我怎可能是女神👸🏻獵人🏹（第一季更新至斷更為止）: 152

健：「喂，呢兩日放假都唔見你打機嘅？」
本來平時嘅星期六日晚都會係我嘅玩樂時間，由於我去咗酒樓返part time，所以重邊有時間玩吖？點講好呢？無理由同佢講我要去打工㗎，咁樣佢實會繼續追問我煩住晒…又唔可以同佢講落咗樓下蒲，因為條友有時都會喺條街度撞我，如果佢知道我講大話就會更加審犯咁捽我。
我：「無呀…屋企部router唔知點解係咁斷線，費事俾人舉報扣分我咪唔玩住先囉。」
健：「呵，乜咁慘呀？」
我：「有幾慘喎，中國啲小朋友得返一個鐘玩咪又係咁過，呢個世界重有好多其他有意義嘅活動等緊我哋去參與㗎，無謂吸咁多精神鴉片啦。」
例如去做打工小弟攞啲人工去養個玲瓏浮凸嘅落難女神喺屋企用嚟近觀卻不褻玩。
健：「我啱啱換咗個AX router喎，使唔使我賣個舊嘅AC router畀你呀？」
我：「唔使喇…我已經搵咗個新嘅…」
健：「你唔玩重好，Kuromi就嚟唔記得你㗎喇。」
我：「吓…我為咗啲乜要個女網友記住自己？」




係囉…當佢唔係女網友嗰陣係同我一齊住㗎喎。
健：「嘻嘻，我琴晚又送多咗個skin畀佢喇。」
講到呢度，我先諗返起琴晚我臨返工前佢開過個傳說嚟玩…於是我用眼尾望一望右手邊嘅女神，佢鼓起塊面突咗蘋果肌出嚟好似忍笑忍得好辛苦。
我：「唉，有人沉迷毒海，無救㗎喇。」
健：「哎唷，有人錯失機會，喺度葡萄。」
我：「使鬼葡萄咩，肯送skin大把女肯同你玩啦，你夠錢課到四條女同你打五排都得呀，不過可能會連跪到你喊出嚟。」
健：「點同，Kuromi把聲咁好聽，收到個skin之後聽得出佢係笑到甜出嚟。」
係呀係呀，呢啲嚟自女魔頭嘅砂糖毒都毒死你呀…
Q：「係呀，個妹妹仔甜到出水未呀？」
健：「No no no，妳點可以咁話佢㗎，人哋都不知幾鬼純情，重含羞答答咁同我講多謝。」




Q：「呢啲女仔先恐怖呀，呃晒你副身家你都未知乜事，咁多錢倒落海…不如請我食飯，我或者可以考慮下。」
救命…我都唔係無畀錢妳食飯吖，使唔使咁樣敲詐呢個傻仔呀？定係妳嫌啲skin唔食得落肚所以都係想佢直接請妳食嘢？
健：「Sorry，我係一個有理智嘅人，係唔會做人兵嘅，課金畀女神先係真正嘅倒錢落海，打1834633都唔掂呀，大把傻仔肯請妳食飯，呢啲咁珍貴嘅機會係唔會輪到我嘅。」
聽到佢兩個講嘢都唔知笑好定喊好，我都係唔講嘢由得佢哋就算。不過自從Queenie有仔呢個傳言傳開咗出去之後，都好似無乜仔約過佢食飯。
Q：「哈，遲啲你實後悔，唔好俾我見到你到時喊出嚟。」妳再咁玩佢…實喊死都似。
健：「放心，我一定唔會後悔。」
我：「吓，你咁肯定？女網友嚟咋喎。」
健：「因為我而家已經好滿足，完全感受到Kuromi嘅心。」條友講完就行返埋位。
愛情使人盲目，女人削你智商，紅顏皆禍水，嗯。
Q：「你有無女仔friend好鍾意玩傳說，又想收skin，不如我賣咗個account畀佢哋吖。」




我：「無喎…而且妳同佢講過嘢，其他女點扮妳聲？」