【士㞗彈系列】《她被寄宿到鹽水男孩的家中》2K15中: K797

我：「度身？」唔通要比下邊個對波大啲定長闊高比例？
Q：「乜呀，要準備做演出服吖嘛，幽蘭堅持要㗎。」
我：「使唔使咁大陣仗呀？音樂日唔係要著校服㗎咩？」
Q：「係…返學就當然要著校服啦，但係如果要配合上台演出係可以著其他衫㗎，只要得到先生事前批准嘅話，你唔記得嗱，音樂日係有舞蹈組別㗎嘛，雖然唔多人參加，唔通又著住校服跳喇喎？」
我：「好似係…但因為無短裙睇，所以我無理過。」
Q：「唉，你諗都唔使諗呀，我哋啲先生一定ban。」
我：「所以唔關我事，咁妳哋打算著乜？挑戰底線？」
Q：「秘密，到時你咪會知囉，呀唔係，你唔會知，因為你要喺後台幫我哋調音，睇下䚎到幾多囉。」
我：「唓，妳哋著到咁靚靚原來我無份欣賞嘅…」
Q：「吖，咁你係想睇邊個先？幽蘭？易汪？班長？」




我：「睇妳唔得咩…上次粉絲見面會妳都著得好靚。」
Q：「我日日都戙喺度畀你睇晒㗎啦，不過又唔係嘅，我哋都會綵排同試身，所以你唔會話無得睇嘅。」
我：「搞咗成晚就係為咗度身？」
Q：「梗係唔止啦，我哋足足花咗三個鐘頭去諗隊名。」
我：「使唔使呀，叫乜乜班女神組咪得囉，妳哋以前演出…唔係都係乜嘢音樂組女同學代表咁嘅咋咩？」
Q：「點同喎，而家話晒係對決嚟，人哋叫神話Mythology吖嘛，我哋點可以輸呢，輸人都唔可以輸陣！」
我：「咁妳哋用乜還擊呀？Methodology？Apology？」
Q：「咁就當然係要表達到我哋嘅特色㗎啦。」
我：「美少女戰士？小魔女DoReMiFaSo？」計我話叫港女五重奏就最好，可以列入香港非物質文化遺產。
Q：「你食啦，我哋五個咁高貴又點可以用埋啲咁老套嘅名？」佢哋啲英文名鬼死咁繞口巉手，曾經有諗過如果佢哋啱啱好叫TJQKA就無敵，可惜吖，中得隻Queen，思韻又唔係core嚟，又無Tiffany，Kristy…




我：「乜名啫，唔係連名都唔可以話我聽呀？」
佢打開電話，show咗一幅圖畀我睇，上面有幾粒中世紀style嘅英文字，應該係出自幽蘭嘅手筆…
我：「Q，u，z，V，y？英文字嚟㗎？」
Q：「嗯，算係啦，嚴格嚟講係英文字母嚟。」
我：「我知係妳哋個名嘅開頭，但呢嚿嘢係點解？」
Q：「你咁聰明，一定諗得到嘅。」
係一個字？定兩個字？點解有兩粒字係大楷嘅？我望住五粒狗屁不通嘅英文字…應該係話我才疏學淺，完全不明所以；點讀呢？Cutesfy？QuizWe？Coolsfy…