
於是就又去麻煩老闆。
闆：「太好喇！終於見到你兩個，幾驚你哋散咗呀！」我成日覺得啲運動鋪老闆日日匿喺個細鋪入面，客人唔太多，久而久之係會有心理偏差。
我：「老細咪玩啦…講咗我哋唔係情侶。」
敏：「放心！如果散嘅話我一定嚟親自通知你。」
但…女神係會陪佢玩…
闆：「唔好呀！派帖先嚟通知我就得。」
敏：「好呀，到時唔收你人情呀下。」
…，…，…。
我：「詩敏，揀塊妳覺得最順手嘅拍啦，記住千祈唔好睇價錢牌。」
闆：「妳試呢個架嗰堆就得㗎喇。」
詩敏就逐塊逐塊攞上手揮下，玩咗十五分鐘到揀咗塊啱心水嘅，然後畀我睇。
我：「嗯…超輕nano系列，全碳框，重心稍近握把，手感偏硬但唔係最硬，打高速反應，啱嘛？」
敏：「我唔識呢啲㗎喎，隻手話啱囉。」
我：「老闆，呢塊幾錢呀？」
闆：「盛惠1799。」
敏：「！…不如…」
我：「做乜呀？」
敏：「無嘢…」
每次使錢，都會見到佢獨有嘅表情，真係好可愛，唔通呢個就係叫做錢買得到嘅可愛？
我：「老闆有無四塊呀？」
敏：「乜話！要四塊嚟做乜！」
闆：「呀！終於要認真打波嗱？」
我：「我唔使用呀？」
敏：「你又唔係無。」
我：「妳話好用我又要試，混雙用情侶拍先襯。」
敏：「咁都係兩塊啫！」
我：「有無諗過打緊比賽斷線點算？」
敏：「無你咁暴力呀，三塊都夠啦。」
我：「我諗住借多塊畀旖旎…」
敏：「哦…原來係咁情侶拍。」
我：「妳都唔好意思用塊職業拍打佢塊二三百蚊嘅拍呀？」
敏：「你鍾意，唔關我事。」
我：「同埋我諗住穿唔同線畀妳試吖嘛。」
敏：「使唔使去到咁呀？」
我：「橫掂都係，我順便自己玩下。」
敏：「敗家仔嘅惡趣味。」
闆：「嗱，呢度四塊。」
敏：「唔該買咁多塊有無折㗎？」
闆：「如果係妳嚟買我唔賺錢賣畀妳都得，但我好歹知呢隻嘢屋企係點。」
我：「嗱…我都唔想㗎…」
闆：「金融海嘯…你屋企無事吖嘛？」
我：「對沖咗喎…好似無乜事。」
闆：「咁就好…」
我：「唔係老闆你中招吖嘛？」
闆：「哈哈，我邊得閒搞咁多嘢吖，搵到餐飯就安樂㗎喇…係最驚領滙要加租。」
我：「希望唔會啦…我想要66UM，66F，98，99四條線。」
闆：「嗱，自己攞啦，使唔使自己拉線呀？」
我：「唔使啦，麻煩晒你。」
敏：「欸…唔好吖…我慣咗打佢拉嘅線…」
我望住佢…嗯…一次拉四塊拍，本來重諗住叫老闆拉聽日先嚟攞，既然女神有令…