【士㞗彈系列】《她被寄宿到鹽水男孩的家中》2K15中: K989

按慣例，佢哋一人掃咗兩粒音之後就開射燈，台下傳嚟陣陣喝采聲，重有女大嗌佢哋團名，肯撚定係收咗錢嘅。
不過喺後台其實睇唔到觀眾，只可以望住表演者嘅側面，雖然係敵人但我想落返去睇㗎，可惜要等班女。
慕：「各位嘉賓老師同學大家好！我哋係Mythology！」
下刪幾句佢哋嘅名同玩乜樂器，講完又要掃多兩粒音，台下又例牌嘩嘩聲，無計啦，比起solo或者低B自high大組合唱，夾band又真係有返啲睇頭。兩位MC亦都好知情識趣入返嚟後台吞泡由得佢哋自由發揮就算。
慕：「今日為大家帶嚟嘅係You give love a bad name，妳敗壞了愛的名聲！」
O：「希望大家唔好誤會，揀呢首歌絕對無影射香港女仔嘅意思…」啱嘅，如果唔係嘅話唱收兵好過嫁人啦。
慕：「因為我哋相信，台下嘅妳一定係天使嚟嘅！Shot through the heart…」台下少咗邊幾條女？班女神囉。
隨住清唱幾聲，鼓聲結他聲響起，演出正式開始！傻嘅，我激動啲乜呢，呢啲歌今時今日隨時隨地打開YouTube就聲畫俱備啦，使喺度睇你幾個麻甩仔？話雖如此，估唔到男班長唱呢種沙啞嘅成熟聲線又唱得幾好，阿三文治嘅和音亦都襯托得有板有眼。
好抱歉，佢哋啲英文名揀得太浮誇，就好似我嗰個咁講出嚟都打冷顫，請容許我嗌佢哋做三文治同背囊。
順帶一提奧利華三文治都係大家樂開嘅。




冷靜啲，諗返起團長講過嘅嘢，第一次偷聽佢就講過呢幾丁友係無問題嘅…嗯，vocal同結他太出，冚過咗啲bass同鼓聲…清唱完之後佢哋啲嗓音亦喺雜音中打咗折扣。
但，班女神去咗邊呢？唔會借尿遁打退堂鼓呀？
慕：「I play my part…and you play your game！」
V：「係咁咋？我哋無理由輸嘅。」突然喺我背脊！
原來佢哋啱啱經側梯喺後面入嚟。
我：「嘩，重以為妳哋幾個有乜搞作，換件咁嘅修女衫使唔使搞成十幾廿分鐘呀，更衣室得一格咩？」
Q：「收嗲啦，我哋打緊仗唔該唔好喺度攪破壞。」
Y：「乜你無聽過咩？請勿質疑你啲女神、主人、娘娘…」
Q：「開工喇，準備set無線mixer。」一講完佢哋就打開兩個金屬箱，跟返顏色一人攞起一個咪戴喺頭上，重有一對耳返。
而我就將部mixer插電；放心啦，梗係有帶火牛，呢個世界係無咁多蝦碌嘢嘅，亦無咁多衰人，就算有都唔會俾佢哋得逞。然後將個out打落去大mixer，再將嗰邊嘅out拉返嚟呢邊個aux。




好抱歉呢度發生咗啲意外，由於我通咗電先插所以攪到爆咗一下聲，好彩出面幾隻嘢已經唱完，下面班傻仔傻女重喺度喧嘩緊，所以無影響啦。
慕：「真係唔畀面，唱晒咁滯妳哋先嚟到。」