【士㞗彈系列】《她被寄宿到鹽水男孩的家中》2K15中: K902

我：「咁惡毒嘅妳，咁我哋唔好小學雞，不如討論下女班長嘅意中人。」
U：「黐線啦你，我專心讀書又何來意中人。」一早知妳死都唔會肯認，抵妳溝唔到仔做老姑婆。
我：「係嘞，其實你都幾長情，竟然一種就種咗四年菜。」
豬：「好笑，你自己咪夠係一打就四年橋牌。」
我：「我唔同喎，我每年先去得嗰三幾次。」
豬：「乜係咩？有啲人好似今年個個禮拜都有去喎，呢啲唔係叫溝女係乜。」
我：「呢啲叫…協助插班同學適應新環境，但我見你都幾神心，聽聞園藝學會有唔少女仔，你會唔會同佢哋一齊播種，捉住佢哋隻手仔教佢哋耙泥㗎？」
豬：「你咁想知咪入會感受下囉…園藝學會好靜態㗎咋，我有我種，佢哋有佢哋種，基本上無乜互動嘅，係會輪流幫晒其他人啲嘢淋水only。」
我：「就咁？會唔會順便偷吃人家的果實？」
U：「救命，我要好好思考下重應唔應該俾你黐埋嚟。」




我：「唔應該，妳唔見我好努力爭取緊多啲晏覺時間㗎咩？」一次就話好過癮，要日日陪住班女神呢…
豬：「班長，如果下次再有決鬥唔好留活口喇，實行為民除害，殺一儆百。」
㞗下㞗下，我哋終於行到去band房。
豬：「嘩！係無線雙聲道耳返呀！」
U：「做乜咁驚奇？乜好特別㗎咩？」
豬：「唔特別，但至少…我哋學校無提供囉。」
U：「好緊要㗎咩？有同無其實差啲乜？」
豬：「有咗，咪可以聽到自己唱成點，奏成點。」
U：「自己唱出嚟嘅嘢自己有乜可能聽唔到呀…」
豬：「妳唔係用過㗎喇咩，到底知唔知點用㗎…」




U：「我諗住戴咗就唔使嘈到其他人咋。」…。
總之，set咗一輪隻豬就開始研究下天王星唱啲乜，其實都係嗰五六句，而首歌都係佢第一次聽。
你估怪醫秦博士真係咁多人睇咩，邊似得柯南紅足幾十年，青山剛昌撓埋雙手靠食版稅怕且都夠食幾世。
比另外堆女神文明少少，肥豬幫佢嗰幾句歌詞寫咗個vocal譜，教佢用耳返，喺佢電話度整咗個tonal app，即係會播個單音出嚟，然後你要模仿，佢再錄音顯示你個音啱唔啱音，大致上係咁，聽易汪講較提琴都係用呢啲。
查實我就真係唔知嚟做乜嘅，不過呢度有樣嘢好，恒溫空調加雪櫃嘢飲任飲，算係咁啦，租畀外人都唔知一粒鐘要收幾錢，作為我嘅自修室亦尚算合理。