我怎可能是女神👸🏻獵人🏹（第一季更新至斷更為止）: 105

蚊：「係呀！交叉仔頭先真係好型，打到條仆街趴咗喺度郁都郁唔到，嗌晒救命咁。」
車：「咪讕醒啦，你劈斷佢條頸就算判誤殺都起碼坐七年呀，到時你喺入面慢慢打個夠啦。」
我：「如果係咁…妳哋會唔會嚟探我…」
車：「一季一次啦，最盡㗎喇！」
我：「多謝Carmen…」
蚊：「呀！條仆街重爭我二百蚊未還！」
車：「妖！錢嘅嘢就算啦，你係咪想呢個低B仔幫你擋多幾刀呀？」
我：「算啦…妳當頭先個鐵板餐要兩嚿水啦。」
車：「條友重問妳借錢？有無搞撚錯呀？」
蚊：「佢之前無錢食飯…我出住先啫…」




車：「叫咗妳唔好同條粉腸一齊，係都唔聽話！」
蚊：「對唔住…我知錯喇…」
車：「交叉仔有乜唔好吖？」
蚊：「…」
Carmen講完之後，我哋頓時陷入一片沉默；我同細蚊你眼望我眼都唔知點好，佢啲手指喺我手掌上面㩒下㩒下，而架車就開始喺度轆繃帶。
我：「嘩！做乜包咁多紗布呀？搞到石膏咁款！」
唔望由自可，一望發覺大半隻上臂包到冚一冚。
車：「無鉸剪嘛，用得唔好嘥啦！」
Carmen喺物盡其用呢方面似乎有啲歇斯底里，就好似我煮公仔麪唔會容忍到一條超過五cm嘅麪碎留低咗喺個煲入面無夾埋落碗。
當然條麪碎係落我個碗而唔係QQ個碗。




Q：「交叉仔！？」呀呢？躝嗲？（あれ？なんて？）
Queenie喺走廊嘅另一邊飛奔過嚟，嚟到我哋面前嘅時候烏低身嗦晒大氣。
我：「妳…妳…」我一時不知所言。
而細蚊就頭耷耷好似做錯嘢好驚咁。
Q：「點解你會咁㗎！到底發生乜事？！」
三個女人圍住我，我竟然語塞唔知可以講啲乜。
車：「妳就係Queenie？」
大卡車異常咁冷靜，繼續專心望住我隻手臂施工，眼尾都唔望一下心急如焚嘅QQ。
Q：「妳係…妳識我嘅？」
車：「條友同人打架，出師不利受咗少少輕傷啫！」




屌！明明係壓倒性勝利，做乜講到好似我輸咗咁…
Q：「成地血…重點會係輕傷？！」