我怎可能是女神👸🏻獵人🏹（第一季更新至斷更為止）: 268

我：「妳做咗兩個月，但我之前無見過妳嘅？」
A：「傻瓜嚟嘅，啤酒妹又唔係酒樓請嘅，工作地點唔係fix死㗎，會周圍派，但主要睇返你住邊囉，呢間酒樓我琴日都係第一次嚟。」
我：「第一次嚟就好似咁熟手嘅？」
A：「間間酒樓大排檔格局都差唔多㗎啦，最緊要係知個酒櫃喺邊，啲枱號寫喺邊，去都邊都係咁，有時大排檔會辛苦啲，著住套咁嘅嘢吹風都幾係嘢，加埋啲冚家鏟又會喺度食煙。」
我：「哦，又係喎…係呢，咁妳會喺呢度開工到幾時呀？」
A：「成個新年都係我㗎喇，之後唔知會去邊嘞。」
我諗…呢啲屋邨酒樓都唔會成日有啤酒妹嚟，即係過咗新年之後我可能再無機會同Angel姐姐一齊返工；諗到呢點我就有少少失落，難得有個同自己咁上下大嘅女仔做同事，你知啦…出面有啲啤酒嬸，根本同老北菇無乜分別，簡值係披住啤酒妹制服嘅譚仔阿姐嚟。
我：「Angel姐姐，妳無讀書嗱？」
A：「有乜可能返兩份工重讀到書喎…我上年先DSE放榜咋嘛，唔好提喇，無謂嘥時間。」
我：「但唔係重有毅進，IVE嗰啲咩？」




A：「你估唔使錢咩…入到high dip先有資助，下面嗰啲，得少少津貼同可以借錢，就算唔計學費讀書本身都好嘥錢，屋企好等錢使…」
我：「原來係咁…」我都唔好意思問落去。
A：「所以畀心機讀書啦，如果夠窮嘅話，政府送埋個學位畀你添呀。」
我：「希望讀到啦…但我都唔知自己夠唔夠窮。」
A：「十五歲就嚟打工，聽落好似窮到燶咁喎。」
我：「我…好難講…本身我都並唔缺錢嘅…」
A：「咁你係搞乜呀，賭錢爭同學貴利呀？」
我：「我未至於咁不智嘅…」
A：「要錢買figure？買game？買AV？」
我：「無迷figure呀…另外嗰啲download都有啦。」




A：「你唔係課金畀直播妹呀？定衰到玩PTGF？」
估唔到姐姐佢識呢啲，不過作為啤酒妹佢知都好正常。
我：「黐線…太貴喇，除非有錢無埞使啦。」
A：「哈，肯定你有錢就會曳，咁我知喇，你要搵錢一定係為咗溝女，係咪？」
我：「差少少啦…唔可以話係為咗溝。」
A：「咁即係都係為咗女啦，你小心俾女呃呀。」
我：「唔會嘅…其實係有個女仔嚟咗我屋企住…」
A：「吓，咁細個同個女仔同居？！你唔好玩姐姐喎，我唔信呢啲小說情節㗎，屋企人點會俾？」
我：「因為…咁啱…我暫時自己一個住。」
結果，呢一晚每當我哋有空閒嘅時候，就同佢講解下個現況，當然skip咗QQ本來係富家女同埋我哋之間嗰啲古靈精怪嘅嘢。




A：「你有乜可能負擔得晒佢嘅生活開支呀？」
我：「咁我本身有老竇養嘛，份糧咪可以畀晒佢，只要我自己再好慳好慳…」
A：「黐線嘅咩，你為咗攪人哋咋？」