【士㞗彈系列】《她被寄宿到鹽水男孩的家中》2K15中: K912

Q：「但係點解佢會有工開嘅？唔係你賣佢落火坑呀？」
我：「妳唔好學咗我啲思考方式得唔得，就算我諗得出都唔會做得出啦，係阿健間酒店啲散工嚟啫。」
Q：「好似幾方便喎，請唔請聖誕女郎？三千蚊一日我就OK。」
我：「呢個價…人哋應該請到兩個女郎唔止喇掛？」
Q：「點同，我呢啲優質服務，一個頂兩個啦。」佢喺我面前搔首弄姿，重開始除衫。
我：「如果跳埋脫衣舞，應該可以頂到十個。」
Q：「無呀！你睇下你幾幸福，努力啲搵錢養我吧啦！」
我：「哦，但話時話妳喺我面前除衫係為乜？」
Q：「無，要先過你沖涼啫，bye！」真係古靈精怪。
星期一，返到學校嘅我無非諗住兩件事，第一就係點樣纏住易汪，第二就係今晚餐飯點算。




鄧：「各位同學早晨，你哋上次中期測驗嘅成績已經喺我手，其實我就唔太知你哋考成點嘅，因為無睇過其他卷出得深唔深，不過有得睇我都唔識睇啦…咁物理同埋M2嘅分數係偏低嘅，另外就排名啲變動都幾大下…」通常教語文嘅先生就係咁，擅於長篇大論咁表達啲無意義嘅嘢。
鄧：「咁…係咪按慣例要報頭幾名出嚟？」
「又嚟呢啲老套嘢…估到啦…一定唔會係我先…」
鄧：「或者…我哋應該問下頭幾名嘅意見先？」
周：「老師妳望住我做乜？我唔一定考第一㗎喎。」
鄧：「你咁講，可能其他同學更加想知你係咪考第一。」
「梗係啦，我哋全力支持周B㗎喎！」講起上嚟就怪，以前印象中嘅第一，一係就好假又好勤力嗰啲，一係就六角形戰士睇落完美嗰啲，好少有呢啲笑騎騎嘅天才兒童。
而由於大部份人都知鬥唔過佢，而佢又一啲都唔乞人憎，所以反而變相有一大班fans支持佢年年考第一，尤其係啲男仔，見到佢打低書蟲雅如就會津津樂道。
雅：「其實啲科又唔係全部一樣，排名無乜意思啫。」
V：「但得個知字都好吖，算係一種肯定嚟。」幽蘭一插嘴，全班就即刻靜晒。




其實以前嘅話，全級頭三名又點會唔知，因為係有奬分㗎嘛，至於中期測都玩呢啲，無疑係加大我哋壓力。
鄧：「咁我諗…讀書咁叻嘅人都唔介意俾人知嘅，其實呢，我可以教到你哋班都覺得好榮幸，所以呢…就表揚下以下嘅幾位同學啦，最高分嘅係周同學，而第二就係幽蘭，第三就係雅如。」佢講得好平常，而全班就繼續keep住鴉雀無聲，當然暗地裡已經翻起一股湧浪，即係暗湧，話晒插班生直鏟第二名喎。