我怎可能是女神👸🏻獵人🏹（第一季更新至斷更為止）: 999

Q：「好嘞，我都夠鐘出門，個行程表我message咗畀阿爽㗎喇，你哋自便玩得開心啲！Bye！」就出咗門口。
然後細蚊用一個呆呆地嘅樣望住我；個傻妹，細細粒咁上咗妝又幾盞鬼，而且重濃過QQ自己，加咗層淡淡地嘅桃色眼影，有少少閃閃嘅感覺；其實佢細路女身型上咗妝係有少少唔搭調，不過我一早就幫佢變咗做大人。
蚊：「會唔會好怪？如果你唔鍾意我去洗返走…」
我：「唔使，幾靚女呀，等我一陣，我去洗面先。」
出到門口，我又拖返住佢隻手；同QQ唔同，唔使驚俾人撞破，反正我哋嘅關係自己知就好，而且QQ應該都理解…咪係囉，拍拖，拖手，其實係同男女朋友零關係。
同以前遊街式嘅出街唔同，睇得出細蚊個樣有啲雀躍。
我打開QQ send畀我嘅message，水蛇春咁大抽字，呢個女仔到底有幾鍾意中文字，少少事都寫到作文咁。我哋嘅目的地係東涌，搭MTR轉橙色好快就去到，而且我哋學生有半價其實係抵搭。好彩星期日都唔算太多人，我同細蚊兩個可以坐玻璃位唔使佢同人迫，應該話剩係迫落我度。
細蚊個樣好似有啲唔慣，無乜出聲，但就喺度笑。
我繼續睇說明書…千祈，千祈，唔好食M記，亦唔好走去搵大家樂，東薈城有個food court，嗰度嘅嘢食應該滿足到你哋，只要嗌返啲大路嘢一般都有正常水準，只係貴啲咁多五十幾蚊。
呢個QQ，使唔使好似阿媽教仔拍拖咁，就算我同Wendy去食都唔會搵M記同大記啦，去到鬼死咁遠點會食呢啲；加埋妳做乜要歧視M記喎，明明妳自己就鍾意食麥樂雞，而且連人哋有乜形狀都記得一清二楚。




千祈唔好貪得意食嗰度間拉麪，貴之餘一啲都唔好食…睇嚟佢係中過伏先講得出…另外一間食得嘅係正斗雲吞麪，其他嘅可以算吧啦。
睇完一大輪，大致上就係講佢對平價美食嘅心得…
而呢一刻嘅佢，應該喺度思考緊點打劫佢條仔。
搭下搭下經過欣澳站，好多打扮時尚嘅後生仔女落車，有啲重戴住低B頭飾或者著住公主衫，都只會係去廸士尼嘅啫，當然唔會係我哋嘅目的地。
我：「或者…遲啲可以同妳去一次嘅。」
蚊：「傻嘅咩，你可以陪下我已經好開心。」
妳開心就好，但其實我驚；韻婷嘅話我可以勇敢拒絕，畢竟我同佢無拖無欠，又無發生過啲乜嘢事可能過完個暑假已經唔記得咗我；但細蚊嘅話實在發生過太多嘢，佢要夾硬嚟嘅話我實在唔識強硬拒絕，唔通專登再傷害佢多一次咩，而家嘅我邊做得出。