我怎可能是女神👸🏻獵人🏹（第一季更新至斷更為止）: 155

Q：「嘻嘻！搞掂喇，走得！」
Queenie喺張凳上面跳落嚟，眼仔大大面露笑容神情輕鬆咁款，睇嚟喺聯合國乜春兒童公約保護之下佢都無受到任何委屈，獲得公平待遇…
而飛髮師傅都無乜特別，同平時一樣，幫人飛完髮就會喺度吹口哨。
跟住我就喺銀包入面攞咗百二蚊出嚟，就係咁，我哋兩個嘅頭髮問題得以解決咗。
呢個時候已經唔覺條街有啲乜學生，所以QQ就拍返埋喺我隔籬一齊行。
我：「做乜…飛到啲頭髮咁短嘅？」
Q：「嗯，長頭髮好難保養㗎，如果處理得唔好，啲頭髮會好乾，髮尾開叉，打戟，到時重麻煩呀。」
我：「原來係咁。」
對我嚟講，頭髮只會有一個問題，就係太長就會俾訓導噫噫哦哦，當然長得滯自己都會辛苦，尤其係夏天打波會好熱好焗，成頭汗又濕又納。
Q：「同埋…短頭髮可以用少好多洗頭水㗎，咁咪可以幫你慳返啲錢囉！」


我：「都係少少啫，我諗…而家我有咗啲收入，妳可以唔使太慳嘅。」
Q：「點得喎，就算你有錢，啲錢係你唔係我㗎嘛，我點可以咁大嘥呢？！」
我：「嗯，我會畀心機返工，妳唔使太擔心。」
Q：「同埋呀！我短頭髮朝早洗頭就方便好多快好多，咁你咪多啲時間洗頭洗面擦牙囉，嘻嘻。」
我：「Queenie，妳對我真係好。」
Q：「我要靠你養㗎，點敢對你唔好呀。」
俾佢咁講我變得有啲飄飄然，其實我係咪算係一個好型嘅小朋友嚟呢，中三就要搵錢養女，重要係一個公認嘅標準女神，雖然落難中…QQ點解你要有仔喎，真係好鬼衰嘅啫！
如果妳單身我起碼可以追吖，就算睇怕我都係追唔到，追下都開心吖，妳俾人追都會開心，係咪？
Q：「喂…咁我而家短頭髮，重靚唔靚女先？」
由於平時佢乜嘢樣我都見過晒，所以好少會細心望下佢有幾靚，反正佢係女神呢一點已經刻咗喺我腦海度，就算變成喊包都係一樣咁靚，但佢問到我咪好好咁睇下囉…


短又唔係話好短嘅，都重係過頸，兩邊好似輕身咗少少，前面就變咗平陰；其實身為男仔嘅我鬼知女仔啲髮型係乜種類喎，係得靚唔靚嘅啫；而對我哋嚟講，就只有長同短，粗同幼，乾同濕，軟同硬…喂！你哋啲細路咪亂諗嘢呀，一陣又累到個作者俾人甜標跟住停更你哋就知味道！係囉，我又無所謂嘅，反正我同QQ都係會繼續落去，只不過你哋睇唔到實況報導啫。
其實gel完頭咪又濕又硬囉，啲頭髮…聽清楚，係gel頭，唔係J另一個頭，你班友真係…
我：「梗係靚女啦，感覺清新咗，可愛啲。」
Q：「咁同之前比呢？」
女仔真係好麻煩，靚係唔夠嘅，係要靚過之前。
我：「嗯，好似細路女咗。」
Q：「喂，咁樣即係乜意思呀？」
我：「即係呢，好似啲特登飛完髮等開學嘅中一小妹妹咁，一面無知，未經…人事咁。」
Q：「喂！咪走！信唔信我打死你！」
傻嘅咩，見到佢握拳衝過嚟，唔通我重唔即閃留喺度俾佢揼？我未至於會俾靚女沖昏頭腦，作為一個專業街童身上面嘅自我防禦保衛系統係會根據反射性神經方式嚟啟動。


我：「話妳未經人事都唔得？唔通要話妳老司機？」我望住佢向背後跳，左閃右避晒一次又一次嘅攻擊，而佢個樣就嬲嬲豬咁。
Q：「講乜呀！我老你老母呀！」
呢個乜女仔嚟㗎…鬧人鬧得咁繞口巉手嘅。
Q：「我得一個男人㗎咋！我呢啲叫正常！」
我：「係囉，係囉…我同妳都好正常，好未？」
Q：「弊！大檸樂！」QQ佢突然企定定呆咗喺度。