【士㞗彈系列】《她被寄宿到鹽水男孩的家中》2K15中: K903

我：「你教曉咗佢嗱？」佢由錄音室出咗嚟梳化坐。
豬：「邊有咁易，同佢講咗啲發音原理，靠佢自己慢慢試同記住喇，橫掂都係幾句啫…呢個女仔真係硬頸，明明一開始唔好理Myth就得，又要搞場大龍鳳辛苦自己。」
我：「其實我覺得本來返學就係可以乜都唔理，瞌下眼瞓，抄下功課，輕輕鬆鬆就可以畢業。」
豬：「你咁樣，畢業就係雙失青年，以後點算。」
我：「大學啲嘢咁深，再讀落去我都讀唔識㗎啦。」
豬：「或者你有啲誤解，大學啲嘢唔一定好深…不過算啦，學校對你嚟講可能只係一個識女仔嘅地方。」
我：「咁我諗要識嘅都已經識咗，係咪唔使再返學？」
豬：「退學吧啦你，再讀落去分分鐘連嗰幾個姣妹都俾你食埋，所有仔都想殺死你㗎喇。」
我：「先無囉，今個學年開始我有乖㗎，係就係成日黐住佢哋幾個，但真心無話諗住為咗乜嚟識佢哋。」
豬：「其實你覺得佢哋幾個邊個最好？」




我：「咁我係識Queenie先，同埋佢算係最靚？」
豬：「唔係問你靚唔靚呀，係如果做對像邊個最好。」
我：「作為佢哋嘅朋友，我係咪應該答你全部都優質？」
豬：「你唔覺得Queenie同易汪太叻女，同佢哋一齊好危險嘅咩？」我都想問下佢哋男朋友嘅睇法。
我：「佢哋要揀大把有得揀，搵到個好過你嘅咪GG囉…」
豬：「Zilvia咁收埋自己，似乎呢個問題就唔存在，至於插班生就有啲古古怪怪，最多剩係理Queenie同埋你，其實天王星份人係比較直接，話一就一，話二就二，如果你頂得順佢，可能會比較穩定。」
我：「我咪好穩定咁比佢欺壓緊囉，點呀，你係咪對人哋有興趣先，我唔介意幫你傳話㗎。」
豬：「頂你！作死你！係咪要整死我先安樂？信唔信我將你當鉛球推出去。」佢一手摙實我手臂。
我：「喂，冷靜啲！小心粒鉛球改變重心令你失去平行呀…唔使咁驚，如果我亂嚟佢只會覺得係我玩嘢，死都我死先啦，係咪先，幾時輪到你？」
豬：「唓，你同佢哋咁老友，邊死得去吖。」




我：「但平心而論，女班長係咪幾正先？」錄音室入面啲凳係圓形嘅鼓凳嚟，一望入去就見到佢嘅輪廓同埋美腿，雖然冬季係無夏季校服咁正，但一樣吸睛。
豬：「廢話，如果唔正就唔係女神嚟啦…只係有啲感慨啫，竟然連健仔都會搵到女朋友。」其實健仔嗰條就好難界定做女朋友嘅，不過我都懶得解釋，反正佢本人無所謂，只要你唔諗住再識女其他人點睇你係好閒。
我：「理得佢啦，而家有我同你一齊做毒撚係咪幾唔錯先？拍拖呢啲嘢好辛苦㗎…」