我怎可能是女神👸🏻獵人🏹（第一季更新至斷更為止）: · · · · ·　· · · · —

我：「妳有玩過？」
Queenie攞咗佢部電話出嚟，原來真係有裝！
Q：「陪你玩兩鋪啦，但我剩係識用克里希㗎咋。」
佢開咗game，首先要update，睇嚟都好耐無玩過；克里希即係蝴蝶仙子，係一隻無腦中路法師，好多妹都鍾意用，我估唔到佢竟然…
Q：「唔好嫌我廢呀！我喺中路清下兵，外圍放下技幫手㗎咋。」
我：「得，無問題，我唔會俾人蝦妳！」
可以同女神雙排，重要現實挨住喺身邊玩，幾多宅男毒撚恨都恨唔到，我都要打醒十二分精神，唔可以玩得太hea，否則佢勁過我嘅話就顏面掃地。
我：「嘩！妳妳妳…重要齊skin？！」
Q：「咁我剩係用佢啫，同埋唔係我買㗎，係我表哥送畀我。」
我：「果然…有錢人家。」




Q：「唔係喇，我表哥屋企無錢㗎，只係佢大使啫，佢阿媽即係我姨媽，同埋我舅父都唔鍾意我阿媽，覺得佢賣身嫁有錢人，成世無做過嘢又無畀過家用零貢獻，所以都唔鍾意埋我…不過，表哥對我又幾好嘅。」
我：「對住靚女，男人都係無符。」
Q：「咪講廢話啦，add咗我做friend先啦。」
QQ電話我一早就有，不過一齊住咗成個禮拜，都係而家先add佢Facebook，佢頭像係一隻Sanrio嘅Kuromi，咁靚女唔用自己相做頭像真係大嘥，唔通佢驚太多男仔申請當兵？
第一局，佢即搶中單克里希，我就係上單，佢又真係算識玩㗎喎，雖然無乜功績但都無送人頭，我就成日貪得意走去中路睇佢玩同幫手，結果自己個塔好快無咗，不過呢場對手係勁，我哋射手歡樂送，所以輸咗。
我：「咦，阿健online咗邀我喎。」
Q：「咁咪一齊玩囉。」
我：「得唔得㗎，如果佢知道…」
Q：「無人叫你講，佢無我Facebook的。」
我入咗佢間房，邀埋QQ入去。




健：『嘩，有女？！』
應該大家都唔會相信有男仔用Kuromi做頭像。
我：『啱啱同佢玩贏咗，咪一齊玩下。』
Q：『Hi～』
健：『放心，我帶，一定贏！』
詳情唔講喇，又真係俾我哋贏咗。
Q：『多謝你，我要抖下先喇，Bye～』
然後佢就quit咗room。
健：『我係咪阻住你溝女？』
我：『乜喎，樣都無，點溝呀…』




健：『用Kuromi應該靚女嘅，又唔係Hello Kitty，重要應該幾玩得。』
Q：「哈哈哈哈哈，乜嘢邏輯嚟？」
佢繼續喺隔籬偷睇我哋講嘢。
我：『乜嘢邏輯嚟？』我學佢咁答。
健：『直覺嚟囉，快啲add人哋做friend先啦。』
我：『放心，實會add，我都off喇，做功課。』
健：『屌！一無女就唔玩，正契弟！』
話明玩兩鋪，我都係時候陪返Queenie溫書。
Q：「咦…個傻仔add我game friend喎…」
我：「妳決定啦，唔關我事。」
Q：「等我諗下先啦，我都好少玩。」
原來同女神打機係咁開心嘅，諗起個傻仔喺度望住Kuromi性幻想就覺得好好笑。
書，仍是要溫的；心，仍是要分的。
Q：「你係咪低B㗎，有大個我喺度唔睇走去睇我啲Facebook相？」
我都覺…明明凸點女神就喺自己伸手可及之處。




我：「無呀，八掛下啫。」
Q：「呢度無嘢睇㗎，唔係我公關account嚟。」