【士㞗彈系列】《她被寄宿到鹽水男孩的家中》2K15中: K943

瘟：「就等你呢句，幾驚你唔記得或者走我數呀。」
我：「邊有咁易呀，你估我唔驚你啲財政文書找我晦氣咩…話時話你又使唔使上台唱呀？」
瘟：「要…今年連天王星都有份上台，我無得唔唱啦，全部社長都有份上台，無咁易走得甩。」
我：「抵你啦，諗住做社長有女食，今次真係兜著走…」
瘟：「想食女呢啲人之常情嚟嘅啫，無得強求，不過我比較掛住上年嘅財政同文書多啲。」
我：「哦，原來有人鍾意姐姐多啲。」
瘟：「唔關事，係因為起碼佢哋重會調教下我。」
我：「原來你係M底至啱…但你而家唔係再有兩個師妹咩，咪反客為主調教返佢哋囉。」
瘟：「我唔係你，如果俾佢哋家長投訴分分鐘踢出校…」講到咁，唔通我喺學校攪妹妹仔爆鑊就無後下咩。
我：「咁又係，如果俾姐姐食責任就不在我方。」




聽啲中一仔唱歌，其實生態都係差唔多，有戳到爆嘅死靚仔，有姣閪，有小迷妹，有睇落乖乖仔扮豬食老虎嘅；當然重有啲上去明玩嘢連底聲都無交喺度清唱。
然後就有人影相，拍片，試下啲燈光咁，反正初賽。
Z：「交叉仔，佢哋啲底聲交得好趕，我哋嚟唔切normalize，不如你順便幫佢哋平衡下當係練習。」
乖乖女叫到我就梗係當仁不讓啦，即刻瓹入後台玩嗰兩粒扭扭制，兩粒咁大把，一條底聲一條vocal，望住啲綠色燈去到中間高少少嘅位置；班友都亂㞗咁嚟嘅，有啲係去卡啦OK偷錄時大時細重要沙沙聲，有邊個敢俾你入決賽呀？
如是者，淨係中一雞已經玩咗九個字，好彩中二三無咁多參加者，睇嚟佢哋已經學識咗柒到盡頭仍是柒呢個道理…
豬：「咦，你條友喺度嘅？」佢上咗嚟後台。
我：「無他，免費打雜一個…係咪到你出場喇？」
豬：「嗯，重有兩三個就到我。」
我：「其實你又唔係鍾意出風頭，又唔係為咗溝女，做乜咁樂於參加呢個活動嘅？」
豬：「係無乜所謂咋，本身鍾意唱歌嘅，中一嗰陣俾人推咗出嚟唱，亂打亂撞入咗決賽，自此之後每年都有人搵我參賽，就係咁。」




我：「唔使講又係瘟神啦，多謝你為個社嘅奉獻。」
等咗陣就輪到佢唱，選曲係你怎麼捨得我難過，我當然係全場聽得最清楚嗰個；打側望過去，無乜台風可言，在場亦無人尖叫，企定定喺個咪前唱就好似音樂科考試咁，只不過質素係出奇地高嘅。