【士㞗彈系列】《她被寄宿到鹽水男孩的家中》2K15中: 2K26

A：「食咗妳隻豬咁多錢呀，做乜咁想做老細，家下妳好有錢咩，學識搵錢未呀？」
U：「識呀！我有幫屋企做嘢，有糧出㗎！」
A：「咁份糧夠唔夠養返妳屋企呀？都攞嚟講嘅，識搵錢就更加唔應該揮霍，唔係張張單妳都埋得起㗎。」
V：「由佢啦，佢想請咪俾佢請，當我哋賺咗。」
A：「公主，幾時可以用妳張黑卡請我去高尚食府開餐呀，我好期待㗎！」佢偎塊面埋去幽蘭度。
V：「無呀，先唔要同你個衰人食嘢，次次要我喂！」
A：「公主唔好咁小器啦，小心無男人要呀，最多…我下次喂返妳食，一啲妳肯定未食過，好特別嘅嘢。」
V：「哩哩哩！你自己食埋佢啦。」幽蘭細路女伸脷。
打打鬧鬧之下，我哋離開咗餐廳落返大街。
V：「管家揸車過緊嚟，叫我喺呢度等佢。」




A：「大小姐真係大小姐，都唔知有無搭過公共交通工具嘅。」講真嗰句，機會又真係比較少…
V：「點會無呀！起碼飛機都係公共交通工具嚟。」
A：「都懶得同妳癲呀！咁幾位唔介意我親自送主人家返屋企吖嘛？」佢主動拖住咗天王星隻手…
Y：「喂喂喂！你想點呀？乜嘢意思…」
A：「無乜特別，咁今餐係佢發起㗎嘛，感謝下佢啫。」
Y：「使乜你感謝呀，警告你唔好亂嚟喎，唔好諗住埋咗單就可以為所欲為，成副…要捉貴人去臨幸洞房咁嘅樣。」
A：「乜媱媱…妳咁睇我㗎？實在太令我大失所望！我識咗妳咁耐有無試圖約過妳去洞房先？」
Y：「你！總之敢亂嚟嘅話我哋幾姐妹一定唔會放過你。」
A：「呀媱媱妳拉琴㗎咋，講唔放過我嘅話佢一個夠晒啦，不如我問返當事人先，唔介意我送妳返去嘛？」
U：「可以嘅，無所謂。」佢含羞答答咁講。




我：「Uranus，妳肯定OK吖嘛？團長，如果你對我哋嘅服務有啲乜嘢意見，唔夠喉嘅話，我可以再同你去商量下嘅，希望你唔好對佢落手。」
A：「妳咪以己度人啦，正西宮嚟，唔好以為自己樣靚身材正就大晒先得㗎。」
我：「我唔係大晒，只係喺度大緊你，如果你傷害到我嘅姐妹一定會要你後悔。」
A：「得喇，真係送佢返屋企咋，信我！」
我：「Uranus，返到去就message我哋啦，如果有乜嘢事嘅話記住即刻搵我哋。」
U：「嗯，唔會有事嘅，放心。」話口未完團長就拖走咗佢，截咗架的士上埋車。
V：「唓，好叻咩，唔覺得的士係公共交通公具嚟囉。」服咗幽蘭…關心點永遠就係團長串過佢嘅事情。
Y：「係咪真係無嘢㗎，實在令人有啲擔心…」