【士㞗彈系列】《她被寄宿到鹽水男孩的家中》2K15中: K829

U：「唓，你都無反應嘅，難得我剩係話畀你一個聽。」
我：「我可以點喎…妳拍拖我又唔會跟埋去嘅，如果妳有閃卡到時再share我睇就會好開心。」
U：「黐線，我同佢唔係拍拖囉，更加無可能有閃卡。」
我：「閃唔閃唔使同我講，乜妳唔想同佢拍拖咩？」
U：「想就想…但問題係而家唔係吖嘛，我講事實咋。」
我：「問題唔係而家妳哋係唔係拍拖，而係妳有無打算同辦法將呢件事變為事實。」
U：「點變喎，我同佢好耐無見喇，發展下先啦。」
我：「妳同佢有幾耐無見呀，點解嘅？」
U：「就嚟半年喇，佢平時又唔會私下約我嘅，為咗謦公事咋嘛，都係上嚟公司兜個圈交代完啲嘢就走，咁而家個system起好晒run得好順暢，自然就無乜見面機會。」
我：「其實…佢係咪真係當妳朋友嚟㗎…」




U：「我相信係呀！如果唔係做乜無啦啦會約我出嚟見面，重要係晚飯添！雖然…可能佢有打算幫我哋啲嘢放上cloud而搵我，之前都聽佢提過。」
我：「唉，小妹妹，點都好，妳唔好好努力將來唔好喊，你連對方有無女朋友都重未知呀。」
U：「應該無囉，佢從來都無提過嘅。」
我：「有唔一定要講㗎喎，妳點解可以一口咬定？」
U：「佢…IG去旅行啲相都自己一個嘅，一係風景相，其他都係做嘢嘅，佢工作狂嚟㗎，夜晚八九點都重可以覆我屋企人啲公事，應該無時間拍拖掛。」
我：「咁…唔通晚晚OT到落老蘭然後撿屍聽朝再開工？」
U：「是但啦！總之無女朋友同老婆就得啦！」
我：「妳接受能力都幾強㗎喎，聽聞妳啲好朋友重話文弱書生多雞蟲，如果無女朋友的話…」
U：「咁都正常嘅，咁大個男人如果無女喺身邊。」
我：「我只會講，有時機會得一次，就睇妳有無好好把握，唔好理佢而家係點喇，用返妳平時一鼓作氣嘅氣勢啦，如果唔係，半年之後人哋分分鐘結埋婚。」




U：「講你就易呀！咁你有無同茜旎表白呀？」
我：「我…無噃，我日日都見到佢，呢啲嘢唔使急。」
U：「好笑，你就唔使急，我就要好好把握，唔通你咁樣又會成功喇咩？」
我：「我從來都無諗過自己會有成功嘅一日。」
U：「廢柴！所以我絕對無需要參考你嘅建議。」
我：「妳決定囉，我又唔會介意妳同我一齊咁廢嘅，但起碼我有拍過拖，想見某個女仔嗰陣重可以約佢，唔會半年先見人哋一次，起碼我有信心而家要搵茜旎佢會出嚟。」
U：「唓，我星期六第一次同人正式約會，你唔好打亂我嘅計劃，我自然有我嘅行動方針。」
我：「係乜方針？用過臂摔將佢壓喺床上面？」
U：「屌你啦，你唔好日撚日都咁鹹濕得唔得嘅啫！」