【士㞗彈系列】《她被寄宿到鹽水男孩的家中》2K15中: K990

Q：「想嘅咩，好趕吖嘛，為咗有good show畀返你睇咋！」QQ同佢講嘢帶住啲隨意，無計啦，一早識落。
U：「放心，絕對，一定唔會令你失望。」
慕：「承妳貴言，等睇好戲，畀心機喇！」講完落台。
唉，攪乜…想人唔失望就唔好著到修女咁啦，做咁多無謂功夫不如著返校服算，呢套嘢襯古典都正常啲，band就真係…唔識講，就算我鹹濕都重知乜叫美學。
Y：「你開聲啦，我哋要試個耳返。」
我：「吓，我插晒線喇喎，人哋出面唱緊歌。」
Y：「低B，插咗可以mute㗎嘛！」佢伸手啪制。
真係勇敢，俾著係我人哋唱緊就絕對一粒制都唔想掂，而嗰個喺度較大細聲同確保有無聲嘅哥仔望咗佢一眼就繼續玩手遊，實在係hea到。
試咪，試耳返，呢啲佢哋已經練習咗幾十次。
我：「啊，妳做乜攞埋部MacBook嚟嘅，唔通加味精？」我向住佢甩開耳返嘅右耳講。




Q：「咪煩啦，我呢部係keyboard唔係workstation呀，無聲揀㗎，要插軟件先出到聲，如果你識打碟咪有味精囉。」估我唔想咩…同妳哋一齊上台做DJ玩電音band。
問題係唔識呀！你叫我敲三角都可能錯位錯時間啦…
搞掂人嘅部份，大家開始處理啲樂器；而我就再一次複習啲咪點排，首先所有人聲經細mixer唔使用台咪，枝一號咪要搬去鋼琴，二三四可mute，鼓喺尾位，要再插四部樂器，就跟佢團名QZVY咁排啦…
當你有嘢做又唔熟，加埋壓力，出面不知不覺已經唱完兩組兼熄燈，我即刻mute四行插完線再unmute返。
其實呢啲嘢…同揸車有啲似，上落波打下燈咁。
V：「要出去set場啦，快啲抬起部琴啦。」真音樂女孩都叫呢部做琴，偏偏隻Q就次次走嚟糾正我。
我：「吓…又要我上台呀？」其實QQ好犀利，一個人就可以搬起部琴同腳架行段短距離…其實最大問題係，再咁攪落去實聽全校嗌我做鹿鼎公。
Q：「一抽二掕咁，我拎個腳架同電腦啦…」
V：「唔止呀，你重要幫手推個三角琴。」
喺無得選擇之下，我乖乖咁抬起部琴行出去，唔使問阿貴台下啲契弟一見到我哋三個就發出啲奇怪嘅聲音…




V：「…」幽蘭對住台下微微點頭用手指做咗個殊嘅動作，神奇地全場變成死寂，女神好似將時間停止咗咁。
其實我知道呢排啲人最多就係討論佢哋邊個靚啲，當然我唔會實牙實齒話佢哋係全校最靚嘅兩個，但初中嘅女仔再靚都係未熟，中六嘅就已經溫書溫到殘晒，中五幾個靚女分開班唔算好朋友，自然佢兩隻成為熱度最高。