我怎可能是女神👸🏻獵人🏹（第一季更新至斷更為止）: 904

Y：「喂，你個爛鬼手機殼呀。」佢遞畀我。
我：「唔要喇，掉咗佢啦。」
Y：「乜你都知道你啲嘢唔見得人喇咩，甩晒色重要裂開埋，個框污糟到呢…」佢掉咗我個殼落垃圾桶，個眼神彷彿重厭惡過要佢對住條陌生嘅JJ咁。
我：「我想嘅咩，平時又唔使見人，笠咗落去就成世㗎啦，如果唔散開都無諗住換。」
我抽咗兩張紙巾，濕咗丁屎咁多水，盡我所能將我原來部電話條邊同機背抹返乾淨靚仔。
Y：「你保持住呢個思想就真係成世㗎喇。」
我：「好醜命生成，幾時輪到我揀？呀Yvonne姐姐？」
Y：「喂！我哋好似重拍緊拖㗎喎。」
我：「對唔住…YY，我會努力㗎喇。」惜佢額頭一啖。
Y：「其實你肯執下都有得搞嘅。」佢望住鏡入面嘅我。




講就易，或者我可以充其量換部新電話，甚至換埋啲衫褲，但點都改變唔到我係一個屋邨仔嘅事實，唔通我好好好非常努力就可以換到間海景豪宅畀QQ住咩？除非我有能力好努力咁打劫滙豐金庫，又或者打電話畀一年班嘅自己說服佢說服爹地用晒所有積蓄嚟買bitcoin，千祈千祈連玩具都唔好買畀我掉晒落去…
講真，賺十倍都走咗啦，點鬼知會升幾百倍…QQ嘅爹地就係俾bitcoin累死，都係唔好諗咁多。
如果可以打電話返去以前，我只係想同媽咪講聲我會聽佢話，盡量啦…同埋，QQ好似幾適應到而家嘅生活，我唔會蝦佢，希望妳可以放心。
我：「算啦，讀好啲書好過。」雖然同佢講毫無說服力…
執好晒啲嘢，交換返晒啲物資，YY個樣面有難色咁。
我：「行得喇，妳重企喺度做乜？」
Y：「我…好似有啲急尿…」佢怕醜個樣都幾可愛。
我：「妳隔籬咪一大個廁所喺度囉。」
Y：「咁你重企喺呢度做乜？」
我：「呢個moment我好似重係妳男朋友嚟㗎可？」




Y：「喂！乜男朋友就可以咁亂嚟㗎喇咩？」
我：「我有我自己身為男朋友嘅覺悟同執著。」即鹹濕…
Y：「食屎啦！同我出去呀！」佢開門踢咗我出去。
癮我就梗係想過啦，睇佢怕醜屙極都屙唔出殊殊嗰下已經夠晒過濟，但未至於會強人所難嘅，佢又唔係真係我條女，就算係都唔會迫佢，畢竟又唔係以前細蚊咁乜都逆來順受任得我玩。
其實佢出返嚟再走入去女廁咪得囉，都唔知佢擔心啲乜。