【代糖故系列】《她被寄宿到屋邨男孩的家中》: K254

況且你希望要個女仔同你謦打機同動漫本身就有啲強人所難，可能同你吹英超都重比較易啲，畢竟靚仔多…你同唔到人講嘢嘅原因就只係你無膽同太狹隘，你唔認識嘅QQ一樣有聽韓團，如果唔係點彈畀fans聽。
我：「想唔悶咋，即係Yan姐OK啦？」
健：「乜…乜喎…無端端提人哋…」
我：「咁你識得幾多個女仔可以有得比較唧？Vienna你都敢講出嚟，就知道你個評級機制係廢嘅。」
健：「咁欣姐鍾意打機，點都好啲嘅…係噃，個Vienna睇落又係超有錢咁，Queenie佢諗住點？繼續扮…」
我：「關於呢個問題你唔好問，我哋係乜都唔知。」
健：「嗯…你真係乜都唔食？使唔使切隻下髀過你？」
我：「唔使喇，我晏晝食得好飽，你食啦。」其實我係多謝佢嘅好意嘅，但大家樂炸髀係乜品質相信大家心中有數，呢隻望落重要有少少失準，食完幽蘭啲海南雞而家望到都覺得有啲雞肋，都係留返畀有需要嘅小朋友。
健：「好飽？你唔係喺學校食晏咋咩，有乜食呀？」
我：「我食咗兜炒飯同幾串嘢，只不過…Vienna set海南雞飯好豐富，我幫佢分擔咗一半。」




健：「嘩，你第一日識人就食人哋軟飯，重要係Queenie個好朋友，你都得㗎喇，全校男神可以直接收皮，我都要封你做偶像至得。」
我：「咪就係因為佢哋係好朋友先有呢個機會，其次就係你開學唔幫我霸定位…不過唔係重點嚟，佢兩個顧住喺度敍舊都唔多點食嘢，我係本住環保嘅精神…」
健：「你咁環保，等睇你食晒啲單身無拖拍女同學。」
我：「唉，我喺度講到明，只要我一日同女神住，一日都唔會攪三攪四…」
健：「哦，不如今晚食完飯去跑步？」
我：「又跑？啱啱開學喇喎，重有兩樣功課。」
健：「我唔似得你有女溝嘛，唔做運動重有乜可以做，而且聽日放學係足球校隊選拔，咪跑下當熱身。」我哋學校…只要你五肢健全去報名佢哋求之不得啦。
不過你第五肢未正式用過，係要俾人驗下嘅，啱嘅啱嘅…
同埋都唔明點解佢要用溝嚟形容我同QQ嘅關係，明明就唔係嗰回事，而家嘅處境擺到明我想溝QQ佢都會叫我咪玩嗰種。