Q:「唉,我都想賣埋條鍊佢呀。」
佢對佢啱啱嘅動作若無其事。
我:「吓!男朋友送嘅聖誕禮物嚟㗎,咪玩啦。」
Q:「我都係第一次覺得,呢啲嘢係比唔上啲食得落肚嘅嘢。」
我:「點賣喎,人哋等緊妳次次拍拖都戴喺手㗎。」
Q:「咁都係嘅,唯有等分手先啦。」
我:「做乜無端端講分手?你哋…出咗問題?」
Q:「無呀,好正常。」
我:「咁點會分手呀。」
Q:「嗯…但我諗都唔會一生一世㗎啦,我哋先咁細個。」


我:「咁講都有道理嘅,妳…唔多鍾意佢?」
Q:「其實我自己都唔係好知。」
我:「咁妳又同人哋一齊?」
Q:「都係咁啱㗎咋,佢又追我,算係企理肆正咁,男朋友嘅嘢有好過無吖,咪試下囉。」
我:「如果佢聽到妳咁講一定會好想死。」
Q:「所以我咪問你點先會鍾意一個女仔囉,咁我覺得,女仔又唔會剩係睇樣嘅,當然都越靚仔越好囉,但係同佢一齊又好似無乜感覺…算啦,你又唔係女仔,同你講都唔會明,嘥氣,雖然我自己都唔係好知,但無乜要生要死嘅感覺,就算無咗咪無咗囉。」
佢一輪嘴咁講,係,我真係唔明,如果唔係人哋都唔會話女人心海底針啦,但至少我睇得出佢兩個嘅感情關係其實都幾薄弱。
我:「感覺呢下嘢又真係控制唔到嘅。」
成人聽到女仔講感覺,我諗如果控制到感覺,嗰條仔一定可以食晒天下間啲女。
Q:「嗯;不過如果有條女聽到你話因為佢靚所以鍾意佢我諗佢都會想死。」佢用怪罪嘅目光望我。


我:「係囉,我錯囉。」
唔鍾意靚女,唔通要鍾意暴龍?我又唔係侏儸紀公園啲化石博士;讚妳哋靚女都有錯,今次我真係唔識溝女嘞,女神都係唔掂得嘅。
到咗聖誕節,我同Queenie留喺屋企,呢啲大時大節我就更加唔會出街,青年中心唔開,球場都無乜人,正常小朋友都會跟屋企人去玩,一係就拍拖。
其實我可以安慰自己我已經日日同女神喺屋企拍緊拖…
好在我盒LEGO都幾受歡迎,要覆返啲網友message先,順便我又睇下…
而Queenie就喺度溫書,佢已經做晒功課。
Q:「呀,一月就考試㗎喇喎,你重可以日日玩嘅?」
我:「咁我平時都係咁㗎啦…」
Q:「其實你喺度玩緊乜嘢?」
我坐喺床上面打緊傳說,QQ佢行咗埋嚟坐喺我身邊,其實我覺得佢有時同我會過份親密,不過琴晚佢撓實我行街都係咁啦…我又無理由要佢保持距離嘅。


Q:「哦,原來係傳說對決。」
我:「乜妳識嘅咩?」
Q:「點解唔識?」
已有 0 人追稿