195k點擊釋出

林:「哈…咁多位同學仔你哋好呀,我見到呢…呢度有幾個同學係我教過嘅,咁就大部份同學我都未見過…」
呢種感覺實在係太親切,太令人感動,其實我哋當年有幸俾佢呢個A Level主力先生教過算係好幸運,諗返起上年個老女人呢…
林:「哎呀!我點會係你哋副班主任喎,我只係教你哋呢度小半班人嘅maths and stat咋,一個禮拜得六堂鬼得閒理你哋咩,而且教高form好悶㗎嘛,個個都喺度上堂溫書,唔好玩嘅…我係嚟交帶低pure math同maths and stat啲嘢咋…」
我唔信呢個Miss Lam唔係嚟玩,我隔籬嘅一鳴,佢前面嘅曉彤都喺度等緊Miss開大開細定開圍骰,其他同學就有啲不知所措。
林:「咁pure math嘅楊sir重忙緊會考成績啲嘢,佢留低咗遺言叫我同你哋講,揀得pure math預咗自掘墳墓,你哋自生自滅就得…好,到我科maths and stat喇,你哋…係咪好驚我畀暑期功課呀?」
讀MS嗰堆小朋友就點下頭咁。
林:「唔好咁傻豬豬啦,都咁大個人喇,重做乜功課啫,識就識唔識就唔識,唔通做完考試就高分咩?你哋做又辛苦,我改嗰陣又辛苦…」
感覺上Miss Lam越多廢話嗰陣就越無好嘢。


鳴:「Miss妳唔會呃我哋㗎可?」
無咗肥豪,都要有人出嚟陪佢玩下嘅…
林:「我幾可會呃我嘅咁可愛嘅學生呢?由於你哋班係所有人讀過A maths嘅,所以…我哋九月二號見面就直接測驗啦,Topic係log啦,exponential啦,d啦,indefinite in同definite in搵area啦,再加啲常識嘅probabilitiy咁,講完…呀,重有呢,因為有幾個無讀過A maths嘅文科生會讀呢科,你哋準備定幫佢哋補習啦,我過隔籬班又要再講一次,唉…真係好浪費時間,bye bye。」
輕輕的Miss Lam走了。
剩返落嚟嘅係讀pure maths嗰堆同學對我哋無盡嘅恥笑…好啦,有講總好過無講,即係話買完書教都未教我哋就要溫書。
「係喎,班長嗰度點搞?」
「班長應該搵啲成熟啲嘅人嚟做嘅。」
「都中六喇,呢度實有人做過嘅。」
然後成班同學都望住位處中央嘅我哋之中嘅曉彤;雖然話做咗一年同學,但始終我哋同佢哋個圈都重係有條睇唔到嘅分野喺度,喺呢啲事情上面我哋係會有啲蝕底。
彤:「好喇好喇,唔好咁樣望住我,做就做啦!」


「咁男班長…女班長自己揀咪得囉。」
「喺囉,搵個啪…拍開嘅一齊做咪得囉。」
頂佢個肺,你班友唔知頭唔知路唔好亂咁玩得唔得呀,我正想起身開火之際,曉彤擰轉面過嚟阻止咗我。
彤:「點呀,你做唔做呀?」
鳴:「做唔做唔係問題呀,我唔想太張揚咋。」
一鳴一副縮沙咁嘅樣,曉彤就轉為望過嚟我呢邊扁嘴;係嘅,我諗佢寧願同我哋兩個是但一個做都好過搵其他同學。而家嘅我同曉彤,絕對可以做返好朋友,好同學,所以都不成問題。
我:「好喇好喇,我做就係啦,大家唔好煩喇。」
我舉高雙手投降。
「好嘢,咁就解決咗一個問題。」
大家一齊拍手掌。


「咁,即係一鳴係班會主席啦,大家話好唔好?」
「好!」「咁就梗㗎啦!」又一輪掌聲。
鳴:「頂你班友!我幾時有應承過呀?!」
「你唔係諗住你有得反抗呀?」
鳴:「我係班會主席呀?我就點晒你堆友出嚟幫我做嘢!你唔好走呀下!」
一鳴過咗去同佢哋理論,我唔熟佢哋原本班啲人事結構,所以就無插手喇。
玩完一輪就走人,曉彤一鳴旖旎同我一齊落去canteen搵詩敏同阿文;本來諗住旖旎會join返佢啲小魔女,點知佢又跟住我哋喎,是但啦。
彤:「詩敏師姐!」
曉彤一見到詩敏就攬住咗佢,雖然詩敏頭先都去過曉彤課室搵佢,但始終唔係全世界都知我哋已經和好返,所以呢個動作又引嚟一啲驚奇嘅目光;至於我哋幾個,算啦,早就做咗全間學校嘅花生提款機,已經懶得去理其他人嘅目光,亦唔會去解釋啲乜嘢。
敏:「恭喜妳考到好成績呀!」詩敏抱返實曉彤摸摸頭讚佢,可以睇到佢兩個再次喺學校以真好姐妹嘅關係放閃,實在係太令人感動。
曉彤考乜?上年佢條英文C同Bio B已經好好用,今年佢真係唔溫呢兩科,英文D,Bio C,其餘就中文B,數學B,A maths D,Chem B,Phy C,Econ B,combine cert 5B1C 23分,唔combine就21分,的確考得幾好。
鳴:「我都多咗4分㗎!讚下我啦!」
其中有兩分嚟自中文,重有兩科各升一個grade。
敏,彤:「無人想理你幾多分呀!」
鳴:「係嘞,其實志華你考成點啫?」


