【士㞗彈系列】《她被寄宿到鹽水男孩的家中》2K15中: K981

高中獨唱有比較多識嘅人，瘟神就上去唱咗首傾心，不過不失啦，希望佢唔係唱畀QQ聽，而作為社幹事嘅QQ同埋幽蘭喺事後亦都有起身拍手掌；我諗QQ呢世都唔會拍我手掌㗎喇，讀書絕對輸晒，樂器一樣都唔識，唱歌比唔上肥豬，打機無健仔咁神心，就連課金都未必有隻龜咁狠，畢竟佢望住陶小姐條腿聽乃木坂就可以千千聲咁課，而武力就已經比女班長收咗皮。真係要講長處，可能得返黐埋去異性度嘅能力，但喺QQ眼中絕對係缺點嚟。話就話我有幫佢洗衫洗底褲，煮嘢畀佢食，買下風筒燙斗咁，不過呢啲嘢本身就只係屬於佢工人嘅職務範疇。
之後有Bubble師姐唱咗首怯，幾好聽喎，亦都幾襯佢，因為佢一定無楊千fa嘅勇，唱完之後台下成堆中六男仔喺度起哄…無計啦，論大波佢喺本校實在係數一數二。
幾經辛苦，終於捱到去放飯時間，比平時遲咗三個字。
我：「一齊…食飯？」我問差唔多瞓著嘅細龜。
其實今日呢啲環境我梗係可以跟住堆八婆一齊食，問題係由朝到晚黐住佢哋唔係幾好睇，如果陣間連健仔都唔理我嘅話咁點算喎，已經太多仔唔鍾意我。
Y：「咪住，你出一出嚟。」佢彷彿變咗我嘅真娘娘。
我：「係，請問所為何事？」
Y：「雖然我唔想懷疑任何人，但今日我哋係不容有失嘅，所以想你留喺度幫我哋看住啲嘢。」佢咬我耳仔。
我：「可以嘅…但我會餓死㗎喎。」雖然其實唔會。
V：「傻瓜，我哋買返嚟畀你食咪得囉，好快。」




我：「咁妳哋會去食乜呀？」
V：「雲吞魚蛋咋，唔可以滯肚。」
我：「真係好健康喎，如果我食牛雜會唔會俾妳哋打。」
V：「你鍾意食乜咪食乜囉，又唔係你上台，食其他都得㗎，請埋你又點話。」買起埋我又點話。
健：「不如我留喺度陪佢啦，係咪有飯盒派？」
V：「可以嘅，你鍾意囉。」
我：「真係食乜都得？」
Y：「咪附近有得食嘅嘢囉，鮑魚魚翅呢啲整唔切，唔關錢嘅事，唔好玩嘢好喎靚仔。」
我：「請問可以要個雙髀飯嗎？油雞同燒鴨就得喇，唔使燒鵝，記住要薑葱同酸梅醬，再加杯凍奶茶少甜。」
Y：「雙髀咋，我呢度都有一對，夾死你都重得。」呢個YY喺QQ面前同我講嘢越嚟越肆無忌憚…




U：「頂…我好想食呀！」正一男人婆嚟。