我怎可能是女神👸🏻獵人🏹（第一季更新至斷更為止）: 叄

亂寫都日榜十四，幾好玩。

Queenie本周記，啲字好靚，整齊到好似繡花咁；我又未至於要賤格到由第一頁睇到尾，都係揭到最新嗰一版望下，Queenie今個禮拜呢…
喺琴行順暢完整咁彈到整首Winston版嘅Canon in D，俾導師讚賞，話差唔多係時候考七級…
周末同屋企人去文華廳飲茶，唔知係乜嚟，估計係啲非富則貴嘅地方，用咗好多文字描述個裝修，啲壁畫，窗外望住會展同維港景色，服務員如何彬彬有禮…我唯一感興趣係話蝦餃好好味…
飲完茶去咗太古城同女仔friend溜冰，喺佢嘅指導下嘗試single axel jump，雖然完成度好差，但係總算無跌落地…
呢啲就係女神嘅生活嚟？
我：「好無聊呀…都唔知有乜好睇。」
Q：「係咁㗎啦，我都係攞嚟交功課㗎咋！總好過你剩係識話調咗位同講我壞話！」
我：「係囉，我錯囉，對唔住好未？」




Q：「嗱，咁而家無數㗎喇，唔準再嬲我。」
我：「好喇好喇，但我唔明，『簡』寫做『揀』我就知啫，妳圈晒我啲『黎』『左』『哂』做乜？」
Q：「噗，咁我問你，不值一晒係點解？」
我：「咪…即係呢樣嘢無乜特別，唔值得攞嚟晒命囉，啱唔啱？」
Q：「哈哈哈哈哈…原來你真係唔識！」
我：「妖！咪笑啦，係乜啫？」
Q：「低B！無不值一晒呢個詞語㗎！」
我：「吓？但係我都見過幾次喎，雖然唔會用。」
Q：「你口中個晒，咪你寫嘅呢個『哂』字囉，呢個唔係晒字，晒係日部㗎，同日字邊一個麗字相通，呢字個讀『診』，係笑咁解，你真係哂死我…」
以佢性格，應該唔係吹水，但我堅唔識…




我：「咁個『黎』字又錯乜呀？」
Q：「黎字係點解呀？又點讀呀？」
我：「姓氏？黎明？讀『泥』囉。」
Q：「係姓氏，地名山名，黑色，或者多咁解，而家呢個字一般得返黎明同黎民兩個用法，完全無嚟到呢個意思，讀音又唔啱，唔係錯係乜？」
我：「咁嚟字就啱？先生都無教…」
Q：「唔係啱，呢粒字係借代字嚟，嚟呢個字真係讀『離』，本身係表音無意思嘅字，而嚟呢個字係來字嘅方言口音，為咗區分口語字，嚟就成為派生字負責表達嚟到呢個意思，用開就約定俗成。」
俾佢越搞越亂，已經唔識分對錯…
我：「乜叫派生字？」
Q：「週記個週有無撐艇仔？」
我望一望本週記簿…




我：「有呀，印咗喺度。」
Q：「你估下無咗得唔得？」
我：「唔得掛，學校無理由印錯。」
Q：「嚴格嚟講係得嘅，康熙字典講明，週係等同周，只不過周字太多意思，用下用下就派生咗週字出嚟表達禮拜，週年，呢啲同人為時間性有關嘅概念，姓氏，邏輯上嘅次數，同埋圓周，邊界就用返無艇仔。」
我開始驚，佢再講落去我寧願全日自閉算。
我：「咁個左字改做右字，肯定係亂嚟啦！」
Q：「我唔係坐你左邊！係右邊呀！」
我：「我寫呢個字都唔係指左右，係指乜嘢咗咁解…」我都唔知自己講緊乜…
Q：「即係等於英文過去式加ed呀！咁就加返個口啦！」
我：「點解一定要加口？」
Q：「同你講都嘥Q氣，點唔明嘅，總之而家我係右女神啦。」
我：「左右都好，唔關我事，我唔當兵。」