我:「咪英文合格有得升班囉。」
鳴:「咁其他科目呢?」
我:「都係咁啦,上年都考過㗎啦。」
對我嚟講,詩敏同Miss Lam知道我考成點已經好足夠,我甚至唔太想同屋企人講,唔知佢哋會諗乜對我做成無謂嘅壓力,而且我係讀多一年先有呢個成績,唔可以話係喺公平環境攞返嚟。
敏:「吓?你哋想知佢考成點去校務處出面壁報板睇咪得囉。」
乜話?點解?原來而家學校會貼學生成績出嚟㗎,唔係猖狂到咁呀?重成世界嘅…
鳴:「我要去睇!」講完就跑咗去。
旎:「等埋我呀!」兩個八掛小朋友…
而我都當然帶住疑惑咁跟住喺後面,到底係發生咗乜事呢?點知我行到去一望…原來。
我哋學校唔係啲乜傳統名校嚟,10A9A就無可能㗎喇,歷屆最好嗰個好似係7A,但平均嚟講又唔係話好差嗰啲,個分數主要集中喺11,2分到20,21分呢個區域;至於今年,理科有一個5A,然後就有四個3A,文科一個,理科三個,結果我成為頭五名俾人貼晒啲成績出嚟…唉。
鳴:「死仔包!考得咁好都唔出聲嘅,作死你,信唔信我打扁你!」佢摟住我膊頭一副不懷好意嘅樣,咁當然係玩嗰隻啦。
我:「呢個成績咪俾你打出嚟㗎囉…」
鳴:「吓?你喺度講緊乜呀?」
條友仔竟然唔記得咗,如果唔係我同曉彤鬧翻,同佢呢個兄弟反埋面,又唔敢去搵詩敏,我又點可以由十月就開始專心溫書到考會考吖;其實我懷疑詩敏嗰陣最多都係同我打波,而無再進一步同我…都係為咗想我專心溫書呢個原因。
彤:「唔好講廢話喇,你考得咁好,要請我哋幾個食飯呀!」


我:「呢層唔係大問題嚟嘅…但考得好要請人食飯呢個係乜嘢道理嚟?」
敏:「行啦,呢個係靚女嘅道理嚟。」
時間先十一點多啲,我哋一行六人就去食個早飯先,地點就當然係詩敏嘅飯堂大排檔;我哋坐咗喺張圓枱度,排位係順時針我,一鳴,曉彤,旖旎,阿文,詩敏;呢個組合第一次出現好有新鮮感,亦都好特別。
我:「大家隨便嗌啦,唔使就住我,我都想食返餐好嘅!」大排檔晏晝有幾貴吖,俾你最多嗌成隻燒鴨過嚟都係一百蚊啫。
彤:「你確定你真係可以食餐好嘅?」
我:「吓…呢層…」我突然醒起…
敏:「咳咳,你知自己乜事㗎啦。」
我:「唔好咁啦…我已經大半個月無大啖大啖咁食過澱粉喇!」我向女神哀求。
敏:「最後三日喇,星期六你就可以解脫。」
我:「又係妳話聽日都無機會贏,咁俾我食多碗飯都唔係好過份啫!」
敏:「你自己同人哋講過要有體育精神㗎!輸都要輸得好睇,等自己個身體喺最精銳嘅狀態比賽,咁先係尊重對手嘅應有表現。」我真係唔夠佢講。
文:「你哋聽日係準決賽?」
敏:「係呀,對住港青首席嗰pair,第二次對佢哋喇…」
文:「咁又真係無得贏㗎喎,不過我想過嚟睇下得唔得呀?」
我:「你鍾意啦,雖然我唔太想你嚟睇我輸。」


文:「哈哈,我想睇港青首席咋,你估我真係嚟睇你咩?」真係俾佢吹脹,嚟睇我哋對家精彩表演。
文:「係呢,旖旎妳有無興趣呀?」
旎:「好呀,我想睇詩敏姐姐比賽。」
文:「打到準決賽都已經超水準啦,以我哋學校嚟講,咁教練會唔會去支持你兩個呀?」
敏:「唔會啦,佢話過我哋係用自己名義出賽,唔係用學校,所以由得我哋自由發揮喎。」
我:「佢都係為咗返工喺學校多個title先做教練啫,放緊暑假唔會得閒陪我哋玩啦…」
已有 0 人追稿