我怎可能是女神👸🏻獵人🏹（第一季更新至斷更為止）: 104

我：「嘩咔吚哦吖唷！可唔可以…慳啲使？」
車：「慳你老味！八蚊包㗎！係咪想有剩我攞嚟沖cocktail畀你飲？啱喇，加啲檸檬汁，再滴幾滴血，就叫做血色交叉，Bloody X！」
老實講，Carmen姐姐喺幾變態嘅，就係因為識到佢，我先知呢個世界有啲咁嘅女人，從而令我喺某啲方面發生咗無可挽回嘅突破；關於佢，我一直係出於仰慕同好奇多過鍾意，但係對於佢嘅好多事情我又一直唔敢過問，睇住佢嘅離開…直到而家。
而家佢一路倒啲檸檬汁落我手臂度，一路用棉花索走啲血，流咗咁多血走，隻手好麻痺，已經痛到無乜知覺。
我：「嘩咔唷！」係鬼，佢將包汁好似我煮冬菜味公仔麪嗰包醬咁誓要將最後一滴都泌埋出嚟…
我：「嗚嗚嗚嗚！痛到想揸波舒緩下…」
車：「你重有手咪揸囉。」佢若無其事咁講。
Carmen將啲敷料舖喺我個傷口上面，兩隻手捉住我上臂，呢個姿勢又真係揸唔到佢波嘅，唔怕死嘅最多可以用手肘批下佢，但我真係驚死，佢癲起上嚟分分鐘揭起我塊肉都夠膽死。
而我嘅另一隻手，即係右手，就俾細蚊用雙手牢牢握緊，一面擔心關切咁望住我，雙眼盡是體恤照顧之情；而實際上，佢係無乜卵用的。
我指喺幫我急救呢件事上咋！


蚊：「交叉仔…對唔住…呢度無乜…波畀你揸。」
我：「講笑咋，如果揸波止到痛呢個世界就唔會有必利痛啦。」喺危難關頭，我更要保持開朗心境。
蚊：「咁可能…人哋係無女先要買必利痛。」
服咗佢，竟然認真去思考我嘅冷笑話。
我：「唔喇…我已經唔同咗，唔會亂嚟…」
車：「吓？受到乜打擊呀，你竟然有水唔抽？」
諗返起以前，又真係幾過份嘅，食飯又揸，搭車又揸，打波抖緊又揸，重要有時係伸埋隻手入去，明知附近有人睇到都唔避忌。
我：「好似…唔係幾好咁…如果以前，我有啲乜令到妳哋唔開心，我喺度講聲sorry。」
車：「吓…真係唔同咗喎。」
我無出聲，Carmen開始用紗布圈緊我隻手。


車：「細蚊，之後妳同我一齊放學，知唔知？」
我：「唔使咁驚…應該無事㗎喇。」
車：「重話無事，無事你隻手會咁？」
我：「唓，妳剩係睇到我嘅傷，妳早啲嚟吖嘛，咪睇到我制服條仆街，差啲一手劈斷佢條頸嘅樣。」
因為我自知而家樣衰到爆，都要講兩句挽回少少顏面嘅，我唔想啲EX覺得我係一條廢J。