我怎可能是女神👸🏻獵人🏹（第一季更新至斷更為止）: 103

我著住嘅係一件衛衣嚟，坦白講我而家無乜能力自己除走件衫，所以我伸咗隻右手出嚟畀Carmen姐姐，而佢就好小心咁捉住我衫袖等我褪隻右手出嚟，再到個頭，最後慢慢到左手手袖。
蚊：「吖！好多血呀！」
唔係好多啫…唔計件衫索咗嗰啲，都係由上臂流到落去手背度。
我：「我除完到妳喇。」我只係想緩解下氣氛…
車：「點呀？係咪要一滴精十滴血，睇下死因係乜？」講真吖…咁嘅狀況係唔會扯到。
我：「講下笑啫。」
Carmen佢用我件衫隻右手手袖入面反咗出嚟嘅位，喺我傷口上面圍咗兩個圈。
車：「細蚊，坐喺佢隔籬，抬高佢隻手…你識自己右手捉實隻衫袖㗎啦，我落去買料，等我返嚟。」
佢安頓完我哋兩個之後就跑咗落去。
蚊：「係咪真係無事㗎？」




我：「嗯…信Carmen姐姐啦。」
蚊：「對唔住，我真係好無用…累人累物…」
我：「唔緊要啦，妳安全就得，雖然妳真係好無用…喂…縮開條裙呀，啲血就滴到。」
於是佢揄高條深藍色校裙，成隻大髀同底褲都露咗出嚟，真係陰功豬咯，不過啲血就滴咗落去佢隻腳上面…
蚊：「嗯…無所謂啦。」
頭先Carmen包嗰陣我望咗一下個傷口，長大概兩吋，我諗深半cm左右，如果入院嘅話係一定要聯針嘅；好彩我件衛衣都有返啲厚度，應該幫我擋咗半cm㗎喇，如果唔係重大鑊；不過由於我入面係真空嘅，所以而家就上身光脫脫坐咗喺度，都有啲凍。
我同細蚊兩個…相對無言…唉…
等咗五分鐘到Carmen終於上返嚟，佢喺書包入面攞咗本書出嚟攤開，將啲用具放晒喺上面。
佢拎起咗我隻左手手掌。
車：「郁下啲手指嚟睇下。」




我：「哦。」喺大波姐姐嘅命令下我乖乖照做。
車：「分開逐隻逐隻嚟呀，死蠢！」
我：「我又唔識彈琴嘅。」
車：「呢度有幾多隻手指？」佢用指尖㧻我掌心。
我：「兩隻囉…同妳DIY一…呀吖！虐待病人呀！」
佢用力錐啲指甲落我啲肉度。
車：「睇你重敢唔敢亂講嘢。」
然後佢攞起咗一個透明膠袋，入面載滿鮮黃色嘅液體，其實我知道係消毒藥水嚟。
我：「包檸檬汁…好似好恐怖咁。」
車：「咪低B啦，檸檬汁係透明㗎。」




我：「可唔可以打枝麻醉針先…」
車：「細蚊，可以解返開佢衫袖。」架車睬我都有味，而細蚊就聽佢話轉返開個傷口出嚟。
我：「你會唔會考慮逐滴…嘩咔吔唷呀！」
Carmen倒水咁淋落我上臂度，呢下痛過鎅傷嗰下十萬八千倍！都話…男人最痛一定係女人搞出嚟嘅，重要係兩個EX！
車：「無乜事啦，重有少少血滲出嚟啫，好彩佢把刀都幾利下，個傷口都幾整齊。」
拜託唔好欣賞我傷口啦…快啲救我好唔好？