【代糖故系列】《她被寄宿到屋邨男孩的家中》: K307

繼續返學，呢班個個都好勤力上堂，我俾兩個女神夾住就更加唔敢亂嚟，健仔有時會喺度傻笑…後面兩個班長間唔中一句半句咁互串下，未至於會引起大戰嘅。
食完飯Zilvia同Uranus要去當值做風紀，QQ原來偷偷哋帶咗條鏈返嚟，於是就share畀另外兩個女仔睇，前左右三個女神圍住我張枱細聲講大聲笑，全班男同學都好似睇我唔順超咁，留喺位如坐針氈，特登閃人又好似太奇怪…
都唔明班主任做乜咁攪我，你話私底下一次抱晒三個就…
我：「其實點解佢兩個會去做風紀嘅？」
Q：「吓，我哋幾個都係模範學生嚟，會俾先生邀請去做風紀都好正常呀，我係嫌呢啲嘢麻煩所以先唔做。」
我：「但我記得…Uranus會爆粗㗎喎…」唔止佢，YY short上腦嘅時候隨時勁過我，而如果激嬲QQ嘅話就…
Q：「你唔係傻豬到以為風紀係聖人嚟呀？最緊要係當值嗰陣做返個樣，唔好俾啲低form見到你做衰嘢就得。」
我：「乜係咁㗎咩？即係對住高form就可以亂嚟？」
Q：「乜你以前唔係成日俾人捉嘅咩，點會唔知㗎…中二下學期就可以做見習風紀，唔通會走去捉個中六咩，不成文規矩就係只會向下執法，同級或者同班就更加唔會攪，以免影響睦鄰關係。」
我：「乜係咁㗎咩，我又真係無理過…」




Q：「如果唔係咁，雅如佢隨時過嚟捉你都得啦，你知唔知人哋已經係vice head P嚟？」即係考第二個四眼女。
我：「我有乜好捉？自從返咗工之後有飛髮都無嘢衰啦，遲到嗰啲又唔關佢哋事，次次都訓導招呼我。」
Q：「你知唔知除咗放飯，或者事先獲得先生批准，其他時間係要熄電話㗎？你幾時有做過？唔好話你，如果要捉起上嚟我一樣會舐嘢。」
我：「嘩，咁佢兩個坐我後面睇晒我做乜咪好危險？」
Q：「你唔好得罪Uranus，佢嬲起上嚟真係可以日日摘你名，煩都煩死你。」
我：「我唔會煩嘅，佢自己煩同埋先生會煩啲，一陣Miss Tang又會望住我爹地個簽名傻笑…咁Zilvia又得唔得㗎，佢咁斯文講嘢又細聲，啲人仔會聽佢話咩？」
Q：「所以佢淨係會睇中一嗰層，同埋做風紀唔一定要鬧人㗎，執法可以有好多種方式，叫隊長嚟處理都得，而且風紀重有其他額外功能…呀，你咁關心人哋嚟做乜呢？」
我只係諗住瞭解佢哋多啲就容易啲打好關係，咁我以後喺妳隔籬妳都好做啲吖，右女神妳唔係呷醋呀？