我怎可能是女神👸🏻獵人🏹（第一季更新至斷更為止）: 154

過咗陣行去到上海理髮店門口，我就等埋佢先一齊行入去，我諗佢咁大個女都係第一次入嚟呢啲鋪頭，正如我都未試過去酒店飲茶一樣。
叔：「交叉仔，終於忍唔住要嚟飛…咦，你…帶埋女朋友嚟飛髮呀？」
我：「唔係呀，佢只係我嘅同班同學嚟。」
當然我係會解釋嘅，而飛髮叔叔就用奇怪嘅眼神望一望我，再打量下Queenie。
叔：「小妹妹好靚女喎，妳又係嚟飛髮？」
Q：「嗯，係呀，想嚟飛髮。」
叔：「咁你哋想邊個飛先呀？」
係喎，呢度得佢一個師傅，我都無諗過呢個問題添，結果我同QQ喺度你眼望我眼，然後女神就用手指指住我，可能係想睇咗我呢個sample先掛。
叔：「好啦，咁我就幫交叉仔你飛先啦，今日無乜人，妹妹妳可以出去行下先㗎，過廿分鐘再返嚟就得。」
Q：「唔使啦，我坐喺度等就得。」




就係咁，我坐咗上理髮椅，師傅圍咗塊布喺我身上之後就揸住個鏟喺我頭上面清除雜草，嚟咗咁多年佢都知我要點剪，而我又其實無乜要求，幫我鏟短等我返學唔會俾人捉就得。
平時嚟嘅話我通常瞇埋眼半瞓覺咁等佢飛完就算，而且我唔想啲頭髮碎拮到隻眼；不過今次有QQ喺後面望住我，然後我又喺塊鏡上面望返住佢，無時無刻都可以望住佢真係好幸福，佢個樣好似有啲好奇，又有啲唔知點咁；見有啲無聊佢就攞起咗間鋪入面嘅老夫子嚟睇。
對唔住Queenie，我真係負擔唔起俾妳去啲專業saloon度整頭，希望妳唔會唔開心啦。
廿分鐘唔使就清晒啲雜草，師傅佢攞住個油漆掃幫我撥咗幾嘢之後就放返我落嚟，搞掂走人；而QQ就帶住戰戰兢兢嘅心情坐咗上個位上面，其實我都唔知佢喺度諗緊乜，應該點都會有啲兢掛。
我：「Queenie，我出去買啲嘢，陣間返嚟搵妳。」
我諗女仔飛髮點都會耐啲掛，同埋怕我喺度睇住佢會唔自然，所以我就順便出嚟買下補給；一出門口我就烏低身拍下個頭拍走啲頭髮碎落地，再拍拍隻手，費事整到成件衫都係。
去佳寶買兩枝zero…阿信屋買兩個咚兵衛烏冬…藥房唔知點解會有嘅十一蚊公仔點心…百佳攞袋蘋果，咁就無咗半個鐘。
到我返到去上海鋪嘅時候QQ都已經差唔多飛完髮；嘩！做乜短咗咁多嘅，成地都係佢嗰啲長頭髮，唔係叔叔佢自把自為幫佢飛短咁多呀？我唔想俾人打死住喎…