【士㞗彈系列】《她被寄宿到鹽水男孩的家中》2K15中: K997

睇多兩隻舞就完進入頒奬環節，其實早就過咗放學時間。
Y：「點算，係咪要攞奬？我好似換唔切衫…」
Q：「換乜鬼吖，妳都已經著咗咁耐企喺台上面。」
Z：「佢跟返次序㗎，樂器組點都有三甲掛。」
Y：「麻鬼煩，而家全人類都望住我，最衰係妳哋，一齊唔好換衫咪好囉。」話說啱啱跳完舞嘅女同學都換唔切衫，但係大部份人嘅焦點仍然係落喺YY身上。
U：「咪攪，我哋五個再繼續咁著可能連禮堂門口都出唔到。」又啱喎，一放學先生唔理其他仔重唔發癲？
V：「全靠妳咋，天王遙，諗到我哋係美少女戰士。」
U：「閘住，唔好咁嗌我，佢先係媱。」
Y：「Sorry，我係拉小提琴嘅，所以我係美智留。」
Q：「佢話我哋五個人同美戰人數一樣咋嘛，係妳話點都要變身，重搞咗咁多嘢出嚟。」




V：「咁人哋想靚靚吖嘛，難得有妳哋陪我…」
我：「你哋睇邊個史前版本呀，重五個美少女戰士…」
Q：「收嗲啦，你以為自己係地場衛呀，學人搭嘴。」
Y：「如果講地場衛，我諗團長算係最襯。」挑，人哋係靚仔就發晒姣咁，團長同我差唔多高咋嘛…
我：「唉，成班都係火野麗同木野真琴，難以溝通。」
U：「係咪活得唔耐煩呀？想燒死定係電死？」
呢班女明明無嚟營養，點解讀書會咁鬼叻嘅呢？最後如大家所料佢哋又攞咗個樂器小組冠軍，肥豬就憑紮實嘅唱功得到男子獨唱季軍。至於大家最關心嘅嘢我都懶得描述喇，四條仔上完台咪到五條女囉，咁班仔上台都有人為佢哋歡呼嘅，即係話如果唔係男班長今次玩嘢自掘墳墓，佢哋順理成章就會成為今日嘅焦點，只不過而家俾人搶咗。
上台都係咁啦，鞠個躬再多謝大家，班女都慣。
而最後佢哋重要上多次台，因為攞咗個全場最佳演出奬，輕鬆秒殺晒其他小組大組跳舞組，好在全場最佳歌喉奬唔係佢哋攞，否則其他參賽者反枱都似。
「各位同學，請稍等嘉賓老師離場後，可以由最後一排開始離開禮堂放學。」




發：「果然非常精彩，我哋今個週末會趕工，下個星期一就有片攞。」呢班人當然唔會理啲先生直接行埋嚟。
Y：「感謝，等睇你嘅成果。」
發：「所以…呢個聖誕節嘅活動就靠晒妳喇。」佢同易汪講完又望一望QQ，笑得有啲淫邪。
Y：「知喇，應承得你就唔會反口。」
意：「講返正經嘢，既然妳哋贏咗，就麻煩寫返少少嘢等我哋放上網，應該唔使指引㗎啦？」
Y：「得…得…無問題…」
呢啲權力問題唔好攪到我，我返嚟係打卡等收工㗎咋。
Q：「喂，你去邊呀？」
我：「行到我呢排喇，咁我都要放學㗎。」