【士㞗彈系列】《她被寄宿到鹽水男孩的家中》2K15中: K901

我：「嗯…又好似有啲印象，同課本上面嘅嘢差唔多。」
豬：「你吃香蕉啦，你返學除咗識溝女之外重識做乜？」
我：「此言差矣，我返咗咁耐學從未溝過女同學。」珍珠都無咁真，嚴格嚟講係兩條女想溝我啫。
豬：「咁你而家呢？唔好話我聽你對住啲女仔食齋。」
我：「咁就梗係食齋啦，你唔係學出面啲友中傷女神呀，凡人如我就只可以做佢哋嘅普通朋友，或者二等兵。」
豬：「唉，估唔到連妳都癲埋一份，重叫埋佢過嚟。」
U：「吓，交叉仔都幾得意吖，同埋佢又唔會溝我嘅，所以對我無影響。」
我：「咪係囉，諗住有個晏覺好瞓，做乜叫埋我嚟。」
U：「咁…有你喺度，個氣氛好似無咁怪吖嘛。」
我：「本身妳玩音樂日呢樣嘢就已經夠晒怪…你又係嘅，做乜咁好人教人哋唱歌，係咪臣服咗喺佢美色之下呢？」




豬：「好明顯…我同你一樣係臣服喺強權之下。」
U：「講乜…嘢呀，唔好以為有份幫我就可以亂噏廿四喎，信唔信個聖誕聯歡我乜都唔理要你負責晒吖嗱。」
豬：「都可以，為咗紀念耶穌，我哋嗰日就揀一章福音出嚟輪流讀晒佢，應該捱到一日。」
U：「好呀，咁你嗰日就做文書記錄低晒所有同學講過嘅內容，如果唔係後人唔知道學校曾經有個咁正嘅聖誕聯歡。」濕濕碎啦，新約已經夠薄，重要得一章。
無其他女神喺度，我哋呢啲平民當然係搭地鐵過去…
得返天王星一個喺度，無咁多人望過嚟自在好多。
我：「其實想問下，點解你會喺園藝學會嘅？」呢個人確實有啲奇怪，會玩推鉛球，種菜，竟然重識唱歌。
豬：「咪同你一樣囉，中一嗰陣講過一定要參加一個學會吖嘛，我以前身型又點會玩到運動嗰啲喎，阿蔡sir就叫我不如去跟佢種下嘢，多啲行上天台當做運動囉。」
我：「嗯…蔡sir叫你去種菜，但行咗咁多年都係呢個身型，睇嚟你好擅長種嘢，年年豐收又食返晒。」
豬：「收皮啦你！比起嗰陣我而家BMI起碼少咗三呀！」




我：「係巴閉喎，唔知道究竟係出於份子嘅減少，定係份母嘅增加呢？」
U：「你兩個可唔可以唔好咁小學雞？」
我：「有啲難度喎，因為我識佢嗰陣係中一…」講開係得意嘅，因為兩年無見，見返又會同佢喺度推來推去。
豬：「肯定唔關我事，呢條友…嘅下半身我就唔清楚，但佢上半身一定係小學雞嚟。」
我：「咁無問題吖，一個人嘅上半生就一定無佢嘅下半生咁成熟㗎啦，唔係邊有得嚟成長呀。」
豬：「你都烚戇嘅，煮熟你下半身就差唔多。」
U：「重要五成熟，等佢求生不得，求死不能。」