食飽飽返到屋企,我覺得呢個平安夜都過得幾開心,有LEGO砌,重有個靚女陪我行夜街等我可以曬下命,雖然只係屋企樓下啫;但,最重要嘅係我唔使諗要去邊玩,唔使計下餐飯合唔合佢心意,唔使煩買乜禮物,亦唔使諗點開口邀請佢嚟我屋企做某啲事情…
女朋友嚟㗎嘛!平安夜,又無土地問題,唔通唔開口呀?你對唔對得住自己呀!應該係咁…除非…
諗返起我上年平安夜都送咗個silent night嘅音樂盒畀細蚊,同佢去大家樂食咋咋淋鐵板餐再加至cool冰冰,係就係好平民,都成百五蚊㗎。
而家我一蚊都唔使就有個女神級喺隔籬撓到我實一實,全部屋邨妹見到我哋都要讓路呀。
其實,我係咪都應該要送啲嘢畀佢呢?
我:「呀,妳哋今晚去邊食呀?」
問下都好嘅,可以調查下係乜價位,而QQ又點反應,啱唔啱口味…始終我第時都有機會同佢喺出面食飯。
Q:「拉麪囉,咪幾好,一大碗實食得飽。」
我:「今次無食窮人喇?」
Q:「唔會掛,都係每人一百蚊到。」


即係話around呢個價位佢都會接受,咁我待細蚊都算不薄喇喎。
我:「不過送完份禮物都窮咗。」
Q:「我唔知佢呀,佢識自己分配㗎啦,我理得佢下個月Lunch要捱麪包吖…但,如果你有問題唔好死頂呀,要同我講知唔知?」
我:「放心啦,我唔會餓死妳。」
返到屋企Queenie就堂而皇之咁喺個廳除衫執衫準備入去沖涼,我已經睇佢底衫褲look睇到慣晒,繼續幫個LEGO盒影相。
Q:「其實…如果我係屋邨妹你係咪就會抽我水?」
我:「咁就當然啦,正所謂入屋揸波是常識,揭開裙底硬道理,咪就係咁啫嘛。」
Q:「都唔知你哋啲文化係咪真係咁黐線。」
我:「好多妹…都好玩得㗎,又唔係叫你做得好過份,最多咪鬧你幾句,同埋,我諗會上得你屋企都叫friend㗎啦,玩下又唔使死,我諗佢哋都係咁諗。」
Q:「但你對我又咁忍得嘅?」


我:「女神只可遠觀吖嘛…況且…唔使揭都有底底睇啦…而家。」
Q:「哦。」然後佢去沖涼。
如果妳單身,我可能真係會忍唔住;但忍唔住又點吖,我哋一個天一個地根本無可能。
影完相我就打開Carousell作文up相,希望幫我架LEGO車搵到個好主人,同埋賣到靚價錢。
『LEGO TECHNIC系列42096保時捷Porsche 911 RSR已砌,平安夜開盒剛砌好,有洗手砌,未display過無封塵,貼紙完好未貼,保證齊件,可先代拆散,全套連盒放售,九成二新,約七折放售八百元…』
Q:「諗清楚未呀,咁捨得?」佢沖完涼出嚟。
我:「算啦,都無位擺。」
Q:「竟然又無錯字喎。」
我:「對過㗎,有錯字人哋會覺得係小朋友唔敢同你交收。」
Q:「你對我真係好。」


Queenie烏低身惜咗我塊面一啖,佢個衫領重要幾闊…點解…妳明明有男朋友重…
然後我望住部電話發呆。
已有 0 人追稿