【士㞗彈系列】《她被寄宿到鹽水男孩的家中》2K15中: 2K27

我：「擔心都無乜用，其實佢唔算係細路女嚟啦，知道自己做緊乜嘅…只不過團長主動嘅話都好難抗拒。」
V：「點會喎，班長咁大力一下就推開佢啦。」
我：「就怕佢啲力唔係攞嚟推開，而係攬住。」
V：「我唔信囉，佢有乜好，無嚟正經，剩係識玩我！」
我：「咁如果佢唔再玩妳，而係惜妳呢？」
V：「唔得呀！先唔會鍾意佢呢啲花花公子，茜旎妳唔係鍾意佢呀？易汪妳以前真係鍾意佢㗎？嗰陣細路女唔識嘢貪佢靚仔咋…點可以咁表面嘅呢？」
Y：「呢啲…一早過咗去啦，無乜嘢好解釋。」
我：「咁又的而且確，談唔上鍾意嘅。」鍾意，係一種好中性同模稜兩可嘅感情，只要對方有少少優點同合自己眼緣就可以隨便鍾意，而團長嘅行為絕對唔會令我哋產生鍾意佢嘅意欲，佢要做到呢點一啲都唔難但佢無咁做，即係佢唔想利用呢樣嘢，同佢相處可能一係退而求其次變成性關係，一係就要更緊密嘅…
V：「咪係囉，呢啲人最叻就係呃無知小妹妹。」呢句事實嚟嘅，只不過人哋唔呃妳寧願俾妳㧻穿啫。
Y：「好在妳屋企唔俾妳拍拖，幫妳消除咗風險。」




V：「但係我都想同啲有質素嘅男仔交流下㗎嘛…」
Q：「唔好諗無謂嘢喇，妳架車到咗，唔好亂講嘢刺激到屋企管妳管得更加嚴呀。」
睇住個傻妹上車呼嘯而去…就覺得佢咁樣其實好幸福，無乜無謂嘢諗，最開心就係同我哋幾個一齊玩。但唔知佢同團長接觸嗰陣有乜感覺呢？剩係覺得玩，定係無所謂？
似乎係物理層面靚仔所以無所謂，心理層面就想咬死佢。
俾個仆街揸波，好想攞返佢著數，但又唔可以咁唔要面…
Y：「Queen，我搭的士返去順路兜埋妳？」
我：「欸…唔使喇，班長俾人捉走咗，我送佢返去啦，佢好似有啲醉。」咪玩，咁樣俾妳車一車，我返去嘅時間就多十五分鐘都唔止。
Z：「唔使啦，我飲得嗰少少開始散㗎喇，妳都唔順路，同埋呢個鐘數搭地鐵返去其實好安全。」
Q：「咁我想陪下妳係咪唔得先？」
Y：「咁唔理妳兩個喇，我要返去執下個IG先。」




於是我同Zilvia行去尖東站，佢而家屋企變得好方便，搭兩個站地鐵就可以去到，雖然重要行一陣，不過佢就係咁，寧願搭地鐵加行路都唔想嘥錢。
重記得中一啱啱識佢嗰陣，唔同班嘅我哋第一次見面就係音樂組嘅面試，當然係因為佢好靚女所以埋去謦欬啦；本來去搵音樂Miss嗰陣都好地地嘅，但去到試音嗰陣原來重有個校外樂器顧問嘅男人，當時個組長又係一個師兄嚟，佢即刻變到好緊張，而個顧問幫佢調整揸笛嘅姿勢嗰陣直頭嚇到震咁滯，後來佢就同我講咗佢嘅往事。